ଭୁବନେଶ୍ୱର,୧୭।୧୦(ବ୍ୟୁରୋ): ଅସଲି ସୁନା ଅଳଙ୍କାର ଦେଖାଉଥିଲେ। ହେଲେ କୌଶଳକ୍ରମେ ନକଲି ଦେଇ ଠକୁଥିଲେ। ଏଭଳି ଠକେଇ କରୁଥିବା ଏକ ଗ୍ୟାଙ୍ଗ୍ର ୨ଜଣଙ୍କୁ ଗିରଫ କରିଛି ଶହୀଦନଗର ଥାନା ପୋଲିସ। ସେମାନେ ହେଲେ ଛତିଶଗଡ଼ର ମୋହନ ସୁଲାଙ୍କୀ(୫୦) ଓ ଘନଶ୍ୟାମ ସୁଲାଙ୍କୀ(୫୦)। ସେମାନଙ୍କଠାରୁ ୨ କେଜି ନକଲି ସୁନା ଅଳଙ୍କାର ଜବତ ହୋଇଛି। ୫ ହଜାର ଟଙ୍କାର ଅସଲି ସୁନା ଦେଖାଇ ନକଲି ସୁନାକୁ ୫୦ଲକ୍ଷ ଟଙ୍କାରେ ବିକ୍ରି ଉଦ୍ୟମ କରୁଥିବାବେଳେ ପୋଲିସ ସେମାନଙ୍କୁ ଧରିଥିଲା। ସୂଚନା ମୁତାବକ, ମୋହନ ଓ ଘନଶ୍ୟାମ ନକଲି ସୁନା ବିକ୍ରି କରିବାକୁ ବିଭିନ୍ନ ବସ୍ ଷ୍ଟପ ଓ ରେଳ ଷ୍ଟେଶନରେ ଘୂରି ବୁଲି ଲୋକଙ୍କୁ ଟାର୍ଗେଟ କରୁଥିଲେ। ପ୍ରଥମେ ଅସଲି ସୁନାର ସାମ୍ପଲ ଦେଇ ଲୋକଙ୍କ ମନରେ ବିଶ୍ୱାସ ଜନ୍ମାଉଥିଲେ। ଏପରି କି ବଜାର ମୂଲ୍ୟଠାରୁ ଅଧା ଦାମ୍ରେ ସୁନା ଦେବେ ବୋଲି କହୁଥିଲେ। ଯିଏ ଲୋଭରେ ପଡି କିଣିବାକୁ ଚାହୁଁଥିଲେ, ଦୁଇ ଠକ ସେମାନଙ୍କଠାରୁ ଟଙ୍କା ପାଇବା ପରେ କୌଶଳକ୍ରମେ ନକଳି ସୁନା ଧରାଇ ଚମ୍ପଟ ମାରୁଥିଲେ। ଏମିତି ଢ଼ଙ୍ଗରେ ଏହି ଦୁଇଜଣ ଜୟଦେବବିହାର ବସ୍ ଷ୍ଟପ୍ରେ ଜଣେ ବ୍ୟବସାୟୀଙ୍କୁ ୫୦ ଲକ୍ଷ ଟଙ୍କାର ସୁନାକୁ ୧୫ ଲକ୍ଷରେ ବିକ୍ରି କରିବେ ବୋଲି କହି ଫସାଉଥିଲେ। ଖବର ପାଇ ଶହୀଦନଗର ଥାନା ପୋଲିସ ସେଠାରେ ଚଢ଼ାଉ କରି ୨ ଅଭିଯୁକ୍ତଙ୍କୁ ଥାନାକୁ ଆଣିଥିଲା। ପୋଲିସ ସେମାନଙ୍କଠାରୁ ୨ କିଲୋ ଓଜନର ନକଲି ସୁନା ଓ ୫ ହଜାର ଟଙ୍କାର ଅସଲି ସୁନା ସମେତ ୨ଟି ମୋବାଇଲ ଫୋନ୍ ଜବତ କରିଥିଲା। ଆଗକୁ ଧନତେରାସ ଥିବାରୁ ଲୋକଙ୍କୁ ଠକିବା ଲାଗି ଏମାନେ ଭୁବନେଶ୍ୱରରେ ଡ଼େରା ପକାଇଥିବା କହିଥିଲେ। ଏମାନେ ଏପରି ଆଉ କାହାକୁ ଠକିଛନ୍ତି ଓ ତାଙ୍କ ର଼୍ୟାକେଟରେ କେଉଁମାନେ ଅଛନ୍ତି ସେନେଇ ପୋଲିସ ଅଧିକ ଖୋଳତାଡ଼ ଚଳାଇଛି।
