ପାତ୍ରପୁର,୧୨ା୬(ଉମା ଚରଣ ନେପାକ): ଗଞ୍ଜାମ ଜିଲା ପାତ୍ରପୁର ବ୍ଲକ ଜିଲୁଣ୍ଡା ନିକଟସ୍ଥ ପାହାଡ ଅଞ୍ଚଳର ଏକ ଜମିରେ ଶୁକ୍ରବାର ବଜ୍ରପାତରେ ଗୋଟିଏ ଛେଳି ଓ ୧୯ ମେଣ୍ଢାଙ୍କ ମୃତ୍ୟୁ ହୋଇଛି। ଲଙ୍କା ଗ୍ରାମର ୫ ଜଣ ଲୋକ ଅପରାହ୍ନରେ ଜିଲୁଣ୍ଡା ପାହାଡ଼ ପାଦଦେଶରେ ଥିବା ବିଲକୁ ଛେଳି ଓ ମେଣ୍ଢାପଲ ଚରାଇବାକୁ ନେଇଥିଲେ। ଏହି ସମୟରେ ମେଘପବନ ଆସିବା ସହ ବଜ୍ରପାତ ଆରମ୍ଭ ହୋଇଯାଇଥିଲା। ବଜ୍ରପାତରେ ୨୦ ଛେଳିମେଣ୍ଢା ମରି ଯାଇଥିଲେ। ଲଙ୍କା ଗ୍ରାମର ଜି. ଗୋପୀନାଥଙ୍କ ଗୋଟିଏ ଛେଳି, ୪ ମେଣ୍ଢା, ଜି. କୁରେୟାଙ୍କ ୫ ମେଣ୍ଢା, ଡି. ଆରେୟାଙ୍କ ୫ ମେଣ୍ଢା, ଜି. ଲାଛମାୟାଙ୍କ ୪ ମେଣ୍ଢା ଓ ଜି. ଜନାର୍ଦ୍ଦନଙ୍କ ଗୋଟିଏ ମେଣ୍ଢା ମରିଥିବା ଜଣାପଡିଛି। ଖବରପାଇ ଅତିରିକ୍ତ ପ୍ରାଣୀ ଚିକିତ୍ସକ ସସ୍ମିତା ପଣ୍ଡା ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ଛେଳିମେଣ୍ଢାପାଳକ ମାନେ ଗରୀବ ଶ୍ରେଣୀର ହୋଇଥିବାରୁ ସରକାରୀ ସହାୟତା ଯୋଗାଇଦେବା ପାଇଁ ଦାବି ହେଉଛି।
