ବଲାଙ୍ଗୀର ଅଫିସ, ୧୫।୫-ବଲାଙ୍ଗୀର ଜିଲା ମହୀମୁଣ୍ଡା ପଞ୍ଚାୟତରେ ପିଡିଏସ୍ ଚାଉଳ ଦୁର୍ନୀତି ଘଟଣାରେ ଯୋଗାଣ ସହାୟକ ନିରଞ୍ଜନ ସାହୁଙ୍କୁ ଚାକିରିରୁ ବହିଷ୍କୃତ କରାଯାଇଛି। ଉପଜିଲାପାଳଙ୍କ ନିର୍ଦ୍ଦେଶ ଓ ବିଡିଓଙ୍କ ଚିଠି ବଳରେ ସରପଞ୍ଚ ଅନନ୍ତ ନାରାୟଣ ପ୍ରଧାନ ଯୋଗାଣ ସହାୟକ ସାହୁଙ୍କୁ ବହିଷ୍କୃତ କରିଥିବା ସୂଚନା ଦେଇଛନ୍ତି। ସରପଞ୍ଚ ପ୍ରଧାନ ଗତ ଏପ୍ରିଲ ମାସରେ ନିଜ ପଞ୍ଚାୟତର ଯୋଗାଣ ସହାୟକ ସାହୁଙ୍କ ବିରୋଧରେ ଅଭିଯୋଗ ଆଣିଥିଲେ। ଯୋଗାଣ ସହାୟକ ସାହୁ ଗତ ୧ ବର୍ଷରୁ ଅଧିକ ହେବ ହିତାଧିକାରୀଙ୍କ ପିଡିଏସ୍ ଚାଉଳ ବଣ୍ଟନ, ସେମାନଙ୍କ ରାଶନ କାର୍ଡ ହେରଫେର, ମୃତ ବ୍ୟକ୍ତିଙ୍କ ନାମରେ ଚାଉଳ ଉଠାଣ କରୁଥିବା ଅଭିଯୋଗ କରିଥିଲେ। ଏ ନେଇ ପୁଇଁତଲା ବିଡିଓଙ୍କୁ ଲିଖିତ ଭାବେ ଜଣାଇ ଏହାର ତଦନ୍ତ କରିବା ସହ ତୁରନ୍ତ ଯୋଗାଣ ସହାୟକଙ୍କୁ ବହିଷ୍କୃତ କରିବାକୁ ଦାବି କରିଥିଲେ। ଏହି ଅଭିଯୋଗର ନକଲ ଜିଲାପାଳଙ୍କୁ ଅବଗତ କରି ଟ୍ବିଟ୍ ଜରିଆରେ ସ୍ଥାନୀୟ ବିଧାୟକ ଡ. ମୁକେଶ ମହାଲିଙ୍ଗ, ଓଡିଶା ସିଏମ୍ଓ ଏବଂ ପଞ୍ଚାୟତିରାଜ ବିଭାଗକୁ ଜଣାଇଥିଲେ । ଏଭଳି ଅଭିଯୋଗର ତଦନ୍ତ କରି ଉପଜିଲାପାଳ ମିଶ୍ର ମହୀମୁଣ୍ଡା ପଞ୍ଚାୟତର ଯୋଗାଣ ସହାୟକ ସାହୁଙ୍କୁ ବହିଷ୍କାର କରିବା, ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଯୁଗଳ ମେହେରଙ୍କ ବିରୋଧରେ ଡ୍ରାଫ୍ଟଚାର୍ଜ କରିବା ଓ ପୁଇଁତଲା ବ୍ଳକ୍ ଯୋଗାଣ ନିରୀକ୍ଷକ ପ୍ରଶାନ୍ତ ପ୍ରଧାନଙ୍କ ଗୋଟିଏ ମାସର ଦରମା ବନ୍ଦ କରିବାକୁ ପୁଇଁତଲା ବିଡିଓଙ୍କୁ ନିର୍ଦ୍ଦେଶ ଦେଇଥିଲେ । ବିଡିଓ ରବିନାରାୟଣ ଆଚାର୍ଯ୍ୟ ଉପଜିଲାପାଳଙ୍କ ନିର୍ଦ୍ଦେଶକୁ କାର୍ଯ୍ୟକାରୀ କରିବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିବା ସହ ଏ ସଂକ୍ରାନ୍ତରେ ମହୀମୁଣ୍ଡା ସରପଞ୍ଚ ପ୍ରଧାନଙ୍କୁ ଚିଠି କରିଥିଲେ ।ଏହି ଚିଠି ପାଇବା ପରେ ସରପଞ୍ଚ ପ୍ରଧାନ ଶୁକ୍ରବାର ଯୋଗାଣ ସହାୟକ ସାହୁଙ୍କୁ ବହିଷ୍କୃତ କରିଛନ୍ତି।
