ଜଗତ୍ସିଂହପୁର ଅଫିସ, ୧୧ା୧: କଟକ ବନଖଣ୍ଡ ଅଧୀନ ଜଗତ୍ସିଂହପୁର ରେଞ୍ଚ ଅଞ୍ଚଳର ସନ୍ତସନ୍ତିଆ ସ୍ଥାନରେ ମଙ୍ଗଳବାର ପକ୍ଷୀ ଗଣନା କରାଯାଇଛି। ଏହି ଗଣନାରେ ବିଭିନ୍ନ ପ୍ରଜାତିର ମୋଟ ୨୦୬୨ଟି ପକ୍ଷୀ ଚିହ୍ନଟ ହୋଇଛନ୍ତି। କଟକ ବନଖଣ୍ଡ ଏସ୍ଟିଏଫ୍ ସୌଭାଗ୍ୟ କୁମାର ସାହୁ ଓ ଜଗତ୍ସିଂହପୁର ରେଞ୍ଜ ଅଫିସର ରବିନାରାୟଣ ମହାନ୍ତିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ୪ ଦଳ ପୃଥକ୍ ସ୍ଥାନରେ ଗଣନା କାର୍ଯ୍ୟରେ ନିୟୋଜିତ ହୋଇଥିଲେ। ଏହି ଅବସରରେ ତାରପୁର ନାରାୟଣୀ ମନ୍ଦିର ନିକଟ ମହାନଦୀରୁ, କମାରଶାସନ ରାହାସବଟ ବଗୁଳାଘାଇସ୍ଥିତ ଦେବୀ ନଦୀରୁ, ଏହି ନଦୀର ଶଙ୍ଖାରିସାହି ନିକଟରୁ ଓ ଦଳେଇଘାଇ ପାଖରୁ ୧୬ ପ୍ରଜାତିର ପକ୍ଷୀ ଚିହ୍ନଟ ହୋଇଥିଲେ। ଏହି ପକ୍ଷୀଗୁଡିକ ମଧ୍ୟରେ ଲିଟିଲ କର୍ମୋରାଣ୍ଟ (ପାଣି କୁଆ), ଲିଟିଲ ଇଗରେଟ୍ (ଛୋଟ ବଗ), ଇଣ୍ଟରମିଡିଏଟ୍ ଇଗରେଟ (ଗେଣ୍ଡାଳିଆ), କ୍ରେ ହିରୋନ (ବଡ଼ ବଗ), ବ୍ରାହ୍ମନି ରିଡଲ ସ୍ଲେଡକ୍ (ଚକୁଆ ଚଢ଼େଇ), ଇଣ୍ଡିଆନ କଟନ ଟିଲ୍ (ବତକ ଜାତୀୟ), ରେଡ ୱାଟଲେଡ୍ (ନାଲି ପାଦ ଥିବା ମାଛରଙ୍କା ଭଳିଆ) ଓ ଲୋଟେଡ୍ ବ୍ରେଷ୍ଟେଡ୍ କିଙ୍ଗଫିସର (ଗଙ୍ଗେଇ ଚଢ଼େଇ), ଇଣ୍ଡିଆନ ସଗ (ବଗ ଭଳି), ଇଣ୍ଡିଆନ ପଣ୍ଡ ହିରନ୍, କର୍ଟଲ ଇଗରେଟ୍ , ଏସିଆନ ଓପନ ବିଲ୍ (ଚେଁ ଚେଁକିଆ ବଣି), କମନ କିଙ୍ଗ ଫିସର (ସାଧାରଣ ମାଛରଙ୍କା), ସଲରୀ (ଢାଉକ),ରିଭର ଲାପୋକିଙ୍ଗ (ଢାଉକ ଜାତୀୟ) ଇଣ୍ଡିଆନ ଓପନ ବିଲ୍ ପ୍ରମୁଖ ରହିଛନ୍ତି। ସେଥିମଧ୍ୟରେ ବ୍ରାହ୍ମନି ରିଡଲ ସ୍ଲେଡକ୍ (ଚକୁଆ ଚଢ଼େଇ) ଓ ଇଣ୍ଡିଆନ ସଗ (ବଗ ଭଳି) ସଂଖ୍ୟା ଅଧିକ ରହିଛି। ଏହି ପକ୍ଷୀଗଣନା କାର୍ଯ୍ୟରେ ବନ ବିଭାଗ ପକ୍ଷରୁ ପୀତବାସ ମହାପାତ୍ର, ବିଜୟିନୀ ବିଶ୍ୱାଳ, ଲୋକନାଥ ମହାନ୍ତି, ଦୀପ୍ତିରଞ୍ଜନ ଗୁରୁ, ସୁପ୍ରଭା ଜେନାମଣି, ଭାରତୀ କାଣ୍ଡି, ରଞ୍ଜନ କୁମାର ଭୋଇ, ବାମନ ଚରଣ ରାଉତ, ସରୋଜ ନାଥ, ସତ୍ୟପ୍ରକାଶ ବାରିକ, ସୁକାନ୍ତ କୁମାର ବେହେରା, ରୀନାରାଣୀ ମଲ୍ଲିକ ଓ ଦିଲୀପ କୁମାର ମହାନ୍ତି ପ୍ରମୁଖ ସାମିଲ ହୋଇଥିଲେ।
