ଭୁବନେଶ୍ୱର,୫ା୭(ବ୍ୟୁରୋ):ରାଜ୍ୟରେ ଚିନ୍ତାଜନକ ଭାବେ ବଳାତ୍କାର ମାମଲା ବଢ଼ିଚାଲିଛି । ଗତ ୩ ବର୍ଷରେ ୧୫ ହଜାର ୭୧୩ ଦୁଷ୍କର୍ମ ମାମଲା ରାଜ୍ୟର ବିଭିନ୍ନ ଥାନାରେ ରୁଜୁ ହୋଇଛି। ୧୮ ବର୍ଷରୁ ଊର୍ଦ୍ଧ୍ୱ ବୟସ୍କା ମହିଳାଙ୍କ କ୍ଷେତ୍ରରେ ୨୦୧୯ରୁ ୨୦୨୨ ଏପ୍ରିଲ ଭିତରେ ୧୦ ହଜାର ୧୨୯ଟି ବଳାତ୍କାର ମାମଲା ରୁଜୁ ହୋଇଛି। ସେହିପରି ଏହି ସମୟ ଭିତରେ ୫ ହଜାର ୫୮୪ଟି ନାବାଳିକା ବଳାତ୍କାର ମାମଲା ଆସିଛି। କଂଗ୍ରେସ ସଭ୍ୟ ସନ୍ତୋଷ ସିଂ ସାଲୁଜାଙ୍କ ଲିଖିତ ପ୍ରଶ୍ନର ଉତ୍ତରରେ ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା ସୋମବାର ବିଧାନସଭାରେ ଏହା କହିଛନ୍ତି। ମନ୍ତ୍ରୀଙ୍କ ସୂଚନା ମୁତାବକ, ରାଜ୍ୟର ବିଭିନ୍ନ ଥାନାରେ ୨୦୧୯ରେ ୨ ହଜାର ୯୫୦ଟି ବଳାତ୍କାର ମାମଲା ରୁଜୁ ହୋଇଥିବା ବେଳେ ୨୦୨୦ରେ ୨ ହଜାର ୯୮୪ , ୨୦୨୧ରେ ୩ ହଜାର ୩୨୭ ଏବଂ ୨୦୨୨ ଏପ୍ରିଲ ସୁଦ୍ଧା ୮୬୮ଟି ବଳାତ୍କାର ମାମଲା ରୁଜୁ ହୋଇଛି। ସେହିପରି ନାବାଳିକା ମଧ୍ୟ ବଳାତ୍କାରରୁ ବର୍ତ୍ତିପାରୁନାହାନ୍ତି। ବିଧାନସଭାରେ ମନ୍ତ୍ରୀ ଦେଇଥିବା ତଥ୍ୟ ଅନୁଯାୟୀ, ୨୦୧୯ରେ ୧,୬୩୫ ନାବାଳିକା ବଳାତ୍କାର ମାମଲା ରୁଜୁ ହୋଇଥିବା ବେଳେ ୨୦୨୦ରେ ୧,୬୪୬, ୨୦୨୧ରେ ୧,୮୭୧ଟି ମାମଲା ଏବଂ ୨୦୨୨ ଏପି୍ରିଲ ସୁଦ୍ଧା ୪୩୨ଟି ନାବାଳିକା ବଳାତ୍କାର ମାମଲା ରୁଜୁ ହୋଇଛି। ସେହିପରି ଯୌତୁକଜନିତ ହତ୍ୟା, ନିର୍ଯାତନା ଏବଂ ଅନ୍ୟାନ୍ୟ ନିର୍ଯାତନା ମଧ୍ୟ ରାଜ୍ୟରେ ବଢି ଚାଲିଛି। ୨୦୧୯ରେ ୩୪୧ ଯୌତୁକଜନିତ ହତ୍ୟା ରୁଜୁ ହୋଇଥିବା ବେଳେ ଯୌତୁକ ନିର୍ଯାତନା ୩୭୫୬ ଓ ଅନ୍ୟାନ୍ୟ ନିର୍ଯାତନା ୨୫୩୨ ରୁଜୁ ହୋଇଛି। ସେହିପରି ୨୦୨୦ରେ ୩୨୦ ଯୌତୁକଜନିତ ହତ୍ୟା ମାମଲା ରୁଜୁ ହୋଇଥିବା ବେଳେ ଯୌତୁକ ନିର୍ଯାତନା ୩୭୫୯ ଓ ଅନ୍ୟାନ୍ୟ ନିର୍ଯାତନା ୩୧୫୩ ରୁଜୁ ହୋଇଛି। ୨୦୨୧ରେ ୨୯୩ ଯୌତୁକଜନିତ ହତ୍ୟା ମାମଲା ରୁଜୁ ହୋଇଥିବା ବେଳେ ଯୌତୁକ ନିର୍ଯାତନା ୪୯୫୩ ଓ ଅନ୍ୟାନ୍ୟ ନିର୍ଯାତନା ମାମଲା ୪୮୮୯ ରୁଜୁ ହୋଇଛି। ୨୦୨୨ ଏପ୍ରିଲ ସୁଦ୍ଧା ୮୫ ଯୌତୁକଜନିତ ହତ୍ୟା ରୁଜୁ ହୋଇଥିବା ବେଳେ ଯୌତୁକ ନିର୍ଯାତନା ୧୪୪୨ ଓ ଅନ୍ୟାନ୍ୟ ନିର୍ଯାତନା ୧୪୩୦ ରୁଜୁ ହୋଇଛି। ମହିଳାମାନଙ୍କ କ୍ଷେତ୍ରରେ ହେଉଥିବା ଅପରାଧରେ ଓଡ଼ିଶା ୧୮ ନମ୍ବର ସ୍ଥାନରେ ରହିଛି ବୋଲି ମନ୍ତ୍ରୀ ଗୃହରେ ତଥ୍ୟ ରଖିଛନ୍ତି।
