ଖଇରା, ୧୭।୪(ଡି.ଏନ.ଏ.): ବାଲେଶ୍ୱର ଜିଲା ଖଇରା ବ୍ଲକର ଅନ୍ୟତମ ପୁରାତନ ଗଡପୋଖରୀ ହାଇସ୍କୁଲ ପୂର୍ବରୁ ବୋର୍ଡ ପରୀକ୍ଷା କେନ୍ଦ୍ର ହୋଇଆସୁଥିବା ବେଳେ ଚଳିତ ବର୍ଷ ଏହାକୁ ଇଛାକୃତ ଭାବେ ତାଲିକାରୁ କାଟି ଦିଆଯାଇଛି। ଏହାକୁ ନେଇ ଅଭିଭାବକ ତଥା ସ୍ଥାନୀୟ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ା ପ୍ରତିବାଦରେ ଗ୍ରାମବାସୀ ଶନିବାର ସକାଳେ ଗେଟ ସମ୍ମୁଖରେ ଦୀର୍ଘସମୟ ଧରି ଧାରଣାରେ ବସି ରହିଥିଲେ। ଶିକ୍ଷା ବିଭାଗରେ ସମୀକ୍ଷା ବୈଠକ ପାଇଁ ପର୍ଯ୍ୟଟନମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ, ଜିଲା ଶିକ୍ଷାଧିକାରୀ ବିଷ୍ଣୁଚରଣ ସୂତାର ଓ ଅନ୍ୟାନ୍ୟ ଶିକ୍ଷାଧିକାରୀ ଖଇରା ଗୋଷ୍ଠୀ ଶିକ୍ଷାଧିକାରୀଙ୍କ କାର୍ଯ୍ୟାଳୟକୁ ଆସିଥିବା ଖବରପାଇ ସେମାନଙ୍କୁ ଭେଟି ଦାବି ଜଣାଇଥିଲେ। ମନ୍ତ୍ରୀ ଓ ଅଧିକାରୀ ଏହା ଉପରେ ପଦକ୍ଷେପ ନେବାକୁ ପ୍ରତିଶ୍ରୁତି ଦେବା ପରେ ସେମାନେ ଫେରିଯାଇଥିଲେ। ଧାରଣାରେ ସାମିଲ ଥିବା ପୁରାତନ ଛାତ୍ର ତଥା ବ୍ଲକ ଉପାଧ୍ୟକ୍ଷ ଗଜେନ୍ଦ୍ର ପରିଡା, ବିଜୟ ବାରିକ, ତପନ କୁମାର ବେହେରା, ଶତ୍ରୁଘ୍ନ ଦାସ, ସଞ୍ଜୟ ଦଳେଇଙ୍କ କହିବା ଅନୁଯାୟୀ ବିଦ୍ୟାଳୟ ୫ଟିରେ ଅନ୍ତର୍ଭୁକ୍ତ ହେବା ପରେ ଭିତ୍ତିଭୂମି ଯଥେଷ୍ଟ ସୁଦୃଢ ଅଛି ା ପିଲା ସଂଖ୍ୟା ୫୬ ଥିବା ବେଳେ ୩ କି.ମି. ଦୂର ମାତ୍ର ୩୬ ପିଲା ଥିବା ଏକ ବିଦ୍ୟାଳୟରେ ଗଡପୋଖରୀ ହାଇସ୍କୁଲକୁ ଟ୍ୟାଗ କରାଯିବା ଦୁର୍ଭାଗ୍ୟଜନକ। ଯଦି ଶିକ୍ଷାଧିକାରୀମାନେ ନିଷ୍ପତ୍ତିରେ ପରିବର୍ତ୍ତନ ନ କରନ୍ତି ତେବେ ବିଦ୍ୟାଳୟ ବନ୍ଦ ସହ ଶିକ୍ଷାଧିକାରୀଙ୍କ କାର୍ଯ୍ୟାଳୟକୁ ଅଚଳ କରାଯିବ ବୋଲି ଚେତାବନୀ ଦେଇଛନ୍ତି।
ଚଳିତବର୍ଷ ଖଇରା ବ୍ଲକରେ ପରୀକ୍ଷା କେନ୍ଦ୍ର ନିରୂପଣରେ ଶିକ୍ଷାବିଭାଗ ସ୍ବେଚ୍ଛାଚାରିତା ଦେଖାଇଥିବା ନେଇ ବିଭିନ୍ନ ବିଦ୍ୟାଳୟରେ ପଢୁଥିବା ଛାତ୍ରୀଛାତ୍ର ଓ ଅଭିଭାବକ ଅଭିଯୋଗ କରିଛନ୍ତି। ଗୋଟିଏପଟେ ଭିତ୍ତିଭୂମିର ସୁବିଧା ଥିଲେ ନିଜ ବିଦ୍ୟାଳୟରେ ପରୀକ୍ଷାକେନ୍ଦ୍ର କରିବାକୁ ରାଜ୍ୟ ସରକାର ଘୋଷଣା କରିଥିଲେ। ବହୁ ଅନୁଷ୍ଠାନକୁ ଯଥେଷ୍ଟ ଦୂରତାରେ ଥିବା କେନ୍ଦ୍ରରେ ଟ୍ୟାଗ କରିବାକୁ ନେଇ ଅସନ୍ତୋଷ କୁହୁଳିବାରେ ଲାଗିଛି ା ଖଇରା ବ୍ଲକ ସାରଡାଙ୍ଗ ପଞ୍ଚାୟତ ଶ୍ୟାମରାଈ ସଂସ୍କୃତ ବିଦ୍ୟାଳୟରେ ସବୁ ପ୍ରକାର ସୁବିଧା ଥିବା ସତ୍ତ୍ୱେ ୨୦କି.ମି. ଦୂର ତୁଡିଗଡିଆ ନୀଳାମ୍ବର ହାଇସ୍କୁଲ ପରୀକ୍ଷା କେନ୍ଦ୍ରକୁ ସ୍ଥାନାନ୍ତର କରାଯିବାକୁ ନେଇ ବିଭାଗର ସ୍ବଚ୍ଛତା ପ୍ରତି ପ୍ରଶ୍ନବାଚୀ ସୃଷ୍ଟି ହୋଇଛି ା ଅସହ୍ୟ ଗରମ ସାଙ୍ଗକୁ ଖର୍ଚ୍ଚାନ୍ତକୁ ଦୃଷ୍ଟିରେ ରଖି ନିଷ୍ପତ୍ତିରେ ପରିବର୍ତ୍ତନ କରି ପାଖ ପରୀକ୍ଷା କେନ୍ଦ୍ରକୁ ଆଣିବାକୁ ଦାବି ହୋଇଛି ା
