କୋକସର,୫।୧୨,(ଡି.ଏନ୍.ଏ.): ୨୪ ଘଣ୍ଟା ନ ପୁରୁଣୁ ପୁଣି ଜଣେ ଦାଦନ ଶ୍ରମିକଙ୍କ ମୃତ୍ୟୁ ଖବର ସାମ୍ନାକୁ ଆସିଛି। ସୋମବାର କଳାହାଣ୍ଡି ଜିଲା ଗମ୍ଭାରୀଗୁଡ଼ା ର୍ସିଲିଗୁଡା ଗାଁକୁ ଜଣେ ଦାଦନ ଶ୍ରମିକଙ୍କ ମୃତଦେହ ଫେରିଥିବା ବେଳେ ପୁଣି ଜଣେ ଶ୍ରମିକଙ୍କ ସିକନ୍ଦରାବାଦରେ ମୃତ୍ୟୁ ହୋଇଥିବା ଅଭିଯୋଗ ହୋଇଛି।
ମୃତକ ହେଉଛନ୍ତି ସାନ ପୋଡ଼ାଗୁଡ଼ା ପଞ୍ଚାୟତ ନେଗିଗୁଡ଼ା ଗାଁର ବାଳମତ ସୁନାଙ୍କ ପୁଅ ସତ୍ୟ ସୁନା(୨୪)। ସେ ମାସେ ତଳେ ନୂଆପଡ଼ା ଜିଲା ସିନାପାଲି ବ୍ଲକ ପିଠାପଡ଼ା ଗ୍ରାମର ଦାଦନ ସର୍ଦ୍ଦାରଙ୍କ ପ୍ରଲୋଭନରେ ପଡ଼ା ସିକନ୍ଦରାବାଦର ଏକ ଇଟାଭାଟିରେ କାମ କରିବାକୁ ଯାଇଥିଲେ। ତେବେ ଇଟାଭାଟିରେ କାମ କରୁଥିବା ବେଳେ ଗତ ଗୁରୁବାର ପୋଡି ଗୁରୁତର ହୋଇଥିଲେ। ତାଙ୍କୁ ସିକନ୍ଦରାବାଦର ଗାନ୍ଧୀ ହସ୍ପିଟାଲରେ ଭର୍ତ୍ତି କରାଯାଇଥିବା ବେଳେ ଚିକିତ୍ସାଧୀନ ଅବସ୍ଥାରେ ରବିବାର ସନ୍ଧ୍ୟାରେ ମୃତ୍ୟୁ ଘଟିଛି। ରୋଜଗାରିଆ ପୁଅର ମୃତ୍ୟୁ ଖବର ପାଇ ପରିବାର ଲୋକେ ଭାଙ୍ଗି ପଡିଛନ୍ତି। ଅନ୍ୟପକ୍ଷେ ମୃତଦେହ ଆଣିବାକୁ ବାପା ବାଳମତ ସୁନା ଓ ସମ୍ପର୍କୀୟ ଦଶରଥ ଖମାରୀ ସିକନ୍ଦରାବାଦ ଯାଇଛନ୍ତି।
ପ୍ରକାଶ ଥାଉକି, କୋକସରା ବ୍ଲକ ଅଞ୍ଚଳରେ ଶ୍ରମିକଙ୍କ ପାଇଁ ରହିଥିବା ମନରେଗା ଯୋଜନା ଦିଗହରା ହୋଇପଡିଥିବା ବେଳେ କର୍ମ ସଂସ୍ଥାନ ଅଭାବରୁ ପ୍ରତିଦିନ ଅନ୍ୟ ରାଜ୍ୟ ମୁହାଁ ହେଉଛନ୍ତି ବ୍ଲକର ଶତାଧିକ ଶ୍ରମିକ। କୋକସରା ବ୍ଲକର ବିଭିନ୍ନ ପଞ୍ଚାୟତକୁ ବିଗତ କିଛିମାସ ମଧ୍ୟରେ ୧୦ଜଣ ଦାଦନ ଶ୍ରମିକଙ୍କ ମୃତଦେହ ଫେରିବା ଘଟଣାକୁ ନେଇ ଅଞ୍ଚଳରେ ଆଲୋଡନ ସୃଷ୍ଟି ହୋଇଛି।
