ଜଗତ୍ସିଂହପୁର ଅଫିସ, ୪।୧୧: ୧୧,୫୨୬ ହିତାଧିକାରୀଙ୍କୁ ୧୧୧.୬୪ କୋଟି ଟଙ୍କା ଋଣ ପ୍ରଦାନ କରାଯାଇଛି । ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି), ବ୍ୟକ୍ତିଗତ, କଞ୍ଜୁମର ଡୁରେବ୍ଲ, ଗାଡି, ଘର, କୃଷି, ପ୍ରାଣୀ, ପିଏମ୍ଇଜିପି, କେସିସି ସମେତ ମୁଦ୍ରା ଋଣ ଆକାରରେ ଏହି ରାଶି ପ୍ରଦାନ କରାଯାଉଛି। ଜଗତ୍ସିଂହପୁର ଆଦିକବି ସାରଳା ଦାସ ସଂସ୍କୃତି ଭବନ ପରିସରରେ ୟୁକୋ ବ୍ୟାଙ୍କ ପକ୍ଷରୁ ଅନୁଷ୍ଠିତ ଋଣମେଳାରେ ଏହା ଘୋଷଣା କରାଯାଇଛି। ଏଥିରେ କୁହାଯାଇଛି, ଏସ୍ଏଚ୍ଜିଗୁଡିକୁ କ୍ରେଡିଟ୍ ଲିଙ୍କେଜ୍ ମାଧ୍ୟମରେ ୪୨ କୋଟି ଟଙ୍କା ଅନୁମୋଦନ କରାଯାଇଛି। ସେହିପରି ପିଏମ୍ଇଜିପିରେ ୨୫ କୋଟି, କଟକ ସିସିବି ୨୪.୨୬ କୋଟି, ଓଡ଼ିଶା ଗ୍ରାମ୍ୟ ବ୍ୟାଙ୍କ ୧୮.୬୮ କୋଟି, ଷ୍ଟେଟ୍ ବ୍ୟାଙ୍କ ୧୩.୫ କୋଟି, ୟୁକୋ ବ୍ୟାଙ୍କ ୧୩ କୋଟି ଓ ପଞ୍ଜାବ ନ୍ୟାଶନାଲ ବ୍ୟାଙ୍କ ଦ୍ୱାରା ୭ କୋଟିରୁ ଅଧିକ ଟଙ୍କା ଅନୁମୋଦିତ ହୋଇଛି।
ଜଗତ୍ସିଂହପୁର ଏକ କୃଷି ପ୍ରଧାନ ଜିଲା। ମାଛ ଓ କ୍ଷୀର ଉତ୍ପାଦନରେ ଆଗୁଆ। ମହିଳାମାନେ ଏସ୍ଏଚ୍ଜି ଗଠନ କରି ଆର୍ଥିକ ସ୍ବାବଲମ୍ବୀ ହୋଇପାରୁଛନ୍ତି। ବ୍ୟାଙ୍କରୁ ଋଣ ନେଉଛନ୍ତି। ଯାହାଦ୍ୱାରା ସରକାରଙ୍କ ଉଦ୍ଦେଶ୍ୟ ପୂରଣ ହେଉଛି। ସୌଭାଗ୍ୟ ବ୍ୟାଙ୍କଗୁଡିକ ଋଣ ଦେବାକୁ ଏସ୍ଏଚ୍ଜିଗୁଡିକ ପାଖକୁ ଯାଉଛି। ରାଜ୍ୟ ସରକାର ପ୍ରତ୍ୟେକ ବର୍ଷ ଏସ୍ଏଚ୍ଜିଗୁଡିକୁ ଋଣ ଦେବାକୁ ବଜେଟ୍ ବୃଦ୍ଧି କରି ଚାଲିଥିବା କୁହାଯାଇଥିଲା। ମେଳାକୁ ବିଧାୟକ ପ୍ରଶାନ୍ତ କୁମାର ମୁଦୁଲି ଉଦ୍ଘାଟନ କରିଥିଲେ। ଅତିରିକ୍ତ ଜିଲାପାଳ ସଚ୍ଚିଦାନନ୍ଦ ସାହୁ ଯୋଗଦେଇ କହିଥିଲେ, ଉଦ୍ୟୋଗୀମାନଙ୍କୁ ଶତ ପ୍ରତିଶତ ଋଣ ଦିଆଯାଇ ପାରିଲେ ଉଦ୍ଦେଶ୍ୟ ପୂରଣ ହୋଇପାରିବ। ଡିଆର୍ଡିଏ ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତି ଋଣ ରାଶି ଅନୁମୋଦନ ସମ୍ପର୍କରେ ବିସ୍ତୃତ ସୂଚନା ଦେଇଥିଲେ। ଅନ୍ୟମାନଙ୍କ ମଧ୍ୟରେ ୟୁକୋ ବ୍ୟାଙ୍କର ଜୋନାଲ ମ୍ୟାନେଜର ଲଲାଟେନ୍ଦୁ ବେହେରା, ଷ୍ଟେଟ ବ୍ୟାଙ୍କ ଆଞ୍ଚଳିକ ପରିଚାଳକ ସୁବାସ ଚନ୍ଦ୍ର ବେହେରା, ଓଡ଼ିଶା ଗ୍ରାମ୍ୟ ବ୍ୟାଙ୍କର ରିଜିଓନାଲ ମ୍ୟାନେଜର ଯତିନ୍ଦ୍ରନାଥ ଷଡଙ୍ଗୀ ଓ ନାବାର୍ଡ ଡିଡିଏମ୍ ବିଶ୍ୱଭୂଷଣ ମହାନ୍ତି ପ୍ରମୁଖ ଯୋଗ ଦେଇଥିଲେ। ୟୁକୋ ବ୍ୟାଙ୍କ ପରିଚାଳକ ସତୀଶ କୁମାର ପାତ୍ର ମେଳାର ଆୟୋଜନ, ପରିଚାଳନା ଓ ଧନ୍ୟବାଦ ଦେଇଥିଲେ। ଏଥିରେ ବିଭିନ୍ନ ବ୍ୟାଙ୍କର କର୍ମକର୍ତ୍ତା, ଏସ୍ଏଚ୍ଜି କର୍ମକର୍ତ୍ତା, ଶିଳ୍ପ ଉଦ୍ୟୋଗୀ ଓ ଜୀବିକା ମିଶନ ଗ୍ରାହକମାନେ ଯୋଗ ଦେଇଥିଲେ।
