ଭୁବନେଶ୍ୱର, ୨୮।୧୨ (ବ୍ୟୁରୋ): କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ) ପକ୍ଷରୁ ମଙ୍ଗଳବାର ୨୦୨୨ର ବାର୍ଷିକ ରିପୋର୍ଟ ପ୍ରକାଶ ପାଇଛି। ବର୍ଷକରେ ଘର, ଜମି ଯୋଗାଣ, ଇନ୍କମ୍ ଟ୍ୟାକ୍ସ, ସାଇବର, ଚାକିରି, ଡିଜିଟାଲ ଲୋନ୍ ଠକେଇ ଆଦି ବଡ଼ ବଡ଼ ଘଟଣାକୁ ନେଇ ୨୨ଟି ମାମଲା ରୁଜୁ ହୋଇଥିବାବେଳେ ଏଥିରେ ୧୦୦ କୋଟିରୁ ଊର୍ଦ୍ଧ୍ୱ ଟଙ୍କା ଠକେଇ ହୋଇଛି। ଏସବୁ ମାମଲାରେ ୬୦ଜଣ ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ଉପରୋକ୍ତ ମାମଲାରେ ଚାଇନା, ହଂକଂ, ଥାଇଲାଣ୍ଡ, ମାଲେସିୟା, ସିଙ୍ଗାପୁର, ନେପାଳ, ଶ୍ରୀଲଙ୍କା ଆଦି ଦେଶରେ ଅଭିଯୁକ୍ତମାନେ ରହି ରାକେଟ ଚଳାଉଛନ୍ତି। ଇଓଡବ୍ଲ୍ୟୁ ଏସବୁ ମାମଲାରେ ତଦନ୍ତ କରିବା ସହ ବିଭିନ୍ନ ଲ’ ଏନ୍ଫୋର୍ସମେଣ୍ଟ ଏଜେନ୍ସି , ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି), ଇନ୍କମ୍ ଟ୍ୟାକ୍ସ, ଏଫ୍ଆଇୟୁ (ଫାଇନାନ୍ସିଆଲ୍ ଇଣ୍ଟେଲିଜେନ୍ସ ୟୁନିଟ), ଆର୍ବିଆଇ, ଇଣ୍ଟେଲିଜେନ୍ସ ବ୍ୟୁରୋ, ବ୍ୟୁରୋ ଅଫ୍ ଇମିଗ୍ରେସନ୍, ସିବିଆଇ, ସିଆଇଏସ୍ଏଫ୍, ଏକାଧିକ ବ୍ୟାଙ୍କ, ଜିଏସ୍ଟି କର୍ତ୍ତୃପକ୍ଷ, ମୁମ୍ବାଇ ପୋଲିସ, ଦିଲ୍ଲୀ ପୋଲିସ, କୋଲାକାତା ପୋଲିସ, ବାଙ୍ଗାଲୋର ପୋଲିସର ସହଯୋଗରେ କାର୍ଯ୍ୟ କରୁଛି। ଏଥିସହ ଗୁଗଲ, ଫେସ୍ବୁକ୍, ହ୍ବାଟ୍ସଆପ୍, ଗୋ-ଡାଡି ଆଦି ସହଯୋଗରେ କିଛି ମାମଲାରେ ତଦନ୍ତ ମଧ୍ୟ କରାଯାଉଛି। ତେବେ ସବୁଠୁ ବଡ଼ କଥା ହେଲା, ଡିଜିଟାଲ ଲୋନ ଆପ୍ ଠକେଇ ମାମଲାରେ ସାରା ଦେଶରେ ୧୦୮ଜଣ ଆତ୍ମହତ୍ୟା କରିଛନ୍ତି। ହେଲେ ଓଡ଼ିଶାରେ କେହି ଆତ୍ମହତ୍ୟା ଭଳି ଚରମ ପଦକ୍ଷେପ ଗ୍ରହଣ କରିନାହାନ୍ତି। ତେବେ ଇଓଡବ୍ଲ୍ୟୁ ପକ୍ଷରୁ ତଦନ୍ତ ସହ ଦୃଢ଼ ପଦକ୍ଷେପ ଗ୍ରହଣ କରାଯାଇଥିବାରୁ ଠକେଇର ଶିକାର ପୀଡିତଙ୍କ ଜୀବନ ବଞ୍ଚତ୍ୟାଇଥିବା ଇଓଡବ୍ଲ୍ୟୁ ପକ୍ଷରୁ କୁହାଯାଇଛି।
