ଲଣ୍ଡନ, ୧୬।୭(ଏପି)- କାତାରରେ ହେବାକୁଥିବା ୨୦୨୨ ଫିଫା ବିଶ୍ୱକପର ଗ୍ରୁପ ପର୍ଯ୍ୟାୟରେ ପ୍ରତିଦିନ ୪ଟି ଲେଖାଏ ମ୍ୟାଚ ଖେଳାଯିବ। ଗ୍ରୁପ ମ୍ୟାଚ ଗୁଡ଼ିକ ୧୨ଦିନଧରି ଚାଲିବ। ପରବର୍ତ୍ତୀ ପର୍ଯ୍ୟାୟରେ ଯେଉଁ ମ୍ୟାଚ ଅତିରିକ୍ତ ସମୟକୁ ଯିବ ତାହା ବିଳମ୍ବିତ ରାତ୍ରି ପର୍ଯ୍ୟନ୍ତ ଅନୁଷ୍ଠିତ ହେବ। ନଭେମ୍ବର-ଡିସେମ୍ବରରେ ହେବାକୁଥିବା ଏହି ବିଶ୍ୱକପ ପାଇଁ ଫିଫା ପକ୍ଷରୁ କାର୍ଯ୍ୟସୂଚୀ ପ୍ରକାଶିତ ହୋଇଛି। ମ୍ୟାଚ ଗୁଡ଼ିକ ସ୍ଥାନୀୟ ସମୟ ଅପରାହ୍ନ ୧ଟା, ୪ଟା, ରାତି ୭ଟା ଓ ୧୦ଟାରେ ଅନୁଷ୍ଠିତ ହେବ। ମଧ୍ୟପ୍ରାଚ୍ୟରେ ହେବାକୁ ଯାଉଥିବା ପ୍ରଥମ ବିଶ୍ୱକପର ଉଦ୍ଘାଟନୀ ସମାରୋହ ୬୦,୦୦୦ ଦର୍ଶକ କ୍ଷମତା ବିଶିଷ୍ଟ ଅଲ୍ ବାୟତ ଷ୍ଟାଡିୟମରେ ନଭେମ୍ବର ୨୧ରେ ଅପରାହ୍ନ ୧ଟାରେ ଅନୁଷ୍ଠିତ ହେବ। ସେହିପରି ପ୍ରତିଯୋଗିତାର ଫାଇନାଲ ଡିସେମ୍ବର ୧୮ରେ ୮୦,୦୦୦ ଦର୍ଶକ କ୍ଷମତା ବିଶିଷ୍ଟ ଲୁସାଲି ଷ୍ଟାଡିୟମରେ ସନ୍ଧ୍ୟା ୬ଟାରେ ଆରମ୍ଭ ହେବ। ରୁଷିଆରେ ଗତ ବିଶ୍ୱକପ ୩୨ଦିନ ବିଶିଷ୍ଟ ହୋଇଥିଲା। ମାତ୍ର ଆଗାମୀ ବିଶ୍ୱକପ ୨୮ ଦିନ ବିଶିଷ୍ଟ ହେବ। ୮ଟି ଭେନ୍ୟୁରେ ମ୍ୟାଚ ଗୁଡ଼ିକ ଖେଳାଯିବ। ଷ୍ଟାଡିୟମ ଗୁଡ଼ିକ ୩୦ ମାଇଲ ପରିଧି ମଧ୍ୟରେ ଥିବାରୁ ଦଳ ଏବଂ ଦର୍ଶକମାନଙ୍କୁ ପୁରା କାତାର ଭ୍ରମଣ କରିବାକୁ ପଡ଼ିବ ନାହିଁ। ଉଭୟ ସେମିଫାଇନାଲ ରାତି ୧୦ଟାରେ ଖେଳାଯିବ। ଯଦି ମ୍ୟାଚ ଅତିରିକ୍ତ ସମୟ, ଆହତ ସମସ୍ୟା ଯୋଗୁ ଦୀର୍ଘସମୟ ବାଧାପ୍ରାପ୍ତ ହେବା କିମ୍ବା ଭିଏଆର(ଭିଡିଓ ଆନାଲିଷ୍ଟ ରେଫରି) ଯୋଗୁ ବିଳମ୍ବ ହୁଏ ତେବେ ପରବର୍ତ୍ତୀ ଦିନ ଅନୁଷ୍ଠିତ ହେବ। ଗ୍ରୁପ ପର୍ଯାୟ ଏବଂ ପ୍ରି-କ୍ୱାର୍ଟର ଫାଇନାଲ ମଧ୍ୟରେ ବିଶ୍ରାମ ଦିବସ ରହିବନାହିଁ। ୨୦୨୨ ମାର୍ଚ୍ଚ କିମ୍ବା ଏପ୍ରିଲରେ ବିଶ୍ୱକପ ପାଇଁ ଡ୍ର ଉଠାଣ ହେବ ବୋଲି ଫିଫା ପକ୍ଷରୁ ପ୍ରକାଶ କରାଯାଇଛି।
