ପିପିଲି,୧୨।୧୦(ସ୍ବ.ପ୍ର.): ଗଛରୁ ପଡ଼ି ମେରୁଦଣ୍ଡ ଆଘାତ ଲାଗିଥିବାରୁ ୧୦ବର୍ଷ ହେଲା ଶଯ୍ୟାଶାୟୀ ହୋଇଛନ୍ତି ୩୦ ବର୍ଷୀୟ ତରୁଣ ଡଗର। ନିଜେ ଉଠିବସି ପାରୁନାହାନ୍ତି କି ନିତ୍ୟକାର୍ଯ୍ୟ କରିପାରୁନାହାନ୍ତି। ଦୀର୍ଘବର୍ଷ ଶଯ୍ୟାରେ ପଡ଼ି ରହିବାରୁ ଦେହରେ ଘାଆ ହେବାକୁ ଲାଗିଲାଣି। ସ୍ବାସ୍ଥ୍ୟବସ୍ଥା ବିଗୁଡ଼ୁଥିଲେ ବି ଚିକିତ୍ସା ପାଇଁ ସମ୍ବଳ ନାହିଁ। ତାଙ୍କ ଉପରେ ପରିବାର ଦାୟିତ୍ୱ ଥିବାବେଳେ ସେ ଅନ୍ୟର ସହାୟତାକୁ ଆଶ୍ରା କରୁଛନ୍ତି। ଏବେ ବାପା ପରିଣତ ବୟସରେ ତାଙ୍କ ସାହା ଭରସା ପାଲଟିଛନ୍ତି। ସହାୟତା ପାଇଁ ସୋସିଆଲ ମିଡିଆରେ କୋହଭରା କଣ୍ଠରେ ଗୁହାରି ଜଣାଇଛନ୍ତି ମା’। ଏଭଳି ଦୁଃଖଦ ଚିତ୍ର ପିପିଲି ବ୍ଲକ ଦୁର୍ଗାଦାସପୁର ପଞ୍ଚାୟତ ଠଣଠଣା ଗ୍ରାମରେ ଦେଖିବାକୁ ମିଳିଛି।
ଠଣଠଣା ଗ୍ରାମର ଶରତ ଡଗରାଙ୍କ ପୁଅ ତରୁଣ ୨୦୧୦ ଜାନୁୟାରୀ ୪ରେ ନଡ଼ିଆ ଗଛରୁ ଖସି ପଡ଼ିବାରୁ ମେରୁଦଣ୍ଡରେ ଶକ୍ତ ଆଘାତ ଲାଗିଥିଲା। ପୁଅର ଚିକିତ୍ସା ପାଇଁ ବାପା ସବୁ ବିକି ୬୦ହଜାର ଟଙ୍କା ଖର୍ଚ୍ଚ କରିବା ସତ୍ତ୍ୱେ ଅବସ୍ଥା ଭଲ ହୋଇ ନ ଥିଲା। ଅପରେଶନ ପାଇଁ ୧ଲକ୍ଷ ୬୦ହଜାର ଦରକାର ବୋଲି ଡାକ୍ତରଙ୍କଠାରୁ ଶୁଣି ଭାଙ୍ଗି ପଡ଼ିଥିଲେ ପରିବାର ବର୍ଗ। ଅର୍ଥ ଅଭାବରୁ ଅଧା ଚିକିତ୍ସାରୁ ଘରକୁ ଫେରି ଆସିଥିଲେ। ସେହିଦିନଠାରୁ ଏପର୍ଯ୍ୟନ୍ତ ୧୦ବର୍ଷ ହେଲା ତରୁଣ ଶଯ୍ୟାଶାୟୀ ଅଛନ୍ତି। ସରକାରୀ ସହାୟତା ଭାବେ ପିପିଲି ତହସିଲ ପକ୍ଷରୁ ତାଙ୍କୁ ୨୦ହଜାର ଟଙ୍କା ମିଳିଥିବାବେଳେ ଏବେ ମାସିକ ଭତ୍ତା ପାଉଥିବା ପରିବାର ଲୋକେ କହିଛନ୍ତି। ପୁଅର ଅବସ୍ଥା ବିଗିଡ଼ିବାରେ ଲାଗିଛି। ଚିକିତ୍ସା ପାଇଁ ଅର୍ଥ ବାଧକ ଥିବାରୁ ତରୁଣ ଓ ତାଙ୍କ ମା ସୋସିଆଲ ମିଡିଆରେ ଦୁଃଖ ଜଣାଇଥିଲେ। ଏହାପରେ ମାରୁତି ସେନା ସଙ୍ଗଠନ ତରୁଣକୁ ସାହାଯ୍ୟ କରିବା ପାଇଁ ଆଗେଇ ଆସିଛନ୍ତି। ରବିବାର ଏହି ସଙ୍ଗଠନର ରାଜ୍ୟ ସଭାପତି ପପୁ ଦଳବେହେରାଙ୍କ ଆହ୍ବାନକ୍ରମେ ପିପିଲି-ଡେଲାଙ୍ଗ ସଭାପତି ଶ୍ରୀଧର ଆଚାର୍ଯ୍ୟ, ଜିଲା ସମ୍ପାଦକ ଅନିଲ ସ୍ବାଇଁ, ସଂଯୋଜିକା ଇତିଶ୍ରୀ ସରିତା ମହାନ୍ତି, ସଭ୍ୟା ପୁଷ୍ପାଞ୍ଜଳି ସାହୁ, ସଭ୍ୟ ଜୟକୃଷ୍ଣ ପରିଡ଼ା, ରଶ୍ମିରଞ୍ଜନ ଦାସ, କୀର୍ତ୍ତିରଞ୍ଜନ ପ୍ରମୁଖ ତରୁଣଙ୍କ ଘରେ ପହଞ୍ଚତ୍ ଆର୍ଥତ୍କ ସହାୟତା ଦେବା ସହ ଚିକିତ୍ସା କ୍ଷେତ୍ରରେ ସହଯୋଗ କରିବା ପାଇଁ ପ୍ରତିଶ୍ରୁତି ଦେଇଛନ୍ତି। ତରୁଣଙ୍କୁ ସରକାରୀ ସହାୟତା ଯୋଗାଇଦେବା ପାଇଁ ଦାବି କରାଯିବ ବୋଲି ସଙ୍ଗଠନ ତରଫରୁ କୁହାଯାଇଛି।
