ମସ୍କୋ/କିଭ୍/ଓ୍ବାଶିଂଟନ୍, ୧।୧୦: ସାତମାସ ତଳେ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଆରମ୍ଭ କରିଥିବା ତଥାକଥିତ ସ୍ବତନ୍ତ୍ର ସାମରିକ ଅଭିଯାନର ଉଦ୍ଦେଶ୍ୟ ଆଂଶିକ ସଫଳ ହୋଇଛି। ଏହି ଅବଧି ମଧ୍ୟରେ ରୁଷୀୟ ସୈନ୍ୟ ଦଖଲ କରିଥିବା ୟୁକ୍ରେନ୍ର ୪ ଗୁରୁତ୍ୱପୂର୍ଣ୍ଣ ଅଞ୍ଚଳକୁ ପୁଟିନ୍ ଶୁକ୍ରବାର ସ୍ବାଧୀନ ଘୋଷଣା କରିବା ସହ ନିଜ ଦେଶରେ ମିଶ୍ରଣ କରିଛନ୍ତି। ଷ୍ଟ୍ରଙ୍ଗ୍ମ୍ୟାନ୍ ପୁଟିନ୍ଙ୍କ ଏହି ଦୁଃସାହସିକ ପଦକ୍ଷେପ ପରେ ୟୁକ୍ରେନ୍ ରାଷ୍ଟ୍ରପତି ଭୋଲୋଡିମିର ଜେଲେନ୍ସ୍କି ନର୍ଥ ଆଟ୍ଲାଣ୍ଟିକ୍ ଟ୍ରିଟି ଅର୍ଗାନାଇଜେଶନ୍ (ନାଟୋ) ସାମରିକ ମେଣ୍ଟ ସଦସ୍ୟତା ପାଇଁ ଆବେଦନ କରିଛନ୍ତି। ଇତିମଧ୍ୟରେ ଶକ୍ତିଶାଳୀ ଆମେରିକା ମସ୍କୋ ଉପରେ ଆଉ କେତେକ କଠୋର କଟକଣା ଜାରି କରିଛି। ୨ ମହାଶକ୍ତି ମଧ୍ୟରେ ବଢ଼ୁଥିବା ଉତ୍ତେଜନା ଆଗକୁ ବିଶ୍ୱ ପାଇଁ ଅଧିକ ବିପଜ୍ଜନକ ସ୍ଥିତି ଉପୁଯାଇପାରେ ବୋଲି ଆଶଙ୍କା କରାଯାଉଛି।
ୟୁକ୍ରେନ୍ ଉପରେ ରୁଷିଆ ଆକ୍ରମଣ କରିବା ପରଠାରୁ ବେଆଇନ ଭାବେ ଦଖଲ କରିଥିବା ଡୋନେସ୍କ, ଲୁହାନ୍ସ୍କ, ଖେରସୋନ ଓ ଜାପୋରିଝିଆ ଅଞ୍ଚଳ ଏବେ ରୁଷୀୟ ମହାସଂଘର ଅଙ୍ଗ ପାଲଟିଛି। ଅନ୍ତର୍ଜାତୀୟ ଆଇନକୁ ଅବଜ୍ଞା କରି ପୁଟିନ୍ ଏହି ୪ ଅଞ୍ଚଳକୁ ନିଜ ଦେଶ ସହ ମିଶ୍ରଣ କରାଇବା ସକାଶେ ସେଣ୍ଟଜର୍ଜ ହଲ୍ରେ ଏକ ଦସ୍ତାବିଜ୍ରେ ସ୍ବାକ୍ଷର କରିଛନ୍ତି। ଏହି ଅବସରରେ ସେ କହିଛନ୍ତି, ନୂଆ କରି ସାମିଲ ହୋଇଥିବା ୟୁକ୍ରେନୀୟ ଅଞ୍ଚଳ ସବୁଦିନ ପାଇଁ ରୁଷିଆର ହୋଇଗଲା। ଅର୍ଥାତ୍ ଜେଲେନ୍ସ୍କି କିମ୍ବା ୟୁକ୍ରେନ୍ର କୌଣସି ପରବର୍ତ୍ତୀ ରାଷ୍ଟ୍ରପତି ଭବିଷ୍ୟତରେ ଏହାକୁ ପୁନଃ ଦଖଲ ଉଦ୍ୟମ କଲେ ବି ଫେରାଇନେଇ ପାରିବେ ନାହିଁ। ଡୋନେସ୍କ, ଲୁହାନ୍ସ୍କ, ଖେରସୋନ ଓ ଜାପୋରିଝିଆକୁ ଯଥାସାଧ୍ୟ ସୁରକ୍ଷା ଦିଆଯିବ। କ୍ରେମଲିନ୍ର ସାଇନିଂ ସେରେମନିରେ ସେ ଆମେରିକା ସମେତ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ବିରୋଧରେ ରୁଷିଆକୁ ଧ୍ୱସ୍ତବିଧ୍ୱସ୍ତ କରିବା ନେଇ ଷଡ଼ଯନ୍ତ୍ର ରଚନାର ଅଭିଯୋଗ ଆଣିଛନ୍ତି। ଆମେରିକା ଓ ଏହାର ସହଯୋଗୀ ରାଷ୍ଟ୍ର ଦୁଃସାହସ କଲେ ଆଣବିକ ଅସ୍ତ୍ର ପ୍ରୟୋଗ କରାଯିବ ବୋଲି ପୁଟିନ୍ ବହୁବାର ଧମକ ଦେଇଛନ୍ତି। ପୁଟିନ୍ଙ୍କ ବିସ୍ତାରବାଦୀ ନୀତିକୁ ଜେଲେନ୍ସ୍କି କଡ଼ା ଭାଷାରେ ନିନ୍ଦା କରିଛନ୍ତି। ରୁଷିଆ ଏକ ଆତଙ୍କବାଦୀ ରାଷ୍ଟ୍ରରେ ପରିଣତ ହୋଇଥିବା ସେ କହିଛନ୍ତି। ଡୋନେସ୍କ, ଲୁହାନ୍ସ୍କ, ଖେରସୋନ ଓ ଜାପୋରିଝିଆରେ ୫ ଦିନ ଧରି ଚାଲିଥିବା ଗଣଭୋଟ ମଙ୍ଗଳବାର ଶେଷ ହେବା ପରେ ୟୁକ୍ରେନ୍ର ଏହି ୧୫% ଅଞ୍ଚଳଗୁଡ଼ିକ ଉପରେ ମସ୍କୋର ଆଧିପତ୍ୟ ଆରମ୍ଭ ହୋଇଛି। ପୁଟିନ୍ଙ୍କ ଏହି ପଦକ୍ଷେପକୁ ବିଶ୍ୱ ସମୁଦାୟ ବିଶେଷକରି ଆମେରିକା ଓ ପାଶ୍ଚାତ୍ୟ ରାଷ୍ଟ୍ରଗୁଡ଼ିକ ସମାଲୋଚନା କରିଛନ୍ତି। ପ୍ରକାଶ ଯେ, ୨୦୧୪ରେ ମଧ୍ୟ କ୍ରିମିଆ ଦଖଲ ପୂର୍ବରୁ ମସ୍କୋ ସେଠାରେ ଗଣଭୋଟ କରାଇ ନିଜ ସପକ୍ଷରେ ଜନମତକୁ ଟାଣି ନେଇଥିଲା। ୟୁକ୍ରେନ୍ର ୧୫ ଭାଗ ଅଞ୍ଚଳ ଦଖଲ ପରେ କ୍ଷୁବ୍ଧ ଆମେରିକା ରୁଷିଆର ହଜାରେରୁ ଊର୍ଦ୍ଧ୍ୱ ସାମରିକ ଅଧିକାରୀ ଓ ଆଇନ ପ୍ରଣେତାଙ୍କ ସମେତ ଅନେକ କମ୍ପାନୀ ଉପରେ କଟକଣା ଜାରି କରିଛି। କ୍ରେମ୍ଲିନ୍ ପକ୍ଷରୁ ଏହି ମିଶ୍ରଣ ପ୍ରକ୍ରିୟା ଆରମ୍ଭ ହେବା ପୂର୍ବରୁ ରୁଷୀୟ ସୈନ୍ୟମାନେ ଜାପୋରିଝିଆକୁ ଟାର୍ଗେଟ କରି ମିଶାଇଲ, ରକେଟ ଓ ଆମତ୍ଘାତୀ ଡ୍ରୋନ୍ ଜରିଆରେ ଆକ୍ରମଣ କରିଛନ୍ତି। ଏଥିରେ ୨୫ ଜଣ ନିହତ ହୋଇଛନ୍ତି।
