ବ୍ରହ୍ମପୁର ଅଫିସ,୨୦।୮: ବ୍ରହ୍ମପୁର ମହାନଗର ନିଗମ (ବିଏମ୍ସି) ପକ୍ଷରୁ ସହରର ୫ଟି ସ୍ଥାନରେ ସ୍ମାର୍ଟ ରାସ୍ତା କାର୍ଯ୍ୟ ଚାଲିଛି। କିନ୍ତୁ ଏଥି ନିମନ୍ତେ ଅବଧି ସମୟ ଶେଷ ହୋଇଥିବା ସତ୍ତ୍ୱେ ଏ ଯାଏ କୌଣସି ଗୋଟିଏ ବି ରାସ୍ତା କାର୍ଯ୍ୟ ଶେଷ ହୋଇ ନାହିଁ। ଏଣୁ କାର୍ଯ୍ୟ ସମ୍ପୂର୍ଣ୍ଣ ନିମନ୍ତେ ୨ ମାସ ଅବଧି ବୃଦ୍ଧି କରାଯାଇଥିବା ସେ କହିଛନ୍ତି।
ଅନ୍ୟପଟେ କେତେବେଳେ ରାସ୍ତା କାର୍ଯ୍ୟ ଚାଲୁ ରହିଥିବା ବେଳେ ଆଉ କେଉଁଠାରେ ବନ୍ଦ ହୋଇଛି। ଫଳରେ ସହରବାସୀ ଯାତାୟାତରେ ସମସ୍ୟାର ସମ୍ମୁଖୀନ ହେଉଛନ୍ତି। ଫଳରେ ନିଜର ଗନ୍ତବ୍ୟ ସ୍ଥଳରେ ପହଞ୍ଚିବା ପାଇଁ ବିଭିନ୍ନ ଗଳିକନ୍ଦି ରାସ୍ତା ଦେଇ ଯିବାକୁ ପଡୁଛି। ଦୀର୍ଘ ଦିନ ଧରି କାର୍ଯ୍ୟ ଲାଗି ରହିଥିବାରୁ ଟ୍ରାଫିକ ସମସ୍ୟା ଉପୁଜୁଛି। ତେବେ ସହରରେ ୫ଟି ସ୍ଥାନରେ ନିର୍ମାଣାଧୀନ ରାସ୍ତା ପ୍ରଶସ୍ତୀକରଣ ବଦଳରେ ସଙ୍କୁଚିତ ହୋଇଛି। ଆଗାମୀ ଦିନରେ ଯାନବାହନ ଯାତାୟାତରେ ସମସ୍ୟା ସୃଷ୍ଟି କରିବ ବୋଲି ମତ ପ୍ରକାଶ ପାଇଛି।
ସୂଚନାଯୋଗ୍ୟ, ବିଏମ୍ସି ପକ୍ଷରୁ ୩ କୋଟି ୫୩ ଲକ୍ଷ ୪୩ ହଜାର ୧୩୫ ଟଙ୍କା ବ୍ୟୟରେ ସୁବାରାଓ ଛକଠାରୁ ଷ୍ଟେଟ ବ୍ୟାଙ୍କ ଓ ସେଣ୍ଟ ଭିନ୍ସେଣ୍ଟ୍ ସ୍କୁଲ ସ୍ମାର୍ଟ ରାସ୍ତା ନିର୍ମାଣ ଚାଲିଛି। ଏହାର ଲମ୍ବ ୬୦୦ ମିଟର। ସେହିଭଳି ୩ କୋଟି ୮୦ ଲକ୍ଷ ୯୦ ହଜାର ୯୦୭ ଟଙ୍କା ବ୍ୟୟରେ ୭୩୦ ମିଟର ବିଶିଷ୍ଟ ଅନ୍ନପୂର୍ଣ୍ଣା ମାର୍କେଟଠାରୁ ବିିଶାଲ ମେଗା ମାର୍ଟ ରାସ୍ତା, ୨ କୋଟି ୨୬ ଲକ୍ଷ ୫୯ ହଜାର ୮୦୦ ଟଙ୍କା ବ୍ୟୟରେ ୫୫୫ ମିଟର ରାସ୍ତା, ୩ କୋଟି ୫ ଲକ୍ଷ ୩୧ ହଜାର ଟଙ୍କା ବ୍ୟୟରେ ୫୨୦ ମିଟର ରାସ୍ତା, ୨ କୋଟି ୧୦ ଲକ୍ଷ ୭୯ ହଜାର ଟଙ୍କା ବ୍ୟୟରେ ୫୧୦ ମିଟର ବିଶିଷ୍ଟ ସ୍ମାର୍ଟ ରାସ୍ତା ନିର୍ମାଣାଧୀନ ରହିଛି। ଏହି ସବୁରେ ପେଭର, ଫୁଟପାଥ ପେଭର ବ୍ଲକ, ସାଇକେଲ ଟ୍ରାକ୍, ରାସ୍ତା ଦୁଇ ପାର୍ଶ୍ୱରେ ଆରସିସି ଡ୍ରେନ, ପାର୍କିଂ ଓ ସବୁଜୀକରଣ, ୱାଲ ପେଣ୍ଟିଂ, ୧ମିଟର ବିଶିଷ୍ଟ ୱାକିଂ ଟ୍ରାକ, ୨ଟି କଲଭର୍ଟ ଓ ଡ୍ରେନେଜରେ ଘୋଡଣିର ବ୍ୟବସ୍ଥା ରହିବ। ରାସ୍ତା କାର୍ଯ୍ୟ ନିମନ୍ତେ ୨୦୨୧ ଡିସେମ୍ବର ୨୬ରେ ଶିଳାନ୍ୟାସ କରାଯାଇଥିଲା। ଏହି ସମସ୍ତ କାର୍ଯ୍ୟ ସରିବା ପାଇଁ ୩ ମାସ ଅବଧି ରଖାଯାଇଥିଲା। କିନ୍ତୁ ଧାର୍ଯ୍ୟ ସମୟ ମଧ୍ୟରେ ସରିଲା ନାହିଁ। ଫଳରେ ବିଏମ୍ସି ପକ୍ଷରୁ ଜୁନ ୧୫ ଯାଏ ସମୟ ଅବଧି ବୃଦ୍ଧି କରାଯାଇଥିଲା। ଅବଧି ସମୟ ଶେଷ ହୋଇ ୧ ମାସରୁ ଊର୍ଦ୍ଧ୍ୱ ସମୟ ବିତି ଥିଲେ ମଧ୍ୟ ବର୍ତ୍ତମାନ ସୁଦ୍ଧା ସମ୍ପୂର୍ଣ୍ଣ ହୋଇ ନ ଥିବା ଦେଖିବାକୁ ମିଳିଛି। ତେବେ ସ୍ମାର୍ଟ ରାସ୍ତା ନିର୍ମାଣ କାର୍ଯ୍ୟ ଶେଷ ହେବା ପାଇଁ ସମୟ ସୀମା ୨ ମାସ ବୃଦ୍ଧି କରାଯାଇଥିବା ସୂଚନା ମିଳିଛି। ଆସନ୍ତା ଅକ୍ଟୋବରରେ ଶେଷ ହେବ ବୋଲି ବିଏମ୍ସି ପକ୍ଷରୁ ଆଶା ପୋଷଣ କରାଯାଇଛି।
ଏ ନେଇ କନିଷ୍ଠ ଯନ୍ତ୍ରୀ ତପନ କୁମାର ରୟଙ୍କ ସହ ଯୋଗାଯୋଗ ବେଳେ କହିଛନ୍ତି, ରାସ୍ତା ୨ ପାର୍ଶ୍ୱରେ ପାର୍କିଂ ସୁବିଧା ସହ ଡ୍ରେନେଜ୍ ବ୍ୟବସ୍ଥା କରାଯାଇଛି। ଯାହାଦ୍ୱାରା ସହରବାସୀ ଉପକୃତ ହୋଇପାରିବେ। ରାସ୍ତା ସଙ୍କୁଚିତ ହୋଇ ନାହିଁ। ସ୍ମାର୍ଟ ରାସ୍ତା ନିମନ୍ତେ ଉଦ୍ଦିଷ୍ଟ ସମସ୍ତ ପଦକ୍ଷେପ ଗ୍ରହଣ କରାଯାଇଛି। ସର୍ବସାଧାରଣ ଯାତାୟାତ ନିମନ୍ତେ ସୁଗମ ରାସ୍ତା ରହିଛି। ଲଗାଣ ବର୍ଷା ଓ ବିଭିନ୍ନ ସମସ୍ୟାରୁ କାର୍ଯ୍ୟରେ ବାଧା ଉପୁଜୁଛି। ଏଣୁ ରାସ୍ତା କାର୍ଯ୍ୟ ସମ୍ପୂର୍ଣ୍ଣ ନିମନ୍ତେ ୨ ମାସ ଅବଧି ବୃଦ୍ଧି କରାଯାଇଥିବା ସେ କହିଛନ୍ତି।
