ନାଉଗଁା,୨୪ା୧(ସ୍ବ.ପ୍ର):ନାଉଗଁା ବ୍ଲକ ଅନ୍ତର୍ଗତ କାନୁନ୍ଗୋ ସାହିର ଜନୈକ ବ୍ୟକ୍ତି ଗ୍ରାମ ଜଳ ପରିମଳ ବିଭାଗର କିଛି ତଥ୍ୟ ଜାଣିବା ପାଇଁ ସୂଚନା ଅଧିକାର ଆଇନ ବଳରେ ଆବେଦନ କରିଥିଲେ। ମାତ୍ର ଅଧିକାରୀଙ୍କଠାରୁ ମନମୁଖୀ ଚିଠି ପାଇବା ପରେ ଆବେଦନକାରୀ ଦ୍ୱନ୍ଦ୍ୱରେ ପଡ଼ିଛନ୍ତି। ଉକ୍ତ ଆବେଦନ ଫର୍ମକୁ ପୋଷ୍ଟାଲ ମାଧ୍ୟମରେ ପଞ୍ଚାୟତ ସମିତି କାର୍ଯ୍ୟାଳୟର ଜନ ସୂଚନା ଅଧିକାରୀଙ୍କ ନିକଟକୁ ୨୭ ଡିସେମ୍ବର ୨୦୨୨ରେ ପ୍ରେରଣ କରିଥିଲେ। ଏହାପରେ ପଞ୍ଚାୟତ ସମିତି କାର୍ଯ୍ୟାଳୟ ପକ୍ଷରୁ ଚିଠି (ନଂ.୩୨/୫-୧-୨୩)ରେ ଜନ ସୂଚନା ଆଇନରେ ମଗାଯାଇଥିବା ସମସ୍ତ ତଥ୍ୟ ପାଇଁ ଗ୍ରାମ ପାନୀୟ ଜଳ ପରିମଳ ବିଭାଗକୁ ଚିଠି କରାଯାଇଥିଲା। ଏନେଇ ଗ୍ରାମ ଜଳ ପରିମଳ ବିଭାଗର କନିଷ୍ଠଯନ୍ତ୍ରୀଙ୍କ କାର୍ଯ୍ୟାଳୟ ତରଫରୁ ଚିଠି (ନଂ.୮/୧୬-୯-୨୩)ରେ ଅନ୍ୟ ଏକ ଚିଠି କରାଯାଇ ଆବେଦନ କରିଥିବା ସମ୍ପୃକ୍ତ ବ୍ୟକ୍ତିଙ୍କ ନିକଟକୁ ସ୍ପିଡ ପୋଷ୍ଟ (ନଂ-ଇଓ ୦୬୧୯୮୭୨୦୭ ଆଇଏନ୍)ରେ ଏକ ଚିଠି ପ୍ରଦାନ କରାଯାଇଥିଲା। ଉକ୍ତ ଚିଠିକୁ ପାଇବା ପରେ ଆବେଦନକାରୀ ଅର୍ଥ ପୈଠ ପାଇଁ ଚିନ୍ତାରେ ପଡ଼ିଛନ୍ତି। ପ୍ରଥମତଃ ସରକାରଙ୍କ ଦ୍ୱାରା ପରିଚାଳିତ ଏକ କାର୍ଯ୍ୟାଳୟରୁ ତାରିଖରେ ଭୁଲ ମାସ ଦର୍ଶାଯାଇଛି। କେବଳ ସେତିକି ନୁହେଁ ନିମ୍ନରେ ସ୍ବାକ୍ଷର କରିଥିବା ପ୍ରଶାସନିକ ଅଧିକାରୀ ମଧ୍ୟ ୧୬-୯-୨୩ ବୋଲି ସ୍ବାକ୍ଷର କରିଛନ୍ତି। ଚିଠି ପ୍ରଦାନର ୧୫ ଦିନ ମଧ୍ୟରେ ଅର୍ଥ ପୈଠ କରିବାକୁ ନିର୍ଦ୍ଦେଶ ଦିଆଯାଇଛି। ଏହି ନିର୍ଦ୍ଦେଶ ଅନୁଯାୟୀ, ଉକ୍ତ ଅର୍ଥ ୩୦ ସେପ୍ଟେମ୍ବର ୨୦୨୩ରେ ପୈଠ କରିବା ପାଇଁ ସୂଚନା ରହିଛି। ସେହିପରି ଆବେଦନକାରୀଙ୍କୁ ପ୍ରଦାନ କରିବାକୁ ଥିବା ତଥ୍ୟ କେତେ ପୃଷ୍ଠା ସମ୍ବଳିତ ପ୍ରଥମେ ଆବେଦନକାରୀଙ୍କୁ ତାହା ଅବଗତ କରାଯିବ। ସରକାରଙ୍କ ଧାର୍ଯ୍ୟ ନିୟମାନୁସାରେ ପୃଷ୍ଠାଗୁଡିକର ଅବିକଳ ନକଲ କପି କରିବା ପାଇଁ କେତେ ଅର୍ଥ ଓ ଆନୁଷଙ୍ଗିକ ଖର୍ଚ୍ଚ ପାଇଁ କେତେ ଅର୍ଥ ଲାଗିବ ତାହା ସ୍ପଷ୍ଟ ଭାବେ ଜଣାଇ ଦିଆଯିବ। କିନ୍ତୁ ପ୍ରଦାନ କରାଯାଇଥିବା ଚିଠିରେ ଆନୁମାନିକ ୫ ହଜାର ପୃଷ୍ଠା ଓ ପ୍ରତି ପୃଷ୍ଠାକୁ ୩ ଟଙ୍କା ହିସାବରେ ୧୫ ହଜାର ଟଙ୍କା ପୈଠ କରିବାକୁ ନିର୍ଦ୍ଦେଶ ଦିଆଯାଇଛି। ବାସ୍ତବରେ କେତେ ପୃଷ୍ଠାର ତଥ୍ୟ ହେବ ଉଲ୍ଲେଖ କରାଯାଇ ନାହିଁ। ବିଭାଗର ଏପରି ଚିଠି ସମ୍ପର୍କରେ ଆବେଦନକାରୀ କହିଛନ୍ତି, ତାଙ୍କୁ ହତୋତ୍ସାହ କରିବା ପାଇଁ ଏପରି ଚିଠି ପ୍ରଦାନ କରାଯାଇଛି। ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ରଶ୍ମିରଞ୍ଜନ ଦାସ କହିଛନ୍ତି, ମୁଁ ଅଫିସ ଲେଟର ଦେଖିବା ପରେ ଯାହା କରିବି ବୋଲି କହିଥିଲେ।
