ଜୟପୁର,୮।୯: ପିତାଙ୍କୁ ବଞ୍ଚାଇବା ପାଇଁ ଜଣେ ଝିଅ ଭାଲୁ ସହ ଲଢିଛନ୍ତି। ରାଜସ୍ଥାନର ସିରୋହି ଜିଲାର ସିଲଦାର ଗ୍ରାମରେ ଏକ ଭାଲୁ ଚାଷୀ କରମା ରାମ ଚୌଧୁରୀଙ୍କ ଉପରେ ଆକ୍ରମଣ କରିଥିଲା। ଭାଲୁକୁ ଦେଖି କୁକୁରମାନେ ଜୋରରେ ଭୋକିଥିଲେ। ଘରେ ଶୋଇଥିବା କରମାଙ୍କର ୧୪ ବର୍ଷୀୟା ଜ୍ୟୋତ୍ସ୍ନା ବାହାରକୁ ଆସିଥିଲେ। ସେ ନିଜ ପିତାଙ୍କୁ ବଞ୍ଚାଇବା ପାଇଁ ଭାଲୁ ସହ ଲଢିଥିଲେ। ସେତେବେଳକୁ ଭାଲୁ କରମାଙ୍କୁ ଗୁରୁତର ଭାବେ ଆଘାତ କରି ଦେଇଥିଲା। ଗୁରୁତର ଆହତ କରମାଙ୍କୁ ଗୁଜରାଟର ମେହସାନା ହସ୍ପିଟାଲରେ ଭର୍ତ୍ତି କରାଯାଇଛି।
ବାହାଦୂର ବାଳିକା ଜ୍ୟୋତ୍ସ୍ନା କହିଛନ୍ତି, ଭାଲୁ ପିତାଙ୍କ ଉପରେ ଆକ୍ରମଣ କରୁଥିବାର ଦେଖି ମୁଁ ସଙ୍ଗେ ସଙ୍ଗେ ଭାଲୁ ସହିତ ସଂଘର୍ଷ କରିଥିଲି। ମୋ ମନରେ କେବଳ ଗୋଟିଏ ଜିନିଷ ଥିଲା ଯେ ମୋ ସହିତ ଯାହା ହେଉନା କାହିଁକି, ମୁଁ ମୋ ବାପାଙ୍କ ସହିତ କିଛି ଘଟିବାକୁ ଦେବି ନାହିଁ। ପ୍ରଥମେ ଭାଲୁ ସହ ଲଢିବାକୁ ଭୟ ଲାଗିଥିଲା, କିନ୍ତୁ ମୋ ପିତାଙ୍କୁ ବଞ୍ଚାଇବା ଉଦ୍ଦେଶ୍ୟରେ ମୁଁ ଏକ ଠେଙ୍ଗା ଉଠାଇ ଭାଲୁ ଉପରେ ଆକ୍ରମଣ କରିବାକୁ ଲାଗିଲି। ଭାଲୁ ମାଡ ଦେଖି ପରେ ଅଧିକ ଆକ୍ରମଣାତ୍ମକ ହୋଇଗଲା। ସେ ମୋ ଆଡ଼କୁ ଚାହିଁଲା। ଏହା ଦେଖି ମା’ ମଧ୍ୟ ପଥର ଫିଙ୍ଗିଲେ। ସାତରୁ ଆଠ ମିନିଟ ପର୍ଯ୍ୟନ୍ତ ମୁଁ ଭାଲୁ ସହିତ ଠେଙ୍ଗା ସାହାଯ୍ୟରେ ସଂଘର୍ଷ ଜାରି ରଖିଲି। ଏହା ପରେ ସେ ସେଠାରୁ ପଳାଛଲା।
ଗାଁ ସମେତ ସୋସିଆଲ ମିଡିଆରେ ଜ୍ୟୋତ୍ସ୍ନାଙ୍କୁ ବହୁତ ପ୍ରଶଂସା କରାଯାଉଛି। ଲୋକମାନେ ତାଙ୍କୁ ପୁରସ୍କାର ଦେବାକୁ ମଧ୍ୟ ଦାବି କରୁଛନ୍ତି। ତାଙ୍କ ସାହସର କାହାଣୀ ଶୁଣି ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି।
