ବାରିପଦା ଅଫିସ,୧୮ା୧: ପରିବେଶକୁ ସ୍ବଚ୍ଛ ଓ ସୁନ୍ଦର ରଖିବା ପାଇଁ ଦିନକୁ ୨ ଘଣ୍ଟା ପରିଶ୍ରମ କରୁଥିବା ବ୍ୟକ୍ତି ସମାଜରେ ଖୁବ୍ କମ୍ ଦେଖିବାକୁ ମିିଳନ୍ତି। ସ୍ବଚ୍ଛତାର ବାର୍ତ୍ତାକୁ ଗାଁରୁ ସହର ପର୍ଯ୍ୟନ୍ତ ପହଞ୍ଚାଇବା ନିମନ୍ତେ ଦୀର୍ଘ ୨୦ ବର୍ଷ ହେଲା ନିରନ୍ତର ପ୍ରୟାସ ଜାରି ରହିଥିବା ଏଭଳି ଜଣେ ବ୍ୟକ୍ତି ହେଲେ ମୟୂରଭଞ୍ଜ ଜିଲା ସାରସକଣା ଅଞ୍ଚଳର ରବୀନ୍ଦ୍ର ନାଥ ସାହୁ। ବୟସ ୬୦ ହେଲେ ମଧ୍ୟ ସୁସ୍ଥ ସମାଜ ଗଠନ ଲାଗି ଯୁବ ସମାଜକୁ ସେ ପ୍ରେରଣା ଦେଇ ଆସୁଛନ୍ତି। ପେଶାରେ ବ୍ୟବସାୟୀ ହୋଇଥିଲେ ମଧ୍ୟ ନିଶା ତାଙ୍କର ପରିବେଶ ସୁରକ୍ଷା ।
ରାତି ପାହିବା କ୍ଷଣି ହସହସ ମୁହଁରେ ହାତରେ ଝାଡୁ ଓ କିଛି ସଫେଇ ସାମଗ୍ରୀ ଧରି ବାହାରି ପଡ଼ନ୍ତି। ଗାନ୍ଧିଜୀଙ୍କ ଆଦର୍ଶରେ ଅନୁପ୍ରାଣିତ ହୋଇ ଅଞ୍ଚଳର ପରିବେଶ ସୁରକ୍ଷା କାମରେ ଲାଗି ପଡ଼ନ୍ତି। ୨୦୦୨ରେ ପୁରୀ ଗଜପତି ମହାରାଜାଙ୍କ ଆଗମନକୁ ସ୍ବାଗତ ଜଣାଇବା ପାଇଁ ସାରସକଣା ସ୍ଥିତ ସାରସକ୍ଷେତ୍ରକୁ ସଫା କରିବା ପାଇଁ କିଛି ଯୁବସାଥୀଙ୍କ ସହଯୋଗ ଲୋଡ଼ିଥିଲେ। ଏଥିରେ ସଫଳତା ହାସଲ କରି ଏହାକୁ ବଜାୟ ରଖିଥିଲେ। ଲୋକଙ୍କ ଟାହିଟାପରା ଓ ବ୍ୟଙ୍ଗ୍ୟାତ୍ମକ କଥାକୁ ଭ୍ରୁକ୍ଷେପ ନ କରି ଦୀର୍ଘ ବର୍ଷ ଧରି ଏଭଳି କାର୍ଯ୍ୟ ସେ କରିଆସୁଛନ୍ତି। ସମାଜ ପ୍ରତି ପ୍ରତିଦିନ ୨ଘଣ୍ଟା ସମୟ ଦେବାକୁ ଜନସାଧାରଣଙ୍କୁ ପରାମର୍ଶ ଦେଇ ଆସୁଛନ୍ତି। ସାରସକଣା ବ୍ଲକ କାର୍ଯ୍ୟାଳୟ, ପୋଖରୀଘାଟ, ନଳକୂଅ, ବଜାର, ଜଗନ୍ନାଥ ମନ୍ଦିର ସାମ୍ନା, ମେଡିକାଲ, ବିଭିନ୍ନ ଶିକ୍ଷାନୁଷ୍ଠାନ, ସରକାରୀ କାର୍ଯ୍ୟାଳୟ ଏବଂ ଆଖପାଖ ଗ୍ରାମଗୁଡ଼ିକୁ ସ୍ବଚ୍ଛ ରଖିବା ପାଇଁ ଚେଷ୍ଟା ଚଳାଇଛନ୍ତି। ସ୍ଥାନୀୟ ସ୍ବେଚ୍ଛାସେବୀଙ୍କୁ ନେଇ ସେ ଏଭଳି କାର୍ଯ୍ୟକ୍ରମ ଚାଲୁ ରଖିଛନ୍ତି। ୨୦୧୯ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବାରିପଦା ଗସ୍ତରେ ଆସିଥିବା ବେଳେ ଜଣେ ସଫଳ ସମାଜସେବୀ ଭାବେ ତାଙ୍କୁ ସମ୍ମାନିତ କରିଥିଲେ। ଏଥି ସହିତ ସ୍ଥାନୀୟ ଅଞ୍ଚଳର ଜଗନ୍ନାଥ ସଂସ୍କୃତି ମଞ୍ଚ, ଓଡ଼ିଶା ସମାଜସେବୀ ମହାସଂଘ ଏବଂ ବିଭିନ୍ନ ସଙ୍ଗଠନ ପକ୍ଷରୁ ସେ ସମ୍ବର୍ଦ୍ଧିତ ହୋଇଛନ୍ତି। ବିଶେଷ କରି ଛାତ୍ର ଓ ଯୁବ ସମାଜ ଜାଗ୍ରତ ହେଲେ ପରିବେଶ ପ୍ରଦୂଷଣ ରୋକାଯିବା ସହିତ ଏକ ସୁସ୍ଥ ସମାଜ ଗଠନ ହୋଇପାରିବ ବୋଲି ସେ ମତବ୍ୟକ୍ତ କରିଛନ୍ତି ା
