ଭୁବନେଶ୍ୱର,୨୫।୩(ବ୍ୟୁରୋ): ରାଜଧାନୀ ଭୁବନେଶ୍ୱରରେ ଟ୍ରେନ ଧକ୍କା, ଟ୍ରେନ୍ରୁ ଖସି ଓ ଆତ୍ମହତ୍ୟାଜନିତ ମୃତ୍ୟୁ ମାମଲା ବଢ଼ିବାରେ ଲାଗିଛି। ଟ୍ରେନ୍ ଲାଇନ୍ରେ ଲୋକଙ୍କ ଜୀବନ ଯିବା ଘଟଣା ଉପରେ ରୋକ ଲାଗିପାରୁନି। ସାମାନ୍ୟ ଭୁଲ୍ ଓ ଅସାବଧାନତା ପାଇଁ ଅକାଳରେ ଜୀବନ ଚାଲିଯାଉଥିବାରୁ ଚିନ୍ତାର ବିଷୟ ପାଲଟିଛି। ଗତ ୫ ବର୍ଷରେ ଭୁବନେଶ୍ୱର ସରକାରୀ ରେଳପଥ ପୋଲିସ (ଜିଆର୍ପି) ଥାନାରେ ୨୦୦ରୁ ଅଧିକ ଅପମୃତ୍ୟୁ ମାମଲା ରୁଜୁ ହୋଇଛି। ଏହି ଥାନା ଅଞ୍ଚଳରେ ୨୦୧୯ରେ ସର୍ବାଧିକ ମାମଲା ପଞ୍ଜୀକୃତ ହୋଇଥିବାବେଳେ ସର୍ବାଧିକ ୯୬ଜଣଙ୍କର ମୃତ୍ୟୁ ଘଟିଛି। ତେବେ ୨୦୨୦ରେ କରୋନା କଟକଣା ପାଇଁ ଅଧିକାଂଶ ଟ୍ରେନ ଚଳାଚଳ ବନ୍ଦ ରହିଥିବାରୁ ସବୁଠୁ କମ୍ ୫୨ ଜଣଙ୍କର ମୃତ୍ୟୁ ଘଟିଛି। ସେହିଭଳି ୨୦୧୮ରେ ୯୪ ଜଣଙ୍କର ମୃତ୍ୟୁ ଘଟିଥିଲା। ଏଥିରେ ୩୮ଟି ଦୁର୍ଘଟଣାଜନିତ ମୃତ୍ୟୁ ଘଟିଥିବାବେଳେ ୮ଜଣ ଆତ୍ମହତ୍ୟା କରିଛନ୍ତି ଓ ୧୯ଜଣ ଟ୍ରେନରୁ ପଡ଼ି ମୃତ୍ୟୁବରଣ କରିଛନ୍ତି। ୨୦୧୯ ମସିହାରେ ୯୬ ଜଣଙ୍କର ମୃତ୍ୟୁ ହୋଇଥିବାବେଳେ ୪୪ଜଣ ଟ୍ରେନ ଧକ୍କାରେ, ୧୪ଜଣ ଟ୍ରେନ୍ରୁ ଖସି ମୃତ୍ୟୁବରଣ କରିଥିବାବେଳେ ଜଣେ ଆତ୍ମହତ୍ୟା କରିଛନ୍ତି। ୨୦୨୦ରେ ୫୨ ଜଣଙ୍କ ମୃତ୍ୟୁ ହୋଇଥିବା ବେଳେ ୪ଜଣ ଆତ୍ମହତ୍ୟା ଓ ୨୫ ଜଣଙ୍କର ଟ୍ରେନ ଧକ୍କାରେ ମୃତ୍ୟୁ ହୋଇଛି। ଏହାସହ ୬ଜଣ ଟ୍ରେନରୁ ପଡିଯିବାରୁ ମୃତ୍ୟୁ ଘଟିଛି। କରୋନା ମହାମାରୀର ପ୍ରଭାବ କମିବା ପରେ ପୁନଃ ମୃତ୍ୟୁ ବଢ଼ୁଥିବା ଦେଖିବାକୁ ମିଳିଛି। ୨୦୨୧ରେ ୭୨ଜଣଙ୍କ ମୃତ୍ୟୁ ମାମଲା ଜିଆର୍ପି ଥାନାରେ ପଞ୍ଜୀକୃତ ହୋଇଥିବାବେଳେ ଏଥିରୁ ୬ଜଣ ଆତ୍ମହତ୍ୟା କରିଥିବା ଜଣାପଡିଛି। ସେହିବର୍ଷ ୪୧ଜଣ ବ୍ୟକ୍ତିଙ୍କ ଟ୍ରେନ ଧକ୍କାରେ ଓ ୩ ଜଣଙ୍କର ଟ୍ରେନରୁ ପଡ଼ି ମୃତ୍ୟୁ ହୋଇଛି। ୨୦୨୨ ମସିହାରେ ୯୫ଜଣଙ୍କ ମୃତ୍ୟୁ ହୋଇଥିବାବେଳେ ୩୮ ଜଣଙ୍କ ଟ୍ରେନ ଧକ୍କାରେ ଓ ୬ଜଣ ଟ୍ରେନରୁ ପଡିଯିବାରୁ ମୃତ୍ୟୁ ହୋଇଥିବା ତଥ୍ୟ ରହିଛି।
ତେବେ ଏହି ତଥ୍ୟକୁ ଦେଖିଲେ ଆତ୍ମହତ୍ୟା ପାଇଁ ରେଳପଥକୁ ସବୁଠାରୁ ସହଜ ସ୍ଥାନ ଭାବେ ବାଛି ନେଉଛନ୍ତି। ଏହାକୁ ବାଦ ଦେଲେ କେତେଜଣ ଲୋକ ନିଜର ଦୁଃସାହସିକତା ପାଇଁ ଦୁର୍ଘଟଣାର ସମ୍ମୁଖୀନ ହୋଇ ଆଖି ବୁଜୁଛନ୍ତି। ଅନ୍ୟପଟେ ଟ୍ରେନରେ ଯାତ୍ରାବେଳେ ମଧ୍ୟ ତରତର ହୋଇ ଚଢିବା, ଦ୍ୱାର ପାଖରେ ଛିଡା ହୋଇଥିବା ସମୟରେ ଅନ୍ୟମନସ୍କ ହୋଇ ଟ୍ରେନ୍ରୁ ଖସିପଡୁଛନ୍ତି। ତେବେ ଲିଙ୍ଗରାଜ ଥାନା ଅନ୍ତର୍ଗତ ପୁନାମା ଗେଟ୍ ଓ ପୋଖରୀପୁଟ ବ୍ରିଜ୍ ନିକଟ ରେଳଧାରଣା ପାର ହେଉଥିବାବେଳେ ଅଧିକାଂଶ ଦୁର୍ଘଟଣା ଘଟିଥିବାବେଳେ ବାଣୀବିହାର ଷ୍ଟେଶନ ସମେତ ବିଭିନ୍ନ ସ୍ଥାନରେ ଲୋକେ ରେଳଧାରଣା ଉପରକୁ ଆସି ଦୁର୍ଘଟଣାର ସମ୍ମୁଖୀନ ହୋଇଥିବା ନଜିର ରହିଛି । ଏନେଇ ଜିଆର୍ପି ଥାନା ଅଧିକାରୀ ଜୟଦେବ ବିଶ୍ୱଜିତ କହିଛନ୍ତି, ଟ୍ରେନ ଯିବା ସମୟରେ ରେଳଧାରଣା ପାର ହେବାକୁ ବାରଣ କରାଯିବା ସହ ସାଇନ୍ବୋର୍ଡ ଲଗାଯାଇଛି। ଏହାସତ୍ତ୍ୱେ ବି ଲୋକେ ଅମାନିଆ ହୋଇ ରେଳଧାରଣା ପାର ହେଉଥିବାରୁ ଟ୍ରେନ ଧକ୍କାର ସମ୍ମୁଖୀନ ହେଉଛନ୍ତି। ତେଣୁ ଏହାକୁ ଏଡାଇବା ଲାଗି ପ୍ରମୁଖ ସମ୍ବେଦନଶୀଳ ସ୍ଥାନରେ ପୋଲିସ ମୁତୟନ କରାଯିବ ବୋଲି ସେ କହିଛନ୍ତି ।
