ପୋଟେରୁ, ୨୩।୧୦(ସୌରଭ ମଣ୍ଡଳ): ପଛୁଆ ଅଞ୍ଚଳର ବିକାଶ ଲାଗି ରାଜ୍ୟ ସରକାର ଅନେକ ପଦକ୍ଷେପ ନେଉଛନ୍ତି। ଯେଉଁଥିପାଇଁ ରାଜ୍ୟର ଅନେକ ଗ୍ରାମ ବିକାଶ ଦେଖିପାରିଛି। ତେବେ ରାଜ୍ୟ ସରକାର ପଛୁଆ ଅଞ୍ଚଳର ବିକାଶ ପାଇଁ ଯେତିକି ତତ୍ପରତା ଦେଖାଉଛନ୍ତି, କେତେକ ସ୍ଥାନରେ ସ୍ଥାନୀୟ ପ୍ରଶାସନ ସେତିକି ତତ୍ପରତା ଦେଖାଉ ନାହଁି, ଫଳରେ ଆଜି ମଧ୍ୟ ଅନେକ ଗ୍ରାମରେ ମୌଳିକ ସୁବିଧା ପହଞ୍ଚି ପାରୁନି। ଏପରି ଦେଖିବାକୁ ମିଳିଛି ମାଲକାନଗିରି ଜିଲା କାଲିମେଳା ବ୍ଲକ ଇତାଲଗୁଡ଼ା ଏବଂ ତମଗୁଡ଼ା ଗ୍ରାମରେ।
ସୂଚନା ଅନୁଯାୟୀ, ମାଲକାନଗିରି ଜିଲା କାଲିମେଳା ବ୍ଲକର ଦୁର୍ଗମ ଅଞ୍ଚଳରେ ରହୁଥିବା ୨ ଗ୍ରାମବାସୀ ଆଜି ମଧ୍ୟ ବିଭିନ୍ନ ମୌଳିକ ସୁବିଧାରୁ ବଞ୍ଚିତ ଥିବା ଅଭିଯୋଗ କରିଛନ୍ତି। କାଲିମେଳା ବ୍ଲକ ଚିତ୍ରାଙ୍ଗପଲ୍ଲୀ ପଞ୍ଚାୟତ ଅନ୍ତର୍ଗତ ଇତାଲଗୁଡ଼ା ଗ୍ରାମରେ ଅନୁସୂଚିତ ଜନଜାତି ସମ୍ପ୍ରଦାୟର ୨୫ ପରିବାର ବସବାସ କରୁଛନ୍ତି। ସେହିପରି ତମଗୁଡ଼ା ଗ୍ରାମରେ ପାଖାପାଖି ୩୦ ପରିବାର ବସବାସ କରନ୍ତି । ହେଲେ ଗ୍ରାମବାସୀଙ୍କ ଅଭିଯୋଗ ହେଉଛି, ଏହି ଗ୍ରାମରେ ପ୍ରଧାନମନ୍ତ୍ରୀ ଆବାସ, ବିଦ୍ୟାଳୟ, ଅଙ୍ଗନଓ୍ବାଡ଼ି କେନ୍ଦ୍ର ଓ ପ୍ରାଥମିକ ଶିକ୍ଷା ଅପହଞ୍ଚ। ଏହି ଯୋଜନାଗୁଡିକ ଲୋକଙ୍କ ମୌଳିକ ସୁବିଧା ତଥା ଅଧିକାର ଅଟେ, ତେବେ ଏହି ମୌଳିକ ଅଧିକାର ଓ ଯୋଜନାରୁ ଗ୍ରାମବାସୀ ସମ୍ପୂର୍ଣ୍ଣ ବଞ୍ଚିତ ଥିବା ଅଭିଯୋଗ କରିଛନ୍ତି। ଗ୍ରାମବାସୀଙ୍କ କହିବା ଅନୁଯାୟୀ, ଏହି ଗ୍ରାମରେ ଲୋକଙ୍କୁ ପକ୍କା ଘର ମିଳି ପାରୁ ନ ଥିବାରୁ ଅନେକ ଲୋକ ଆଜି ମଧ୍ୟ ଭଙ୍ଗା ଘରେ ରହୁଛନ୍ତି। ଏହା ବ୍ୟତୀତ ଶିକ୍ଷା ନିମନ୍ତେ ଅଞ୍ଚଳରେ ଅଙ୍ଗନଓ୍ବାଡି କେନ୍ଦ୍ର ଓ ବିଦ୍ୟାଳୟ ନ ଥିବାରୁ ପିଲାଏ ଶିକ୍ଷା ଅଧିକାରରୁ ବଞ୍ଚିତ ହେଉଛନ୍ତି।
ଏନେଇ ସ୍ଥାନୀୟ ଲୋକେ ବାରମ୍ବାର ବିଭିନ୍ନ ଜନ ପ୍ରତିନିଧି ଓ ଅଧିକାରୀଙ୍କ ଦୃଷ୍ଟିଆକର୍ଷଣ କରିଥିଲେ ସୁଦ୍ଧା କୌଣସି ସୁଫଳ ମିଳୁ ନାହି ବୋଲି ଅଭିଯୋଗ କରିଛନ୍ତି। ଏନେଇ କାଲିମେଳା ବିଡିଓ ପ୍ରଦୀପ କୁମାର କରଙ୍କ ଦୃଷ୍ଟି ଆକର୍ଷଣ କରିବାରୁ ଯଥାଶୀଘ୍ର ସେ ନିଜେ ଉକ୍ତ ଗ୍ରାମକୁ ଯାଇ ସମୀକ୍ଷା କରିବେ । ଲୋକଙ୍କ ପାଇଁ ସରକାରୀସ୍ତରରେ ଅନେକ ଯୋଜନା ରହିଛି, ତେଣୁ ଏହି ଅଞ୍ଚଳରେ ଯେଉଁ ସବୁ ସମସ୍ୟା ରହିଛି ସେଗୁଡିକୁ ଯଥା ଶୀଘ୍ର ସରକାରୀ ବ୍ୟବସ୍ଥା ଅନୁଯାୟୀ ସମାଧାନ କରାଯିବ ବୋଲି ସେ କହିଛନ୍ତି।
