ବ୍ରହ୍ମପୁର ଅଫିସ,୫ା୨-କର୍କଟ ରୋଗର ଅରୋଗ୍ୟ ସମ୍ଭବ। ପ୍ରାୟ ୪୦ରୁ ୫୦ ପ୍ରତିଶତ କର୍କଟରୋଗର ସମ୍ପୂର୍ଣ୍ଣ ଆରୋଗ୍ୟ ବର୍ତ୍ତମାନ ସମ୍ଭବ ହୋଇପାରୁଛି। ସାରା ବିଶ୍ୱରେ ପ୍ରତି ମିନିଟରେ ୧୭ ଜଣ କର୍କଟ ରୋଗରେ ମୃତ୍ୟୁ ମୁଖରେ ପଡୁଛନ୍ତି। ପ୍ରଥମିକ ଅବସ୍ଥାରେ କର୍କଟ ରୋଗ ଚିହ୍ନଟ ହୋଇପାରିଲେ, ତା’ର ଚିକିତ୍ସା କରାଯାଇ ପାରିବ ା ବିଭିନ୍ନ ପ୍ରକାର କର୍କଟରୋଗର ପରୀକ୍ଷା ତଥା ଚିକିତ୍ସା ପାଇଁ ସରକାରୀ ହସ୍ପିଟାଲରେ ମାଗଣା ସେବା ପ୍ରଦାନ କରାଯାଉଛି। ତେଣୁ ଆଗାମୀ ଦିନରେ କର୍କଟରୋଗ ମହାମାରୀ ରୂପ ନେବା ପୂର୍ବରୁ ପ୍ରତ୍ୟେକ କର୍କଟ ରୋଗ ପରୀକ୍ଷା ନେଇ ସଚେତତ କରିବାର ଆବଶ୍ୟକତା ରହିଛି ବୋଲି ମଙ୍ଗଳବାର ସନ୍ଧ୍ୟାରେ ଜିଲା ସ୍ବାସ୍ଥ୍ୟ ସମିତି ପକ୍ଷରୁ ଆଇସି ହଲରେ ଆୟୋଜିତ ବିଶ୍ୱ କର୍କଟ ଦିବସ ପାଳନ ଅବସରରେ ଆହ୍ବାନ ଦିଆଯାଇଥିଲା ା
ଗଞ୍ଜାମ ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ(ସିଡିଏମ୍ପିଏଚଓ) ଡା. ଆର. ଜଗଦୀଶ ପଟ୍ଟନାୟକଙ୍କ ଅଧ୍ୟକ୍ଷତାରେ ଆୟୋଜିତ କାର୍ଯ୍ୟକ୍ରମରେ ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ସନ୍ତୋଷ ପାଢୀ, ଜିଲା ବହୁଜନ ବ୍ୟାଧି ନିୟନ୍ତ୍ରକ ଡା. ଅଶୋକ ମିଶ୍ର, ସାବିତ୍ରୀ ରାଉତ, ଜିଲା କାର୍ଯ୍ୟକ୍ରମ ପରିଚାଳକ(ଡିପିଏମ୍) ଶ୍ୟାମସୁ୍ନ୍ଦର ତ୍ରିପାଠୀ, ରୋଗ ନିୟନ୍ତ୍ରଣ ବିଭାଗ ଅତିରିକ୍ତ ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ଅବନୀ ପାତ୍ର ପ୍ରମୁଖ ମଞ୍ଚାସୀନ ଥିଲେ ା ବିଭିନ୍ନ ପ୍ରକାର କର୍କଟ ରୋଗ ମଧ୍ୟରେ ବର୍ତ୍ତମାନ ଭାରତରେ ସ୍ତନ କର୍କଟରେ ଆକ୍ରାନ୍ତଙ୍କ ସଂଖ୍ୟା ଅଧିକ ରହୁଛି। ଏଥିପାଇଁ ଅଧିକ ସଚେତନତାର ଆବଶ୍ୟକତା ରହିଛି। ବର୍ତ୍ତମାନ ସମସ୍ତ ସରକାରୀ ମେଡିକାଲରେ କର୍କଟ ରୋଗ ଚିହ୍ନଟ ପାଇଁ ମାଗଣା ପରୀକ୍ଷା ଉପଲବ୍ଧ ହେଉଛି। ଆସନ୍ତା ମାର୍ଚ୍ଚ ସୁଦ୍ଧା ଜିଲାର ଆହୁରି ୫୦ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ହେଲଥ ୱେଲନେସ୍ ସେଣ୍ଟର ଖୋଲାଯିବାର ଯୋଜନା ରହିଛି ା ଯାହାଦ୍ୱାରା ସମସ୍ତ ଡାକ୍ତରଖାନାରେ କର୍କଟରୋଗ ଚିହ୍ନଟ ପାଇଁ ପ୍ରତ୍ୟେକେ ମାଗଣାରେ ସ୍କାନିଂ କରିପରିବେ ବୋଲି ଡିପିଏମ୍ କହିଥିଲେ ା
ଏହାବ୍ୟତୀତ ଗଞ୍ଜାମ ଜିଲାରେ ୨୦୧୮- ୧୯ ଓ ୧୯-୨୦ର ରିପୋର୍ଟ ଅନୁସାରେ ଗତ ଡିସେମ୍ବର ସୁଦ୍ଧା ଜିଲାରେ ମୋଟ ଜନସଂଖ୍ୟାର ୬୯ ପ୍ରତିଶତ ଲୋକଙ୍କର କର୍କଟ ରୋଗ ସ୍କାନିଂ କରାଯାଇଛି ା ସେଥିରୁ ୨୦୬୮ ଲୋକଙ୍କ ନିକଟରେ ସାଧାରଣ କର୍କଟ, ୩୪୬ ଜଣଙ୍କ ନିକଟରେ ସ୍ତନ କର୍କଟ, ୧୭୩ ଜଣଙ୍କ ନିକଟରେ ସର୍ଭିକାଲ କର୍କଟ ଚିହ୍ନଟ କରାଯାଇଛି ା ସେମାନଙ୍କ ମାଗଣା ଚିକିତ୍ସା ବ୍ୟବସ୍ଥା ଆରମ୍ଭ କରାଯାଇଥିବା ସୂଚନା ଦିଆଯାଇଥିଲା। ତେବେ ଏହି ରୋଗରୁ ମୁକ୍ତି ପାଇଁ ତମାଖୁ ସେବନ, ନିଶା ସେବନଠାରୁ ଦୂରରେ ରହିବାକୁ କାର୍ଯ୍ୟକ୍ରମରେ ପରାମର୍ଶ ଦିଆଯାଇଥିଲା। ଏଥିରେ ଏଏନ୍ଏମ୍ ଛାତ୍ରୀଙ୍କ ସମେତ ସିଡିଏମ୍ପିଏଚଓଙ୍କ କାର୍ଯ୍ୟାଳୟର ସମସ୍ତ କର୍ମକର୍ତ୍ତା ଉପସ୍ଥିତ ଥିଲେ ା
