ଭୁବନେଶ୍ୱର, ୮।୯(ବ୍ୟୁରୋ): ରାଜ୍ୟରେ ଏବେ କରୋନା ସଂକ୍ରମଣ ଉପର ତଳ ହେଉଛି। କିନ୍ତୁ ପିଲାଙ୍କ ସଂକ୍ରମଣ ଏବେ ସମସ୍ତ ଚିନ୍ତା ବଢ଼ାଉଛି। ୭ ଦିନରେ ରାଜ୍ୟରେ ୭୯୪ ପିଲା କରୋନାରେ ସଂକ୍ରମଣ ହୋଇସାରିଲେଣି। ଗତ ୨୪ଘଣ୍ଟାରେ ରାଜ୍ୟରେ ୧୮ବର୍ଷରୁ କମ୍ ୧୦୨ ପିଲା ସଂକ୍ରମିତ ହୋଇଥିବା ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ସୂଚନା ଦିଆଯାଇଛି।
ସମ୍ଭାବ୍ୟ ତୃତୀୟ ଲହର ନ ଆସୁଣୁ ପିଲାଙ୍କ ସଂକ୍ରମଣ ସଂଖ୍ୟା ଅଧିକ ରହିବା ଅଭିଭାବକଙ୍କ ନିଦ ହଜାଇ ଦେଇଛି। ରାଜ୍ୟରେ ପିଲାଙ୍କୁ ସଂକ୍ରମଣ ହେବା ନେଇ ଡିମ୍ଏ୍ଇଟି ସିବିକେ ମହାନ୍ତି କହିଛନ୍ତି, ପିଲାମାନେ ଟିକା ନେଇ ନ ଥିବାରୁ ବୟସ୍କଙ୍କଠାରୁ ସେମାନଙ୍କୁ ସଂକ୍ରମଣ ହୋଇପାରେ। ପିଲାଙ୍କୁ ରକ୍ଷା କରିବା ପାଇଁ ସୋର୍ସକୁ ନିୟନ୍ତ୍ରଣ କରିବାକୁ ପଡ଼ିବ। ଏଥିରେ ଅଭିଭାବକଙ୍କ ବଡ଼ ଦାୟିତ୍ୱ ରହିଛି। ତେବେ ପିଲାଙ୍କ ସଂକ୍ରମଣ ହାର ଓ ତୀବ୍ରତା କମ୍ ରହିବ ବୋଲି ଆକଳନ କରାଯାଉଥିବା ଡିଏମ୍ଇଟି କହିଛନ୍ତି।
ଅପରପକ୍ଷେ ରାଜ୍ୟରେ ମଙ୍ଗଳବାର ଅପେକ୍ଷା ବୁଧବାର ପୁଣି ସଂକ୍ରମଣ ବଢ଼ିଥିବା ଦେଖାଯାଇଛି। ଗତ ୨୪ଘଣ୍ଟାରେ ରାଜ୍ୟରେ ୬୪,୬୦୨ ନମୂନା ପରୀକ୍ଷା କରାଯାଇଥିବା ବେଳେ ୭୬୨ଜଣ କରୋନା ପଜିଟିଭ୍ ଚିହ୍ନଟ ହୋଇଛନ୍ତି। ଫଳରେ ସଂକ୍ରମଣ ହାର ବଢ଼ି ୧.୧୮% ଛୁଇଁଛି। ତେବେ ସବୁଠାରୁ ବଡ଼ କଥା ହେଲା ସୋନପୁର ଜିଲାରେ ଦୈନିକ ସଂକ୍ରମଣ ହାର ତ ପ୍ରତିଶତ ଦେଖିବାକୁ ମିଳିଛି। ଜିଳାରେ ୩ଟି ନମୂନା ପରୀକ୍ଷା କରାଯାଇଥିଲା ଓ ୩ଟି ପଜିଟିଭ୍ ଥିବା ଜଣାପଡ଼ିଛି। ଖୋର୍ଦ୍ଧା ଜିଲାରେ ରାଜ୍ୟର ସର୍ବାଧିକ ୩୧୪ ଜଣ ଆକ୍ରାନ୍ତ ଚିହ୍ନଟ ହୋଇଥିବା ବେଳେ କଟକରେ ୧୧୯ ଜଣ ରହିଛନ୍ତି।
