ନୂଆଦିଲ୍ଲୀ,୧୩।୩: ନିର୍ବାଚନ ବଣ୍ଡ ମାମଲାରେ ସୁପ୍ରିମକୋର୍ଟଙ୍କ ତାଗିଦ ପରେ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ (ଏସବିଆଇ) ବୁଧବାର ଏକ ଆଫିଡେଭିଟ୍ ଦାଖଲ କରି ସୂଚନା ଦେଇଛି ଯେ ଏହା ବଣ୍ଡ ସମ୍ପର୍କିତ ତଥ୍ୟ ନିର୍ବାଚନ ଆୟୋଗ (ଇସି) ନିକଟରେ ଦାଖଲ କରିଛି। ଏସବିଆଇ ଏହାର ଅନୁପାଳନ ପ୍ରମାଣପତ୍ରରେ କହିଛି ଯେ ଏହା ଏକ ପେନଡ୍ରାଇଭରେ ସମସ୍ତ ତଥ୍ୟ ଦାଖଲ କରିଛି। ଯାହା ଦୁଇଟି ପିଡିଏଫ ଫାଇଲରେ ଅଛି ଯାହା ପାସୱାର୍ଡ ଦ୍ୱାରା ସୁରକ୍ଷିତ।
ସୁପ୍ରିମକୋର୍ଟ ଏହି ଯୋଜନାକୁ ନିଷିଦ୍ଧ ଘୋଷଣା କରିବା ପୂର୍ବରୁ ଏପ୍ରିଲ ୨୦୧୯ ରୁ ଫେବୃଆରୀ ୧୫, ୨୦୨୪ ମଧ୍ୟରେ ମୋଟ ୨୨,୨୧୭ ନିର୍ବାଚନ ବଣ୍ଡ ଜାରି କରାଯାଇଥିବା ବ୍ୟାଙ୍କ ଏହାର ଆଫିଡେଭିଟରେ କହିଛି। ଏଥିରୁ ରାରାଜନୈତିକ ଦଳ ଗୁଡ଼ିକ ୨୨,୦୩୦ ବଣ୍ଡ ବ୍ୟବହାର କରିଛନ୍ତି। ଅବଶିଷ୍ଟ ୧୮୭ ଟି ନିୟମ ଅନୁଯାୟୀ ପ୍ରଧାନମନ୍ତ୍ରୀଙ୍କ ଜାତୀୟ ରିଲିଫ ପାଣ୍ଠିରେ ଜମା ହୋଇଥିବା ବ୍ୟାଙ୍କ କହିଛି।
ତେବେ ବନ୍ଦ ହୋଇଥିବା ନିର୍ବାଚନୀ ବଣ୍ଡ ସ୍କିମ୍ ଅଧୀନରେ ଦାତାମାନେ ନିଜ ପସନ୍ଦର ଦଳକୁ ଦାନ କରିବାକୁ ବଣ୍ଡ କ୍ରୟ କରିପାରିବେ। କିନ୍ତୁ ଦଳଗୁଡିକ ୧୫ ଦିନ ମଧ୍ୟରେ ବଣ୍ଡ ଗୁଡିକୁ ବ୍ୟବହାର କରିବାକୁ ପଡିବ, ଯାହା ବିଫଳ ହେଲେ ପ୍ରଧାନମନ୍ତ୍ରୀଙ୍କ ରିଲିଫ ପାଣ୍ଠିକୁ ଯିବ।
ଫେବୃଆରୀ ୧୫ ର ଏକ ଗୁରୁତ୍ୱପୂର୍ଣ୍ଣ ରାୟରେ ସୁପ୍ରିମକୋର୍ଟ ନିର୍ବାଚନ ବଣ୍ଡକୁ “ଅସାମ୍ବିଧାନିକ” ଏବଂ ଏହା ଦାତା ଏବଂ ରାଜନୈତିକ ଦଳ ମଧ୍ୟରେ ସମ୍ଭାବ୍ୟ କ୍ୱିଡ୍ ପ୍ରୋ କୋଓ ବିଷୟରେ ନାଗରିକଙ୍କ ସୂଚନା ଅଧିକାରକୁ ଉଲ୍ଲଂଘନ କରୁଛି ବୋଲି କହିଥିଲେ।
ଏହା ସହିତ ତୁରନ୍ତ ବଣ୍ଡ ଜାରି କରିବା ବନ୍ଦ କରିବାକୁ ଏବଂ ଦାନର ବିବରଣୀ ଇସି ନିକଟରେ ଦାଖଲ କରିବାକୁ ଏସବିଆଇକୁ ନିର୍ଦ୍ଦେଶ ଦେଇଥିଲେ, ଯାହା ସାର୍ବଜନୀନ କରାଯିବ।
