ନୂଆଦିଲ୍ଲୀ,୨୩।୮: ଆଇପିଏଲ ୨୦୨୧ ର ଦ୍ୱିତୀୟ ପର୍ଯ୍ୟାୟ ୟୁଏଇରେ ଅନୁଷ୍ଠିତ ହେବାକୁ ଯାଉଛି। ଆଇପିଏଲର ପ୍ରଥମ ପର୍ଯ୍ୟାୟ ଭାରତରେ ଖେଳାଯାଉଥିଲା, କିନ୍ତୁ କରୋନା ମହାମାରୀ ସଂକ୍ରମଣ ଯୋଗୁ ଏହାକୁ ସ୍ଥଗିତ ରଖାଯାଇଥିଲା। ବର୍ତ୍ତମାନ ସେପ୍ଟେମ୍ବର ୧୯ରୁ ପୁଣି ଥରେ ଆଇପିଏଲର ଅବଶିଷ୍ଟ ମ୍ୟାଚ ୟୁଏଇରେ ଅନୁଷ୍ଠିତ ହେବାକୁ ଯାଉଛି। ଇତିମଧ୍ୟରେ ଆଇପିଏଲର ୨୯ଟି ମ୍ୟାଚ ହୋଇସାରିଛି ଏବଂ ୩୧ ଟି ମ୍ୟାଚ ବାକି ଅଛି। ଅବଶିଷ୍ଟ ମ୍ୟାଚ ୟୁଏଇର ଆବୁଧାବି, ଦୁବାଇ ଏବଂ ଶାରଜା ସ୍ଥିତ ତିନୋଟି ଷ୍ଟାଡିୟମରେ ଅନୁଷ୍ଠିତ ହେବ। ଏହା ମଧ୍ୟ ସ୍ପଷ୍ଟ ହେବାରେ ଲାଗିଛି ଯେ କେଉଁ ଖେଳାଳି ଆଇପିଏଲ ଖେଳିବେ ଏବଂ କେଉଁ ଖେଳାଳି ଖେଳିବେ ନାହିଁ। ଆଇପିଏଲ୍ ଦ୍ୱିତୀୟ ପର୍ଯ୍ୟାୟରେ ୧୦ ଅଭିଜ୍ଞ ଖେଳାଳି ଖେଳିବେନି।
ଅଷ୍ଟ୍ରେଲୀୟ ଦ୍ରୁତ ବୋଲର ପ୍ୟାଟ କମିନ୍ସ ଆଇପିଏଲ ଦ୍ୱିତୀୟ ପର୍ଯ୍ୟାୟରେ ଦେଖାଯିବ ନାହିଁ। ସେହିପରି ଜୋ ବଟଲର ମଧ୍ୟ ବିଦାୟ ନେଇଛନ୍ତି। ଉଭୟ ଖେଳାଳି ଖୁବ୍ ଶୀଘ୍ର ପିତା ହେବାକୁ ଯାଉଛନ୍ତି। ରାଜସ୍ଥାନ ରୟାଲ୍ସ ବଟଲରଙ୍କ ସ୍ଥାନରେ ଗ୍ଲେନ ଫିଲିପ୍ସଙ୍କୁ ଦଳରେ ସାମିଲ କରିଛି। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ପାଇଁ ଖେଳୁଥିବା ଆଦାମ ଜାମ୍ପା ମଧ୍ୟ ଆଇପିଏଲ ୨୦୨୧ ଦ୍ୱିତୀୟ ପର୍ଯ୍ୟାୟର ଅଂଶ ଗ୍ରହଣ କରିବେ ନାହିଁ। ତାଙ୍କ ସ୍ଥାନରେ ଶ୍ରୀଲଙ୍କାର ସ୍ପିନର ୱାନିନ୍ଦୁ ହାସରାଙ୍ଗା ଖେଳିବେ।
