ଓ୍ବାଶିଂଟନ୍ ,୨୫ା୨: ଆମେରିକାର ଟାରିଫ୍କୁ ନେଇ ଏବେ ସାରା ବିଶ୍ୱରେ ଦ୍ୱନ୍ଦ୍ୱ ଲାଗି ରହିଛି। ଆମେରିକା ସୁପ୍ରିମକୋର୍ଟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଟାରିଫ୍ ନୀତିକୁ ଅବୈଧ ଘୋଷଣା କରିବା ପରେ ଟ୍ରମ୍ପ୍ ବାରମ୍ବାର ତାଙ୍କର ଆଭିମୁଖ୍ୟରେ ପରିବର୍ତ୍ତନ କରିଚାଲିଥିବାରୁ କେଉଁ ଦେଶ ଉପରେ କେତେ ପରିମାଣର ଟାରିଫ୍ ଲାଗୁ ହେବ, ତାହା ଏବେ ମଧ୍ୟ ସ୍ପଷ୍ଟ ହୋଇନାହିଁ। ସୁପ୍ରିମକୋର୍ଟଙ୍କ ରାୟ ପ୍ରକାଶ ପରେ ଟ୍ରମ୍ପ୍ ସବୁ ଦେଶ ଉପରେ ଅତିରିକ୍ତ ୧୦ ପ୍ରତିଶତ (ଗ୍ଲୋବାଲ୍ ଟାରିଫ୍) ଲଗାଇବାକୁ ପ୍ରଥମେ ଘୋଷଣା କରିଥିଲେ। ଆମେରିକାର ଇଣ୍ଟରନ୍ୟାଶନାଲ ଇମର୍ଜେନ୍ସି ଇକୋନୋମିକ୍ ପାଓ୍ବାର ଆକ୍ଟ, ୧୯୭୭(ଆଇଇଇପିଏ) ଅନୁସାରେ ଟ୍ରମ୍ପ୍ ବିଭିନ୍ନ ରାଷ୍ଟ୍ର ଉପରେ ଟାରିଫ୍ ଲଗାଇଥିଲାବେଳେ ଏହାକୁ ସୁପ୍ରିମକୋର୍ଟ ବେଆଇନ ଘୋଷଣା କରିଥିଲେ। ଏହାପରେ ଟ୍ରମ୍ପ୍ ୧୯୭୪ ଟ୍ରେଡ୍ ଆକ୍ଟର ଧାରା ୧୨୨କୁ ଆଧାରକରି ୧୦ ପ୍ରତିଶତ ହାରରେ ଗ୍ଲୋବାଲ ଟାରିଫ୍ ଲଗାଇବାକୁ ଘୋଷଣା କରିଥିଲେ। ପରେ ସେ ପୁଣି ନିଜ ଆଭିମୁଖ୍ୟ ପରିବର୍ତ୍ତନକରି ୧୫ ପ୍ରତିଶତ ଟାରିଫ୍ ଘୋଷଣା କରିଥିଲେ। କିନ୍ତୁ ଟ୍ରମ୍ପ୍ ଫେବୃଆରୀ ୨୦ରେ ଘୋଷଣା କରିଥିବା ୧୦ ପ୍ରତିଶତ ଗ୍ଲୋବାଲ୍ ଟାରିଫ୍ ଅନୁସାରେ ଆମେରିକାର କଷ୍ଟମସ୍ ଆଣ୍ଡ ବର୍ଡର ପ୍ରୋଟେକ୍ସନ୍ ବିଭାଗ ମଙ୍ଗଳବାରଠାରୁ ବିଦେଶୀ ସାମଗ୍ରୀ(ଶୁଳ୍କ ଛାଡ଼ ପାଇଁ ଉଦ୍ଦିଷ୍ଟ ନଥିବା) ଉପରେ ଶୁଳ୍କ ଲାଗୁ କରିଛି। ୧୫ ପ୍ରତିଶତ ଟାରିଫ୍ ଲଗାଇବାକୁ ଟ୍ରମ୍ପ୍ ଯେଉଁ ଘୋଷଣା କରିଥିଲେ , ସେଥିପାଇଁ ଅଧିକ ସମୟ ଲାଗିବ ବୋଲି କୁହାଯାଇଛି। ଟାରିଫ୍କୁ ନେଇ ଟ୍ରମ୍ପ୍ ପ୍ରଶାସନରେ ଘଡ଼ିକେ ଘୋଡା ଛୁଟୁଥିଲାବେଳେ ଆମେରିକାର ବାଣିଜ୍ୟ ଅଂଶୀଦାର ରାଷ୍ଟ୍ରଙ୍କ ମଧ୍ୟରେ ଦ୍ୱନ୍ଦ୍ୱ ବଢ଼ିିବାରେ ଲାଗିଛି। କେବଳ ସେତିକି ନୁହେଁ, ଗତ ସୋମବାର ଟାରିଫ୍କୁ ନେଇ ଟ୍ରମ୍ପ୍ ଯେଭଳି ଧମକ ଦେଇଥିଲେ ତାହାକୁ ନେଇ ମଧ୍ୟ ଅନେକ ରାଷ୍ଟ୍ରଙ୍କ ମୁଣ୍ଡବିନ୍ଧା ବଢ଼ିଛି। ଆମେରିକା ସହ ବାଣିଜ୍ୟ ଡିଲ୍ କରିସାରିଥିବା ରାଷ୍ଟ୍ର ଯଦି ଗେମ୍ ଖେଳିବାକୁ ଚେଷ୍ଟା କରନ୍ତି, ତେବେ ସେମାନଙ୍କ ଉପରେ ଅଧିକ ହାରରେ ଟାରିଫ୍ ଲଗାଯିବ ବୋଲି ଟ୍ରମ୍ପ୍ ଧମକ ଦେଇଥିଲେ।
