ହିଞ୍ଜିଳିକାଟୁ,୨୯।୧୦(ଡି.ଏନ୍.ଏ.): କମ୍ ଟଙ୍କାରେ ବ୍ରହ୍ମପୁରର ଏକ ଇଞ୍ଜିନିୟରିଂ କଲେଜରେ ଆଡମିଶନ ଲୋଭ ଦେଖାଇ ଠକି ନେଇଥିଲେ ୨ ଲକ୍ଷ ୩୯ ହଜାର ଟଙ୍କା। ଶେଷରେ ଅଭିଯୁକ୍ତ ମହିଳାଙ୍କୁ ଗିରଫ କରିଛି ପୋଲିସ। ସେ ହେଲେ ଝାଡ଼ଖଣ୍ଡ ପୂର୍ବ ସିଂହଭୂମି ଜିଲା ବିର୍ଶା ନଗର ଅଞ୍ଚଳର ମୌସୁମୀ ସାଗର। ମହିଳାଙ୍କଠାରୁ ଏକ ମୋବାଇଲ, ଆଧାର କାର୍ଡ଼ ଓ ଠକେଇ ଅର୍ଥ ଟ୍ରାନ୍ସଫର ହୋଇଥିବା ବ୍ୟାଙ୍କ ପାସ୍ବୁକକୁ ପୋଲିସ ଜବତ କରିଛି। ତାଙ୍କୁ ଝାଡ଼ଖଣ୍ଡରୁ ଗିରଫ କରି ଶନିବାର ପୋଲିସ କୋର୍ଟ ଚାଲାଣ କରିଛି।
ପ୍ରକାଶ ଯେ, ହିଞ୍ଜିଳିକାଟୁୁ ପୌରାଞ୍ଚଳ ବଇଁଚବଣିଆ ଚୈତନ୍ୟ ମାର୍ଗ ବାସିନ୍ଦା ବସନ୍ତ ପୋଲାଇଙ୍କ ପୁଅ ପଦ୍ମ ଲୋଚନ ପୋଲାଇ ଯୁକ୍ତ-୨ ପାସ୍ ହେବା ପରେ ବ୍ରହ୍ମପୁର କଲେଜରେ ବିଟେକ୍ କମ୍ପ୍ୟୁଟର ଇଂଜିନିୟରିଂ ପାଠ ପଢ଼ିବା ପାଇଁ ଆଗ୍ରହ ପ୍ରକାଶ କରିଥିଲେ। ଏହି ସମୟରେ ମୋବାଇଲରେ ହ୍ବାଟ୍ସଅପ ଦ୍ୱାରା ଲଞ୍ଚପାଡ଼ କ୍ୟାରିୟର କନ୍ସଲଟାନ୍ସି ରାଉଲକେଲା ଦ୍ୱାରା ପ୍ରକାଶିତ ହେବା ଭଳି ଏକ ବିଜ୍ଞାପନ ଦ୍ୱାରା ପ୍ରଭାବିତ ହୋଇଥିଲେ। ବିଜ୍ଞାପନରେ ପ୍ରଦାନ ହୋଇଥିବା ଫୋନରେ ସେ ଯୋଗାଯୋଗ କରିଥିଲେ। ଏକ ମହିଳା ନିଜକୁ ଉକ୍ତ କନସାଲଟାନ୍ସିର କର୍ମଚାରୀ ମୌସୁମୀ ଭାବେ ପରିଚୟ ଦେଇ ବ୍ରହ୍ମପୁର ନିଷ୍ଟ କଲେଜରେ ପଦ୍ମ ଲୋଚନଙ୍କୁ ପଛୁଆ ବର୍ଗ ସଂରକ୍ଷଣ କୋଟାରେ କମ ଡୋନେସନରେ ସିଟ୍ କରାଇଦେବାକୁ କହିଥିଲେ। ମହିଳାଙ୍କ କହିବା ପ୍ରକାରେ ବସନ୍ତ ଗତ ଅଗଷ୍ଟ ମାସରେ ଝାଡ଼ଖଣ୍ଡ ସ୍ଥିତ ବିସ୍ତୁପୁର ଏସ୍ବିଆଇ ଶାଖାର ଏକ ଏକାଉଣ୍ଟକୁ ନିଜ ଆକାଉଣ୍ଟରୁ ୮ କିସ୍ତିରେ ୨,୩୯,୬୫୨ଟଙ୍କା ଟ୍ରାନ୍ସଫର କରିଥିଲେ। ଟଙ୍କା ଟ୍ରାନ୍ସଫର ପରେ ବସନ୍ତ ଓ ତାଙ୍କ ପୁଅ ପଦ୍ମ ଲୋଚନ ନିଷ୍ଟ କଲେଜରେ ଆଡ଼ମିଶନ ନେଇ ବାରମ୍ବାର ଉକ୍ତ ମହିଳାଙ୍କୁ ଯୋଗଯୋଗ କରିଥିଲେ ମଧ୍ୟ ମହିଳାଜଣଙ୍କ ଏଥିରେ ବିଳମ୍ବ କରିଥିଲେ। କଲେଜର ଆଡ଼ମିଶନ ତାରିଖ ଅତିକ୍ରାନ୍ତ ପରେ ଉକ୍ତ ମହିଳା ଜଣକ ବସନ୍ତଙ୍କ ଦ୍ୱାରା ଟ୍ରାନ୍ସଫର କରାଯାଇଥିବା ଟଙ୍କା ଫେରାଇ ନ ଥିଲେ। ଏଥିନେଇ ହିଞ୍ଜିଳି ଥାନାରେ ଅଭିଯୋଗ ହୋଇଥିଲା। ପୋଲିସ ମାମଲାର ତଦନ୍ତ କରି ମହିଳାଙ୍କୁ ଗିରଫ କରିବାରେ ସଫଳ ହୋଇଛି।