ସେହିପରି ଆରସିବି ପାଇଁ ଖେଳୁଥିବା ଅଷ୍ଟ୍ରେଲୀୟ ବୋଲର କେନ ରିଚାର୍ଡସନଙ୍କୁ ମଧ୍ୟ ଏଥର ଦେଖିବାକୁ ମିଳିବ ନାହିଁ। ସେ ନିଜକୁ ପ୍ରତ୍ୟାହାର କରି ନେଇଛନ୍ତି। ତେବେ ସେ ଟି-୨୦ ବିଶ୍ୱକପରେ ଖେଳିବେ। ଅନ୍ୟ ଜଣେ ଅଷ୍ଟ୍ରେଲୀୟ ଦ୍ରୁତ ବୋଲର ରିଲେ ମେରେଡିଥ ମଧ୍ୟ ଆଇପିଏଲ ଖେଳିବାକୁ ମନା କରି ଦେଇଛନ୍ତି। ସେ ସାଇଡ୍ ଷ୍ଟ୍ରେନ୍ରେ ପୀଡିତ ଥିବା କହିଛନ୍ତି। ମେରେଡିଥ ଆଇପିଏଲ ପ୍ରଥମ ପର୍ଯ୍ୟାୟରେ ପଞ୍ଜାବ କିଙ୍ଗ୍ସ ପାଇଁ ଖେଳୁଥିଲେ।
ଆଉ ଜଣେ ଅଷ୍ଟ୍ରେଲୀୟ ଦ୍ରୁତ ବୋଲର ଜେଇ ରିଚାର୍ଡସନଙ୍କୁ ମଧ୍ୟ ଏଥର ଦେଖିବାକୁ ମିଳିବ ନାହିଁ। ସେ ମଧ୍ୟ ତାଙ୍କ ନାମ ପ୍ରତ୍ୟାହାର କରିଛନ୍ତି। ସେ ପଞ୍ଜାବ କିଙ୍ଗ୍ସ ପାଇଁ ଖେଳୁଥିଲେ। ଡାନିଏଲ ସାମସ ମଧ୍ୟ ନିଜ ନାମ ପ୍ରତ୍ୟାହାର କରିଛନ୍ତି। ଡାନିଏଲ ମାନସିକ ଅବସ୍ଥା ଯୋଗୁ ଏଭଳି ନିଷ୍ପତ୍ତି ଗ୍ରହଣ କରିଛନ୍ତି। ବିରାଟ କୋହଲିଙ୍କ ଅଧିନାୟକତ୍ୱରେ ଡାନିଏଲ ଆରସିବି ପାଇଁ ଖେଳୁଥିଲେ। ଆରସିବି ପାଇଁ ଖେଳୁଥିବା ଫିନ ଆଲେନ ମଧ୍ୟ ଆଇପିଏଲ ବାହାରେ ରହିପାରନ୍ତି। କୁହାଯାଉଛି ଯେ ସେ ନିଜ ଦଳରେ ଖେଳିବେ ତେଣୁ ଆଇପିଏଲର ଅବଶିଷ୍ଟ ମ୍ୟାଚ ହରାଇବାର ଆଶଙ୍କା ରହିଛି। ଇଂଲଣ୍ଡର ଦ୍ରୁତ ବୋଲର ଜୋଫ୍ରା ଆର୍ଚର ଆଇପିଏଲ ଦ୍ୱିତୀୟ ପର୍ଯ୍ୟାୟରେ ଖେଳିବେ ନାହିଁ। କହୁଣିରେ ଆଘାତ ଯୋଗୁ ସେ ଏଭଳି ନିଷ୍ପତ୍ତି ନେଇଛନ୍ତି। ସେ ରାଜସ୍ଥାନ ରୟାଲ୍ସ ଦଳର ଜଣେ ଗୁରୁତ୍ୱପୂର୍ଣ୍ଣ ଖେଳାଳି। ତାଙ୍କ ଅନୁପସ୍ଥିତି ଦଳ ଉପରେ ବଡ ଧରଣର ପ୍ରଭାବ ପଡ଼ିବାର ଆଶଙ୍କା ରହିଛି।
