ଖପ୍ରାଖୋଲ,୩।୧୧(ଅଭୟ ତ୍ରିପାଠୀ): ବଲାଙ୍ଗୀର ଜିଲା ଖପ୍ରାଖୋଲ ଥାନା ପୋଲିସ ତେଲେଙ୍ଗାନା ରାଜ୍ୟକୁ ବେଆଇନ ଦାଦନ ଶ୍ରମିକ ଚାଲାଣ ବେଳେ ପୃଥକ ପୃଥକ ଦୁଇଟି ସ୍ଥାନରେ ଚଢାଉ କରି ୨ଶିଶୁ ସମେତ ୧୦ ଦାଦନ ଶ୍ରମିକଙ୍କୁ ଉଦ୍ଧାର କରାଯାଇଛି। ଉଦ୍ଧାର ୧୦ ଶ୍ରମିକ ଖପ୍ରାଖୋଲ ଥାନା ଓଡ଼ିଆପାଲି ଓ ଜୁନାନିବାହାଲ ଗ୍ରାମର ବୋଲି ପୋଲିସ ପକ୍ଷରୁ ସୂଚନା ଦିଆଯାଇଛି।
ଏହା ସହ ଜୁନାନିବାହାଲ ଗ୍ରାମରୁ ଦାଦନ ଶ୍ରମିକ ନେଇ ଯାଉଥିବା ଦାଦନ ସର୍ଦ୍ଦାର ଲାଠୋର ଥାନା ସାନଗୁର୍ଜିଭଟା ଗ୍ରାମର ବିଘ୍ନେଶ୍ୱର୍ ନାଗ(୨୬) ଏବଂ ଓଡ଼ିଆପାଲି ଦାଦନ ଶ୍ରମିକ ନେଇଯାଉଥିବା ଦାଦନ ସର୍ଦ୍ଦାର ବଲାଙ୍ଗୀର ଜିଲା ତୁରେକେଲା ଥାନା ଡେବ୍ରିମୁଣ୍ଡା ଗ୍ରାମର ମାୟାଧର ମେହେର(୩୫)ବୋଲି ସୂଚନା ମିଳିଛି। ତେଲେନପାଲି ଗ୍ରାମରୁ ଜମୁନାପାଲି ରାସ୍ତା ଦେଇ ଦାଦନ ଶ୍ରମିକ ନେଇ ଯାଉଥିବା ଏକ ବୋଲେରୋ ଗାଡି ଓ ଖପ୍ରାଖୋଲରୁ ଲାଠୋର ମୁଖ୍ୟ ରାସ୍ତା ବଡଗୁର୍ଜିଭଟା ବ୍ରିଜ ନିକଟରେ ଶ୍ରମିକଙ୍କୁ ନେଇ ଯାଉଥିବା ୩ ବାଇକ୍ ଜବତ ହୋଇଥିବା ଜଣାପଡିଛି। ଏନେଇ ଖପ୍ରାଖୋଲ ଥାନାରେ ଦୁଇଟି ମାମଲା (ନଂ.୨୧୬/୨୩ ଓ ୨୧୭/୨୩) ରୁଜୁ ହୋଇଛି। ଦାଦନ ଶ୍ରମିକ ଚାଲାଣ କରୁଥିବା ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ରମାକାନ୍ତ ସାହୁ ପ୍ରକାଶ କରିଛନ୍ତି।
