ବିଞ୍ଝାରପୁର,୧୪ା୬(ଡି.ଏନ.ଏ.):ବିଞ୍ଝାରପୁର ବ୍ଲକ୍ ସମ୍ମିଳନୀ ଗୃହରେ ଜିଲାପାଳଙ୍କ ଯୁଗ୍ମ ଜନଅଭିଯୋଗଶୁଣାଣି ଶିବିର ସୋମବାର ଅନୁଷ୍ଠିତ ହୋଇଯାଇଛି। ବିଡିଓ ମିନତି ଜଗଦେବଙ୍କ ସଭାପତିତ୍ୱରେ ଅନୁଷ୍ଠିତ ଶିବିରରେ ମୁଖ୍ୟଅତିଥି ଭାବେ ଯାଜପୁର ଜିଲାପାଳ ଚକ୍ରବର୍ତ୍ତୀ ସିଂ ରାଠୋର ଯୋଗ ଦେଇଥିଲେ। ଏଥିସହିତ ସେ ଶିବିରକୁ ଆସୁଥିବା ଅଭିଯୋଗକାରୀଙ୍କ ସମସ୍ୟାକୁ ଗୁରୁତର ସହ ବିଚାରକୁ ନେଇ ତ୍ୱରାନ୍ବିତ ପ୍ରକ୍ରିୟାରେ ସମାଧାନ କରିବାକୁ ଉପସ୍ଥିତ ଅଧିକାରୀଙ୍କୁ ପରାମର୍ଶ ଦେଇଥିଲେ। ଆବାସ ଯୋଜନାରେ ଘର ପ୍ରଦାନ, ବାର୍ଦ୍ଧକ୍ୟ ଭତ୍ତା ପ୍ରଦାନ, ଚିକିତ୍ସା ସହାୟତା, ଜମିଜମା ସମନ୍ଧୀୟ ଅଭିଯୋଗ ପଞ୍ଜିକୃତ ହୋଇଥିଲା। ଏହି ଜନଶୁଣାଣିରେ ମୋଟ ୧୦୭ ଅଭିଯୋଗ ମଧ୍ୟରୁ ୧୦୬ ବ୍ୟକ୍ତିଗତ ସମସ୍ୟା ଓ ଗୋଟିଏ ସାମୂହିକ ସମସ୍ୟା ରହିଥିଲା। ସେଥିମଧ୍ୟରୁ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ୪ଜଣଙ୍କୁ ସହାୟତା ପ୍ରଦାନ ପାଇଁ ସୁପାରିସ କରାଯାଇଛି। ୧୧ଜଣଙ୍କୁ ରେଡ୍କ୍ରସ ସହାୟତା ପ୍ରଦାନ ପାଇଁ ସୁପାରିସ କରାଯାଇଥିବାବେଳେ ୬୫ ଅଭିଯୋଗର ତତ୍କାଳ ସମାଧାନ ହୋଇଥିଲା। ଅବଶିଷ୍ଟ ଅଭିଯୋଗ ସମାଧାନ ପାଇଁ ସମ୍ପୃକ୍ତ ବିଭାଗୀୟ ଅଧିକାରୀଙ୍କ ପାଖକୁ ପଠାଯାଇଛି। ଶିବିରରେ ଏସ୍ପି ରାହୁଲ୍ ପିଆର, ପ୍ରକଳ୍ପ ନିର୍ଦ୍ଦେଶକ ଅଶୋକ କୁମାର ବେହୁରିଆ, ଅତିରିକ୍ତ ଜିଲାପାଳ (ରାଜସ୍ବ) ଅକ୍ଷୟ କୁମାର ମଲ୍ଲିକ, ମୁଖ୍ୟାଳୟ ଏସ୍ଡିପିଓ ମମତା ସାହୁ, ଏସ୍ଡିପିଓ ସରୋଜ କୁମାର ଉପାଧ୍ୟାୟ, ଡିଆଇପିଆରଓ ସରୋଜ କୁମାର ଶତପଥୀ, ତହସିଲଦାର ଦୀପକ କୁମାର ରାଉତ, ଆଇଆଇସି ରଞ୍ଜିତ ମହାନ୍ତିଙ୍କ ସମେତ ସାସ୍ଥ୍ୟ, ଶିକ୍ଷା, ଆସିଡିଏସ, ପାନୀୟ ଜଳ ଯୋଗାଣ, ରାସ୍ତା ଓ ଗୃହ, ଜଳ ସମ୍ପଦ, ପୂର୍ତ୍ତ ଓ ବିଦ୍ୟୁତ୍ ଆଦି ସମସ୍ତ ବିଭାଗର ଅଧିକାରୀ ଉପସ୍ଥିତ ଥିଲେ।
