ଭଦ୍ରକ ଅଫିସ,୫।୩: ସମ୍ଭାବ୍ୟ ଅଂଶୁଘାତ ମୁକାବିଲା ପାଇଁ ଭଦ୍ରକ ଜିଲା ପ୍ରଶାସନ ପକ୍ଷରୁ ଜିଲା ଜରୁରୀକାଳୀନ ବିଭାଗ ସଂଯୋଜନାରେ ଜିଲାସ୍ତରୀୟ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର ଏଥିରେ ଅଧ୍ୟକ୍ଷତା କରିଥିଲେ। ଜିଲାରେ ପାନୀୟ ଜଳ ଯୋଗାଣ ବ୍ୟବସ୍ଥା, ଅଂଶୁଘାତ ପୀଡ଼ିତଙ୍କୁ ସ୍ବତନ୍ତ୍ର ଚିକିତ୍ସା, ସ୍କୁଲ, ଅଙ୍ଗନୱାଡି କେନ୍ଦ୍ରଗୁଡ଼ିକରେ ପାନୀୟ ଜଳ ବ୍ୟବସ୍ଥା ଓ କାର୍ଯ୍ୟ ସମୟ ପରିବର୍ତ୍ତନ, ଜଳଛତ୍ର, ପ୍ରାଣୀସମ୍ପଦ ପାଇଁ ପାଣିକୁଣ୍ଡ, ଶ୍ରମିକମାନଙ୍କ ଲାଗି ଛାୟାପ୍ରଦ ଆଶ୍ରୟସ୍ଥଳ, ପାନୀୟ ଜଳ ବ୍ୟବସ୍ଥା ସହ ପୂର୍ବାହ୍ନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ କାର୍ଯ୍ୟବନ୍ଦ, ଯାତ୍ରୀବାହୀ ବସ୍ରେ ପାନୀୟ ଜଳ ବ୍ୟବସ୍ଥା ଓ ଆବଶ୍ୟକ ସ୍ଥଳେ ଚଳାଚଳ ସମୟ ପରିବର୍ତ୍ତନ ଆଦି ବିଷୟରେ ଆଲୋଚନା କରାଯାଇଥିଲା। ଏସବୁ ଦିଗରେ ପଦକ୍ଷେପ ନେବା ପାଇଁ ଜିଲାପାଳ ପଦାଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
ସେହିପରି କୌଣସି ସ୍ଥାନରେ ନଳକୂପ ଅଚଳ ଖବର ମିଳିବା ମାତ୍ରେ ୨୪ ଘଣ୍ଟାରେ ସଚଳ କରିବା ପାଇଁ ଜନସ୍ବାସ୍ଥ୍ୟ ଓ ଗ୍ରାମ୍ୟ ଜଳ ଯୋଗାଣ ବିଭାଗୀୟ ଯନ୍ତ୍ରୀଙ୍କୁ ନିର୍ଦ୍ଦେଶ ଦିଆଯାଇଛି। ଅଂଶୁଘାତ ମୁକାବିଲା ନେଇ ଏସ୍ଆର୍ସିଙ୍କ ଦ୍ୱାରା ପ୍ରଣୀତ ସମସ୍ତ ମାର୍ଗଦର୍ଶିକା ଅନୁପାଳନ କଲେ ଅଂଶୁଘାତଜନିତ ଶୂନମୃତ୍ୟୁ ସମ୍ଭବ କରିପାରିବା ବୋଲି ଜିଲାପାଳ କହିଥଲେ। କୌଣସିଠାରେ ଅଂଶୁଘାତ ମୃତ୍ୟୁଜନିତ ଅଘଟଣ ଘଟିଲେ ସରକାରଙ୍କ ଦ୍ୱାରା ଧାର୍ଯ୍ୟ ୫୦ ହଜାର ଟଙ୍କା କ୍ଷତିପୂରଣ ପ୍ରଦାନ ପାଇଁ ମୃତଦେହ ବ୍ୟବଚ୍ଛେଦ ରିପୋର୍ଟ ସହ ତହସିଲଦାର ଓ ଡାକ୍ତରଙ୍କ ମିଳିତ ତଦନ୍ତ ରିପୋର୍ଟ ବାଧ୍ୟତାମୂଳକ ବୋଲି ଆଲୋଚ୍ୟ ବିବରଣୀ ଉପସ୍ଥାପନ କରିବା ଅବସରରେ ଜିଲା ଜରୁରୀକାଳୀନ ଅଧିକାରୀ ମନୋରମା ଜାଲି ପ୍ରକାଶ କରିଥିଲେ। ଅତିରିକ୍ତ ଜିଲାପାଳ ରାମଦାସ ଟୁଡୁ, ଶାନ୍ତନୁ କୁମାର ମହାନ୍ତି, ଜିଲା ପରିଷଦ ମୁଖ୍ୟ ଉନ୍ନୟନ ଅଧିକାରୀ ପ୍ରତାପ ପ୍ରୀତିମୟ, ଜିଲା ମୁଖ୍ୟ ଚିକିତ୍ସାଧିକାରୀ ଡା. ସନ୍ତୋଷ କୁମାର ପାତ୍ର, ଉପଜିଲାପାଳ ମନୋଜ ପାତ୍ର, ଅତିରିକ୍ତ ଏସ୍ପି ବିଜୟ ରଞ୍ଜନ କେରକେଟା, ଅତିରିକ୍ତ ଉପଜିଲାପାଳ ଡ. ଲକ୍ଷ୍ମୀପ୍ରସାଦ ସାହୁ ପ୍ରମୁଖ ବୈଠକରେ ଯୋଗ ଦେଇଥିଲେ।
