ଭୁବନେଶ୍ୱର,୨୯ା୮(ସତ୍ୟଜିତ୍ ରାଉତ): ଶିକ୍ଷାଗତ ଯୋଗ୍ୟତା ଦଶମ, ହେଲେ କାମ ଥିଲା ଅତି ଚତୁର। ନିଜକୁ ଡାକ୍ତର ପରିଚୟ ଦେଇ ଘର ଘର ବୁଲି ସ୍ବାସ୍ଥ୍ୟ ସମସ୍ୟା ପଚାରି ବୁଝୁଥିଲେ। କର୍କଟଠୁ ଆରମ୍ଭ କରି କିଡ୍ନୀ, ଡାଇବେଟିସ୍, ଗ୍ୟାସ୍ ଭଳି ବହୁ ରୋଗ ଭଲ କରିଦେବାକୁ କହି ନକଲି ଔଷଧ ବିକି ଠକୁଥିଲେ। ଏଭଳି ଜଣେ ନକଲି ଡାକ୍ତରଙ୍କୁ ଧରିଛି କମିଶନରେଟ୍ ପୋଲିସ। ସେ ହେଲେ ଢେଙ୍କାନାଳ ଜିଲା ଭୁବନ ଅଞ୍ଚଳର ଅଜିତ କୁମାର କାଣ୍ଡି (୪୭)। ଲକ୍ଷ୍ମୀସାଗର ଥାନା ପକ୍ଷରୁ ଅଭିଯୁକ୍ତ ଅଜିତଙ୍କୁ ଗିରଫ କରାଯାଇ ଭୁବନେଶ୍ୱର ଏସ୍ଡିଜେଏମ୍ କୋର୍ଟକୁ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ପରେ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।
ପୋଲିସ ସୂଚନା ଅନୁଯାୟୀ, ଅଜିତ କିଛିଦିନ ହେଲା ବାଇକ୍ରେ ସତ୍ୟନଗର, ଲକ୍ଷ୍ମୀସାଗର ସମେତ ଭୁବନେଶ୍ୱରର ବିଭିନ୍ନ ଅଞ୍ଚଳରେ ଘୂରି ବୁଲୁଥିଲେ। ସାଧାରଣ ଲୋକଙ୍କୁ ଡାକ୍ତର ବୋଲି ପରିଚୟ ଦେଇ ଫସାଉଥିଲେ। ତାଙ୍କଠାରୁ ଔଷଧ ଖାଇଲେ ଅତି କମ୍ ଦିନରେ ମାରାତ୍ମକ କର୍କଟଠାରୁ ଆରମ୍ଭ କରି ବିଭିନ୍ନ ପ୍ରକାର ଜଟିଳ ରୋଗ ଭଲ ହୋଇଯିବ ବୋଲି ପ୍ରତିଶ୍ରୁତି ଦେଉଥିଲେ। ତାଙ୍କ କଥାକୁ ବିଶ୍ୱାସ କରି ବହୁ ଲୋକ ମଧ୍ୟ ତାଙ୍କଠାରୁ ଔଷଧ କିଣି ଖାଉଥିଲେ। ହେଲେ ସେମାନଙ୍କ ରୋଗ ଭଲ ହେବା ପରିବର୍ତ୍ତେ ପାର୍ଶ୍ୱ ପ୍ରତିକ୍ରିୟା ଦେଖାଦେଇଥିଲା। କାହାର ଚର୍ମରୋଗ ତ ଆଉ କାହାର ପେଟରୋଗ ହୋଇଥିଲା। ଅଜିତଙ୍କଠାରୁ ଔଷଧ କିଣି ଖାଇଥିବା ଲକ୍ଷ୍ମୀସାଗର ଅଞ୍ଚଳର ବୈକୁଣ୍ଠ ସାହୁ ମଙ୍ଗଳବାର ଥାନାରେ ଏତଲା ଦେଇ କାର୍ଯ୍ୟାନୁଷ୍ଠାନ ଦାବି କରିଥିଲେ। ତାଙ୍କ ସହ ଅନ୍ୟ ୪ଜଣ ଅଜିତଙ୍କଠାରୁ ଗତ ୪ ମାସ ହେବ ୧ ଲକ୍ଷ ୧୬ ହଜାର ଟଙ୍କାର ଔଷଧ ଖାଇ ଠକେଇର ଶିକାର ହେବା ସହ ସ୍ବାସ୍ଥ୍ୟ ସମସ୍ୟାରେ ପଡିଥିବା ଏତଲାରେ ଦର୍ଶାଇଥିଲେ। ପୋଲିସ ପକ୍ଷରୁ ଏ ସଂକ୍ରାନ୍ତରେ ଭାରତୀୟ ନ୍ୟାୟ ସଂହିତା (ବିଏନ୍ଏସ୍) ଦଫା ୩୧୬(୨), ୩୧୯(୨)ରେ ଏକ ମାମଲା (ନଂ.୪୬୫/୨୦୨୪) ରୁଜୁ କରାଯାଇ ତଦନ୍ତ ଆରମ୍ଭ ହୋଇଥିଲା। ଅଜିତ ଯେଉଁ ଔଷଧ ବିକ୍ରି କରୁଥିଲେ, ସେଥିରେ କମ୍ପାନୀର ନାମ ASCLEPIUS WELLNESS PVT.LTD ଲେଖାରହିଛି। ମାତ୍ର ଆଇଏସ୍ଆଇ ମାର୍କ ସହ ଅନ୍ୟାନ୍ୟ ବୈଧ ତଥା ଆବଶ୍ୟକ ତଥ୍ୟ ନ ଥିବାରୁ ପୋଲିସ ଏହାକୁ ନକଲି ବୋଲି କହୁଛି। ତେବେ ଏହି ଔଷଧ ର଼୍ୟାକେଟର ଚେରକୁ ଧରିବା ପାଇଁ ପୋଲିସ ତନାଘନା ଆରମ୍ଭ କରିଥିଲେ ମଧ୍ୟ ଏହା ବଡ଼ ଚ୍ୟାଲେଞ୍ଜ ହେବ ବୋଲି କୁହାଯାଇଛି। ଔଷଧ କେଉଁଠି ତିଆରି ହେଉଥିଲା, ଏଥିରେ ଆଉ କେଉଁମାନେ ସମ୍ପୃକ୍ତ ଅଛନ୍ତି ଓ ଏହାର ମାଷ୍ଟରମାଇଣ୍ଡ କିଏ ଆଦି ଜାଣିବାକୁ ତଦନ୍ତ ଜାରି ରହିଥିବା ଜୋନ୍ ଏସିପି ମାନସ କୁମାର ଦେଓ କହିଛନ୍ତି। ଅଜିତଙ୍କ ଭଳି ଅନ୍ୟ କେହି ଏପରି କହୁଥିଲେ ତାଙ୍କ କଥାକୁ ବିଶ୍ୱାସ ନ କରି ପ୍ରକୃତ ଡାକ୍ତରଙ୍କ ପରାମର୍ଶ ନେଇ ଔଷଧ ସେବନ କରିବାକୁ ଏସିପି ପରାମର୍ଶ ଦେଇଛନ୍ତି। ଏଥିସହ ଏଭଳି ଘଟଣା ନଜରକୁ ଆସିଲେ ପୋଲିସକୁ ଖବର ଦେବାକୁ ସେ କହିଛନ୍ତି।
