ପୁରୁଷୋତ୍ତମପୁର,୧୭।୧୦(ଡି.ଏନ୍.ଏ.): ଗଞ୍ଜାମ ଜିଲା ପୁରୁଷୋତ୍ତମପୁର ବ୍ଲକ ଭାଟକୁମରଡ଼ା ଆଦର୍ଶ ବିଦ୍ୟାଳୟର ଜଣେ ମହିଳା ଏବଂ ଜଣେ ପୁରୁଷ କର୍ମଚାରୀଙ୍କ ମଧ୍ୟରେ ମଙ୍ଗଳବାର ଅପରାହ୍ନରେ ବ୍ରହ୍ମପୁର-ପୁରୁଷୋତ୍ତମପୁର ମୁଖ୍ୟ ରାସ୍ତା ବାଇଧର ମନ୍ଦିର ନିକଟରେ ହାତାହାତି ହୋଇଛି। ଏହା ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ହାତାହାତି ପରେ ମହିଳା ଜଣକ କାନ୍ଦୁଥିବା ବେଳେ ରାସ୍ତାରେ ଯାଉଥିବା ଲୋକେ ଦେଖି ରୁଣ୍ଡ ହୋଇଯାଇଥିଲେ। ଏହି ଖବର ପାଇ ମହିଳାଙ୍କ ସ୍ବାମୀ ଓ ତାଙ୍କ ସମ୍ପର୍କୀୟ ଘଟଣା ସ୍ଥଳରେ ପହଞ୍ଚତ୍ଥିଲେ। ସେତିକିବେଳେ ହତ୍ୟା ଧମକ ମଧ୍ୟ ଦିଆଯାଇଥିବା ଭିଡିଓରେ ଶୁଣିବାକୁ ମିଳୁଛି। ଅନ୍ୟପକ୍ଷେ ଘଟଣାସ୍ଥଳରେ କିଛି ଅଘଟଣ ହେବା ଆଶଙ୍କା କରି ରାସ୍ତାରେ ଯାଉଥିବା କେତେଜଣ ବ୍ୟକ୍ତି ପୁରୁଷୋତ୍ତମପୁର ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଥାନାକୁ ଆଣିଥିଲା। ଉଭୟେ ଥାନାରେ ସାମାନ୍ୟ କଥାକୁ ନେଇ ବଚସା ହୋଇଥିବାର ସ୍ବୀକାର କରି ପରସ୍ପର ମଧ୍ୟରେ ରାଜିନାମା ହୋଇ ଘରକୁ ଯାଇଥିଲେ।
ଏପରିକି ଭିଡିଓରେ ମହିଳାଙ୍କ ସ୍ବାମୀଙ୍କ କଥାରୁ ଜଣାପଡୁଛି, ପୂର୍ବରୁ ମଧ୍ୟ ଏପରି ଗଣ୍ଡଗୋଳ ଘଟିଛି। କେଉଁ କାରଣରୁ ୨ କର୍ମଚାରୀଙ୍କ ମଧ୍ୟରେ ଏଭଳି ଘଟିଛି ତାହାର ପ୍ରକୃତ ଘଟଣା ଜଣାପଡି ନ ଥିବା ବେଳେ ବିଦ୍ୟାଳୟର କିଛି କାର୍ଯ୍ୟକୁ ନେଇ ଘଟିଥିବା ଚର୍ଚ୍ଚା ଜୋର ଧରିଛି। ଏହାକୁ ବିଦ୍ୟାଳୟ କର୍ତ୍ତୃପକ୍ଷ ଗୁରୁତର ସହ ନେଇ ପଦକ୍ଷେପ ଗ୍ରହଣ ନ କଲେ ଆଗାମୀ ଦିନରେ ବିଦ୍ୟାଳୟ ପରିସରରେ ମଧ୍ୟ ଏଭଳି କାଣ୍ଡ ଘଟିବା ଆଶଙ୍କା ରହିଛି । ଏହାର ପ୍ରଭାବ ଛାତ୍ରୀଛାତ୍ରଙ୍କ ଉପରେ ପଡିବ ବୋଲି କେତେଜଣ ଅଭିଭାବକ କହିଛନ୍ତି। ଏହାକୁ ନେଇ ବିଦ୍ୟାଳୟର ଅଧ୍ୟକ୍ଷଙ୍କ ସହ ଯୋଗାଯୋଗ କରାଯିବାରେ ଏହି ଘଟଣା ବାହାରେ ଘଟିଛି। ତେଣୁ ସେ ଜାଣିନାହାନ୍ତି। ଉଭୟ କର୍ମଚାରୀ କଣ୍ଟ୍ରାଚୁଆଲ ଭାବେ ରହିଥିବାର କହିଛନ୍ତି। ଏହାର ତଦନ୍ତ କରି ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବେ ବୋଲି ସେ କହିଛନ୍ତି।
