ପାରାଦୀପ ୨୪l୯(ସ୍ବ.ପ୍ର.): ପାରାଦୀପ ଗଡ ପଞ୍ଚାୟତ ଓ ପୌରପାଳିକା ଉପାନ୍ତରେ ରହିଛି ଚନକଣ ନାମକ ବଙ୍ଗୀୟ ବସ୍ତି। ଏହାର ଭୌଗଳିକ ସୀମା କହିଲେ ତୈଳ ବିଶୋଧନାଗାର ଓ ପିପିଏଲ୍ କାରଖାନାର ମଧ୍ୟସ୍ଥଳକୁ ବୁଝାଏ। ପୂର୍ବ ଭାଗରେ ବଙ୍ଗୋପସାଗର, ପଶ୍ଚିମରେ କଂସାରୀପାଟିଆ ନଦୀ ଅବସ୍ଥିତ। ଯାତାୟାତ ପାଇଁ ଏକମାତ୍ର ମାଧ୍ୟମ ହେଲା ପିପିଏଲ୍ କାରଖାନା ପାଚେରୀ କଡ଼ ମାଟିରାସ୍ତା। ଏହି ରାସ୍ତା ଅତିକ୍ରମ କଲାପରେ ଷଣ୍ଢକୁଦ ବସ୍ତି ଓ ପାରାଦୀପ ସହର ପଡ଼ିବ। ଏହି ବସ୍ତିର ଲୋକଙ୍କୁ ବିଭିନ୍ନ ସରକାରୀ ସୁବିଧା ପାଇଁ ୨୦ କିମି ଦୂରରେ ଥିବା ପାରାଦୀପ ଗଡ ପଞ୍ଚାୟତ କାର୍ଯ୍ୟାଳୟକୁ ଯିବାକୁ ପଡେ। ଏପରି ଅସୁବିଧା ବସ୍ତିବାସିନ୍ଦା ୨୦ ବର୍ଷ ହେବ ଭୋଗୁଥିବା କହିଛନ୍ତି। ଏଠାରେ ଅଙ୍ଗନଓ୍ବାଡି କେନ୍ଦ୍ର, ବିଦ୍ୟାଳୟ, ସ୍ବାସ୍ଥ୍ୟ ସେବା , ପାନୀୟ ଜଳ ଓ ବିଦୁତ୍ ସେବା ଆଦି ଏପର୍ଯ୍ୟନ୍ତ ମିଳିପାରି ନାହିଁ। ଏସବୁ ପାଇଁ ଚନକଣ ବାସିନ୍ଦା ଷଣ୍ଢକୁଦ ବସ୍ତି ଉପରେ ନିିର୍ଭରଶୀଳ। କାରଣ ଷଣ୍ଢକୁଦ ହେଉଛି ଚନକଣଠାରୁ ମାତ୍ର ୩ କିମି ଦୂର। କିନ୍ତୁ ଚନକଣ ବସ୍ତି ସରକାରୀ ଭାବେ ପାରାଦୀପଗଡ ପଞ୍ଚାୟତ ଅଧୀନରେ ରହିଛି। ଏହାର ରାଜସୱ ମୌଜା ନାମ ହେଉଛି ଉଦୟଚାନ୍ଦପୁର। ୨୦୧୧ ଜନଗଣନା ଅନୁଯାୟୀ ଏହି ବସ୍ତିର ଲୋକସଂଖ୍ୟା ୩୨୫ ଥିଲା। ୨୦୨୨ ପଞ୍ଚାୟତ ନିର୍ବାଚନରେ ଏଠାକାର ଭୋଟର ସଂଖ୍ୟ ୧୧୦ ବୋଲି ଜଣାପଡ଼ିଛି। ବସ୍ତିର ସମସ୍ତ ଜାଗା ସରକାରୀ ହୋଇଥିବାବେଳେ ପ୍ରାୟ ୫୦ ବର୍ଷ ତଳୁ ବଙ୍ଗୀୟ ସମ୍ପ୍ରଦାୟର ଲୋକେ ଏଠାରେ ବସବାସ କରୁଥିବା ଜଣାପଡ଼ିଛି। ସେତେବେଳେ ସେହି ଅଞ୍ଚଳ ଫାଙ୍କା ଥିବାରୁ ବିଲ ରାସ୍ତା ଦେଇ ପାରାଦୀପଗଡ଼ ଯାଉଥିଲେ। ୨୦୦୦ରେ ଉକ୍ତ ଜମି ତୈଳ ବିଶୋଧନାଗାର ପାଇଁ ଅଧିଗ୍ରହଣ ହୋଇଥିଲା। ପରେ କାରଖାନା ପ୍ରତିଷ୍ଠା ହୋଇଥିଲା। ତୈଳବିଶୋଧନାଗାର କର୍ତ୍ତୃପକ୍ଷ ପାଚେରୀ ବୁଲେଇ ଦେବାପରେ ସେମାନଙ୍କ ଯାତାୟାତ ବାଟ ବନ୍ଦ ହୋଇଗଲା ବୋଲି ବସ୍ତିର ତାହିର ଖାନ କୁହନ୍ତି। ଗଡ଼ପଞ୍ଚାୟତ ଅଧୀନରେ ଥିବାରୁ ଆମକୁ ଯାବତୀୟ ସମସ୍ୟା ହେଉଛି। ଭତ୍ତା କିମ୍ବା ରାଶନ ସାମଗ୍ରୀ ପାଇଁ ବହୁ ଦୂରକୁ ଯିବାକୁ ପଡୁଛି ବୋଲି ସେ କହିଛନ୍ତି ।ସରପଞ୍ଚ ସସ୍ମିତା ବେହେରା କୁହନ୍ତି, ଏଭଳି ପଞ୍ଚାୟତ ଓଡ଼ିଶାରେ ବୋଧହୁଏ ବିରଳ। କାରଣ ପଞ୍ଚାୟତ କାମ ପାଇଁ ପାରାଦୀପ ସହର ଅତିକ୍ରମ କରି ସେଠାକୁ ଯିବାକୁ ପଡ଼ୁଛି। ବସ୍ତିରେ ପଞ୍ଚାୟତ ତରଫରୁ ୨୦୧୨ରେ କଙ୍କ୍ରିଟ ରାସ୍ତା କରାଯାଇଥିଲା। ସେତେବେଳେ ଗାଡ଼ି ଯିବା ପାଇଁ ବାଟ ନ ଥିଲା। ପଞ୍ଚାୟତ ଅଫିସ ପାଖରୁ ସିମେଣ୍ଟ ଗୋଡି ଗୋଳେଇ ଟ୍ରାକ୍ଟର ଯୋଗେ ଷଣ୍ଢକୁଦ ନେଇଥିଲୁ। ପାରାଦୀପ ବନ୍ଦର ସହର ଅତିକ୍ରମ କରିବା ପାଇଁ ବନ୍ଦର ପ୍ରଶାସନ ସ୍ବିକୃତି ଦରକାର। ଏମିତି ଅନେକ ପ୍ରତିକୂଳ ଅବସ୍ଥାରେ କଙ୍କ୍ରିଟ ରାସ୍ତା କରାଯାଇଛି। ଦୁଇଟି ନଳକୂପ ଓ କ୍ଲବଘର ହୋଇଛି। ଆୟତନ କ୍ଷେତ୍ରରେ ଆମକୁ ବହୁତ ଅସୁବିଧା ହେଉଛି। ଦୂରତା, ପାରିପାର୍ଶ୍ୱିକ ସମସ୍ୟା ଯୋଗୁ ସେଠାରେ ସରକାରୀ ସୁବିଧା ଯୋଗାଇବା କଷ୍ଟକର ବୋଲି ସେ କହିଛନ୍ତି।
