ନାଉଗାଁ,୧।୨(ସ୍ବ.ପ୍ର.): ନାଉଗାଁ ତହସିଲ କାର୍ଯ୍ୟାଳୟ ସମ୍ମୁଖରେ ୨ ରାଜନୈତିକ ଦଳର କର୍ମୀ ଭିନ୍ନ ଭିନ୍ନ ସମସ୍ୟାକୁ ନେଇ ମଙ୍ଗଳବାର ଧାରଣା ଓ ଅନଶନ କରିବାକୁ ଲିଖିତ ଭାବେ ଜଣାଇଥିଲେ। ଏହି ସମୟରେ ଆଇନ ଶୃଙ୍ଖଳା ପରିସ୍ଥିତି ଉପୁଜିବାର ଆଶଙ୍କା କରି ତହସିଲ ପ୍ରଶାସନ ପକ୍ଷରୁ
କାର୍ଯ୍ୟାଳୟର ୨୦୦ ମିଟର ପରିଧି ମଧ୍ୟରେ୧୪୪ ଧାରା ଜାରି କରାଯାଇଥିଲା। ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଏହା ବଳବତ୍ତର ରହିବ ବୋଲି ଏନେଇ ଜାରି ନୋଟିସରେ ଉଲ୍ଲେଖ କରାଯାଇଥିଲା। ଫଳରେ ଉଭୟ ରାଜନୈତିକ ଦଳ ପକ୍ଷରୁ ଧାରଣା ଦିଆଯାଇ ନଥିବା ଜଣାପଡିଛି।
ସୂଚନାଯୋଗ୍ୟ, ଜାମୁଗଁା ଉପସ୍ବାସ୍ଥ୍ୟ କେନ୍ଦ୍ର ନିର୍ମାଣ ପାଇଁ ପୂର୍ବରୁ ଖାତା ନଂ. ୧୪୬୫ ଓ ପ୍ଳଟ ନଂ. ୩୫୩୨ରେ ସ୍ଥାନ ଚିହ୍ନଟ କରାଯାଇଥିଲା। ପୂର୍ବରୁ ଏହି ସ୍ଥାନରେ ପୁରୁଣା ଜାମୁଗଁା ଉପସ୍ବାସ୍ଥ୍ୟ କେନ୍ଦ୍ର ରହିଛି। ଏନେଇ ତହସିଲ ପକ୍ଷରୁ ଉକ୍ତ ପ୍ଲଟରେ ଥ୍ତ୍ବା ଗଛଗୁଡିକୁ କାଟିବା ପାଇଁ ଉଦ୍ୟମ କରାଯାଇଥିଲା। ମାତ୍ର ସ୍ଥାନୀୟ ସରପଞ୍ଚ ଶୁଭ୍ରସ୍ମୃତି ପରିଡା ଏହାକୁ ବିରୋଧ କରିବା ସହ ସ୍ଥାନ ପରିବର୍ତ୍ତନ ପାଇଁ ଜଗତସିଂହପୁର ଜିଲା ଗ୍ରାମ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦ୍ଦେଶକ ଡା.ରୁଦ୍ର ନାରାୟଣ ଦାଶଙ୍କୁ ଲିଖିତ ଜଣାଇଥିଲେ। ସେ ଅଭିଯୋଗରେ ଦର୍ଶାଇଥିଲେ ଯେ, ଜାମୁଗଁାର ପୁରୁଣା ସ୍ବାସ୍ଥ୍ୟ କେନ୍ଦ୍ର ଥିବା ସ୍ଥାନଟି ଜନ ଗହଳିପୂର୍ଣ୍ଣ ଅଞ୍ଚଳରେ ରହିଛି। ସେଠାରେ ନୂତନ ଉପସ୍ବାସ୍ଥ୍ୟକେନ୍ଦ୍ର ନିର୍ମାଣ କରାଗଲେ ଆମ୍ବୁଲାନ୍ସ ଯାତାୟତ ସମୟରେ ଅସୁବିଧା ହେବ। ସେହିପରି ଉକ୍ତ ପ୍ଳଟରେ ଥିବା ବଡ ଗଛ ଗୁଡିକୁ କାଟିବା ଦ୍ୱାରା ଗଁା ପରିବେଶ ନଷ୍ଟ ହେବ। ତେଣୁ ଗ୍ରାମରେ ଥିବା ଖାତା ନଂ. ୧୪୬୫ ପ୍ଳଟ ନଂ. ୩୫୯୮ ରେ ଏହି ଉପସ୍ବାସ୍ଥ୍ୟ କେନ୍ଦ୍ର ନିର୍ମାଣ କରିବାକୁ ସେ ଦାବି କରିଥିଲେ। ଅଭିଯୋଗକୁ ଭିତି କରି ନୂତନ ସ୍ଥାନରେ ଉପକେନ୍ଦ୍ର ନିର୍ମାଣ ପାଇଁ ପ୍ରଶାସନିକ ସ୍ତରରେ ନିଷ୍ପତ୍ତି ହୋଇଥିଲା। ତେବେ ନୂତନ ସ୍ଥାନରେ ଉପସ୍ବାସ୍ଥ୍ୟକେନ୍ଦ୍ର ନିର୍ମାଣକୁ ପୂର୍ବତନ ସରପଞ୍ଚ ତଥା ଭାଜପା ରାଜ୍ୟ କାର୍ଯ୍ୟକାରିଣୀ ସଦସ୍ୟ ପ୍ରତାପ ମିଶ୍ର ବିରୋଧ କରିଥିଲେ। ପୂର୍ବ ନିର୍ଦ୍ଧାରିତ ସ୍ଥାନରେ କେନ୍ଦ୍ର ନିର୍ମାଣ ପାଇଁ ତହସିଲ କାର୍ଯ୍ୟାଳୟ ସମ୍ମୁଖରେ ଗଣଧାରଣା ଦେବେ ବୋଲି ୧୯ ଜାନୁୟାରୀ ୨୦୨୩ରେ ଲିଖିତ ଭାବେ ଜଣାଇଥିଲେ।
ସେହିପରି ଜାମୁଗଁା ପଞ୍ଚାୟତରେ ସରକାରୀ ଜାଗାକୁ ଜବରଦଖଲ କରି ରଖାଯାଇଥିବା ଅଭିଯୋଗ କରି ଏହି ପଞ୍ଚାୟତ ଅନ୍ତର୍ଗତ ନନ୍ଦିଗ୍ରାମର ବିଜେଡି କର୍ମୀ ଦିଲୀପ ପାଢୀ ମଙ୍ଗଳବାର ଅନଶନରେ କରିବେ ବୋଲି ୨୭ ଜାନୁୟାରୀ ୨୦୨୩ରେ ଲିଖିତ ଭାବେ ଜଣାଇଥିଲେ। ୨ ଭିନ୍ନ ରାଜନୈତିକ ଦଳ ପକ୍ଷରୁ ଗୋଟିଏ ଦିନରେ ଧାରଣା ଓ ଅନଶନ ଡାକରା ଦିଆଯାଇଥିବାରୁ ତହସିଲ କାର୍ଯ୍ୟରେ ବାଧା ଉପୁଜିବା ଆଶଙ୍କା ରଖି ୧୪୪ ଧାରା ଲଗାଯାଇଛି ବୋଲି ତହସିଲଦାର ଜେ. କଳ୍ପନା ପ୍ରକାଶ କରିଛନ୍ତି।
