ନବରଙ୍ଗପୁର,୯।୯(ବି.ପ୍ର.):ସୁନାଇଟା କିଣିବାକୁ ସାଙ୍ଗର ସ୍ବାମୀଙ୍କୁ ଡକାଇଲେ। ନକଲି ସୁନାଇଟା ଦେଖାଇ ଯୋଜନା ମୁତାବକ ଲୁଟିନେଲେ୧୦ ଲକ୍ଷ ଟଙ୍କା। ସାଙ୍ଗରେ ଯାଇ ଥାନାରେ ଅଭିଯୋଗ ମଧ୍ୟ କଲେ। କିନ୍ତୁ ପୋଲିସ ହାତରେ ଧରାପଡ଼ିଗଲେ ଘଟଣାର ମାଷ୍ଟରମାଇଣ୍ଡ ମିଥୁନ ସାହୁ। ଏହି ଘଟଣାରେ ପୋଲିସ ଆଉ ୩ ଜଣଙ୍କୁ ମଧ୍ୟ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ହୁଗୁଳାପଟା ଗାଁର ମିଥୁନ ସାହୁ, ବଂଶୀଧର ପରିଡ଼ା, ଖଲିଗୁଡ଼ା ଗ୍ରାମର ଟୁନା ଓ ଯତୀନ୍ଦ୍ର ଖରା। ଟୁନା ଓ ଯତୀନ୍ଦ୍ର ସମ୍ପର୍କରେ ଶ୍ୱଶୁର ଜ୍ୱାଇଁ। ଅଭିଯୁକ୍ତ ବଂଶୀଧର ଟଙ୍କା ବ୍ୟାଗ୍କୁ ନେଇ ଯତୀନ୍ଦ୍ର ସହ ଯାଇଥିଲେ। ଉକ୍ତ ଟଙ୍କାକୁ ଏକ ଟେଡି ବିୟରରେ ରଖି କଣ୍ଢେଇଟିକୁ ସିମେଣ୍ଟ ଅଖାରେ ପୂରାଇ ତାହାକୁ ଏକ ବିଦ୍ୟାଳୟ ପାଇଖାନା ଭିତରେ ରଖିଥିଲେ। ପୋଲିସ ବଂଶୀଧରଙ୍କୁ ନେଇ ଉକ୍ତ ଟଙ୍କା ଜବତ କରିଛି। ଅଭିଯୁକ୍ତମାନଙ୍କଠାରୁ ୪ ଲକ୍ଷ ୬୦ ହଜାର ଟଙ୍କା, ଏକ ଖଣ୍ଡା, ଛୁରି, ଗୋଟିଏ ଖୁର ଓ ତିନୋଟି ମୋବାଇଲ ଫୋନ୍ ଜବତ କରାଯାଇଛି। ନବରଙ୍ଗପୁର ଅତିରିକ୍ତ ଏସ୍ପି ଜୟକୃଷ୍ଣ ବେହେରା ନବରଙ୍ଗପୁର ଥାନାରେ ଏକ ଖବରଦାତା ସମ୍ମିଳନୀ କରି ଏ ସମ୍ପର୍କରେ ସୂଚନା ଦେଇଛନ୍ତି।
ମୁଖ୍ୟ ଅଭିଯୁକ୍ତ ମିଥୁନ ବ୍ରହ୍ମପୁର ବଡ଼ବଜାର ଥାନା ଅଧୀନ ରଘୁପତିନଗର ଅଞ୍ଚଳର ସାଗର ଗୌଡ଼ଙ୍କ ସ୍ତ୍ରୀଙ୍କ ସାଙ୍ଗ। ଏକ ସୁନାଇଟା କିଣିବା ପାଇଁ ମିଥୁନ ସାଗରଙ୍କୁ ପ୍ରସ୍ତାବ ଦେଇ ନବରଙ୍ଗପୁର ଡାକିଥିଲେ l ଉକ୍ତ ସୁନାଇଟାଟି ପ୍ରାୟ ୪ କିଲୋ ୩୦୦ ଗ୍ରାମ। ୧୦ ଲକ୍ଷ ଟଙ୍କା ଦେଲେ ମିଳିଯିବ ବୋଲି ମିଥୁନ ସାଗରଙ୍କୁ କହିଥିଲେ। ମିଥୁନ ସ୍ତ୍ରୀଙ୍କ ସାଙ୍ଗ ହୋଇଥିବାରୁ ତାଙ୍କ କଥାରେ ବିଶ୍ୱାସକରି ସାଗର ନିଜ ୨ ସାଥୀଙ୍କ ସହ ଅଗଷ୍ଟ ୩୦ ସାରେ ୧୦ ଲକ୍ଷ ଟଙ୍କା ନେଇ ନବରଙ୍ଗପୁରରେ ପହଞ୍ଚତ୍ଥିଲେ। ମିଥୁନ ୬ ଜଣଙ୍କ ସହ ସାଗରଙ୍କୁ ଏକ ନିଛାଟିଆ ଜାଗାକୁ ନେଇଥିଲେ। ସେଠାରେ ସାଗରଙ୍କୁ ସୁନାଇଟା ଦେଖାଇଥିଲେ। ଇଟା ଯାଞ୍ଚ କରିବାକୁ ସାଗର କହିବା ପରେ ମିଥୁନଙ୍କ ସାଙ୍ଗରେ ଆସିଥିବା ଲୋକେ ଖଣ୍ଡା, ଛୁରି ଦେଖାଇ ସାଗରଙ୍କଠାରୁ ୧୦ ଲକ୍ଷ ଟଙ୍କା ଓ ବ୍ୟାଗ୍ ଛଡ଼ାଇ ନେଇଥିଲେ। ସାଗର ଟଙ୍କା ଫେରାଇବାକୁ ମିଥୁନଙ୍କୁ କହିଥିଲେ। ଅଭିଯୁକ୍ତମାନେ ଟଙ୍କା ଫେରସ୍ତ ନ କରିବାରୁ ସାଗର ନବରଙ୍ଗପୁର ଥାନାରେ ଲିଖିତ ଅଭିଯୋଗ କରିଥିଲେ। ନବରଙ୍ଗପୁର ପୋଲିସ ମିଥୁନଙ୍କ ଉପରେ ସନ୍ଦେହକରି ତାଙ୍କୁ ଥାନାକୁ ଆଣି ପଚରାଉଚରା କରିଥିଲେ। ମିଥୁନ ହିଁ ମୁଖ୍ୟ ଅଭିଯୁକ୍ତ ବୋଲି ଜଣାପଡ଼ିଥିଲେ। ପଚରାଉଚୁରା ବେଳେ ମିଥୁନ ଅନ୍ୟମାନଙ୍କ ନାଁ କହିବା ପରେ ଏସ୍ଆଇ ସବୀର ଅହମ୍ମଦ, ଏଏସ୍ଆଇ ଅଶୋକ ଦେଓ, କନଷ୍ଟେବଳ ଅନୀଲ ପୃଷ୍ଟି, ବିକାଶ ବେନିଆ ଓ ସାଗର ମାଝି ବିଭିନ୍ନ ସ୍ଥାନରେ ଚଢ଼ାଉକରି ଅଭିଯୁକ୍ତଙ୍କୁ ଗିରଫ କରିଛନ୍ତି। କେସ୍ ନଂ.୧୪୩/୨୨ରେ ମାମଲା ରୁଜୁକରି ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଖବରଦାତା ସମ୍ମିଳନୀରେ ଏଏସ୍ପି ସୂଚନା ଦେଇଛନ୍ତି। ଘଟଣାରେ ସମ୍ପୃକ୍ତ ଅନ୍ୟ ୩ ଅଭିଯୁକ୍ତଙ୍କୁ ଫେରାର ଅଛନ୍ତି। ଖବରଦାତା ସମ୍ମିଳନୀରେ ଏସ୍ଡିପିଓ ନିହାର ରଞ୍ଜନ ପ୍ରଧାନ, ଥାନା ଅଧିକାରୀ ନରେଶ କୁମାର ପ୍ରଧାନ ଉପସ୍ଥିତ ଥିଲେ।
