ମସ୍କୋ, ୨୧ା୧୦: ଆଫଗାନିସ୍ତାନ ପ୍ରସଙ୍ଗରେ ତାଲିବାନ୍ ପ୍ରତିନିଧିଙ୍କ ଉପସ୍ଥିତିରେ ରୁଷିଆ ବୁଧବାର ଏକ ଅନ୍ତର୍ଜାତୀୟ ବୈଠକ ଆୟୋଜନ କରିଛି। ଆଫଗାନିସ୍ତାନରେ ଶାନ୍ତି ଓ ସ୍ଥିରତା ଆଣିବା ପାଇଁ ତାଲିବାନ୍ ଖୁବଶୀଘ୍ର ଏକ ପୂର୍ଣ୍ଣ ସରକାର ଗଢ଼ୁ ବୋଲି ରୁଷିଆ ପରାମର୍ଶ ଦେଇଛି। ତାଲିବାନ୍ର ବ୍ୟବହାରକୁ ନେଇ ଭାରତ ଓ ରୁଷିଆ ଭିନ୍ନମତ ପ୍ରକାଶ କରିଥିଲେ। ମହିଳା ଓ ସଂଖ୍ୟାଲଘୁଙ୍କ ଅଧିକାର ସୁରକ୍ଷା ପାଇଁ ତାଲିବାନ୍ ଦେଇଥିବା ପ୍ରତିଶ୍ରୁତି ଏପର୍ଯ୍ୟନ୍ତ ପୂରଣ କରି ନ ଥିବା ଭାରତ କହିଛି। ଅନ୍ୟପକ୍ଷରେ ଆଫଗାନିସ୍ତାନରେ ସ୍ଥିରତା ଆଣିବା ପାଇଁ ତାଲିବାନ୍ର ଉଦ୍ୟମକୁ ରୁଷିଆ ପ୍ରଶଂସା କରିଛି। ଏହି ସରକାରରେ ଦେଶର ସମସ୍ତ ଧର୍ମୀୟ ଗୋଷ୍ଠୀ ଏବଂ ରାଜନୈତିକ ଦଳର ହିତ ସାଧନର ଝଲକ ରହିବା ଆବଶ୍ୟକ ବୋଲି ରୁଷିଆ ବହିର୍ବ୍ୟାପାର ମନ୍ତ୍ରୀ ସର୍ଗି ଲାଭ୍ରୋଭ୍ ବୈଠକ ପ୍ରାରମ୍ଭରେ କହିଥିଲେ। ୨୦୦୩ରେ ତାଲିବାନ୍କୁ ଏକ ଆତଙ୍କବାଦୀ ସଙ୍ଗଠନ ଆଖ୍ୟା ଦେଇଥିଲେ ହେଁ ରୁଷିଆ ଏହା ସହ ଯୋଗାଯୋଗ ରଖିବାକୁ ଦୀର୍ଘ ବର୍ଷରୁ ଉଦ୍ୟମ ଜାରି ରଖିଛି। ରୁଷିଆ ନିୟମ ଅନୁସାରେ ତାଲିବାନ୍ ସହ କୌଣସି ସମ୍ପର୍କ ଦଣ୍ଡନୀୟ ଅପରାଧ ହୋଇଥିଲେ ହେଁ ଆଫଗାନିସ୍ତାନରେ ସ୍ଥିରତା ଆଣିବା ପାଇଁ ତାଲିବାନ୍ ସହ କଥା ହେବା ଜରୁରୀ ବୋଲି ଲାଭ୍ରୋଭ କହିଛନ୍ତି।
କନଫରେନ୍ସରେ ଭାରତ, ଚାଇନା, ପାକିସ୍ତାନ ସମେତ ଇରାନ, କାଜାଖସ୍ତାନ, କିର୍ଗିଜସ୍ତାନ, ତାଜିକିସ୍ତାନ, ତୁର୍କମେନିସ୍ତାନ, ଉଜ୍ବେକିସ୍ତାନ ଆଦି ଦେଶର ପ୍ରତିନିଧିମାନେ ସାମିଲ ହୋଇଥିଲେ। ତାଲିବାନ୍ ପକ୍ଷରୁ ଡେପୁଟି ପ୍ରଧାନମନ୍ତ୍ରୀ ଅବଦୁଲ୍ ସଲାମ ହନାଫି ଆଲୋଚନାରେ ଉପସ୍ଥିତ ଥିଲେ। ବୈଠକରେ ଆମେରିକାର ଅନୁପସ୍ଥିତିକୁ ନେଇ ଲାଭ୍ରୋଭ ଦୁଃଖ ବ୍ୟକ୍ତ କରିଥିଲେ।
ମହିଳା ଖେଳାଳିଙ୍କ ମୁଣ୍ଡକାଟି ହତ୍ୟା
ଆଫଗାନିସ୍ତାନରେ ତାଲିବାନ ବର୍ବରତାର ଆଉ ଏକ ଘଟଣା ସାମ୍ନାକୁ ଆସିଛି। ମହିଳାଙ୍କ ସ୍ବାଧୀନତା ଉପରେ ଅଙ୍କୁଶ ମନୋଭାବ ରଖିଥିବା ଏହି କଠୋରପନ୍ଥୀ ସଙ୍ଗଠନ ଜାତୀୟ ମହିଳା ଭଲିବଲ ଟିମ୍ର ଜଣେ ତାରକା ଖେଳାଳିଙ୍କ ମୁଣ୍ଡକାଟ କରିଛି। କିଛି ଦିନ ତଳେ ଆଫଗାନ୍ ଜୁନିୟର ଭଲିବଲ ଖେଳାଳି ମହଜବିନ୍ ହକିମିଙ୍କୁ ତାଲିବାନ୍ ହତ୍ୟା କରିଥିବା ଟିମ୍ର କୋଚ୍ ଏକ ସାକ୍ଷାତ୍କାରରେ କହିଛନ୍ତି। ଏ ବାବଦରେ କାହା ଆଗରେ ନ କହିବାକୁ କିମ୍ବା ବାହାରେ ଚର୍ଚ୍ଚା ନ କରିବାକୁ ତାଙ୍କ ପରିବାରକୁ ତାଲିବାନ୍ ଧମକ ଦେଇଥିବା ସେ ପ୍ରକାଶ କରିଛନ୍ତି।
ଅଶ୍ରଫ୍ ଗନିଙ୍କ ସରକାର ଥିବାବେଳେ ମହଜବିନ୍ କାବୁଲ ମ୍ୟୁନିସିପାଲିଟି ଭଲିବଲ କ୍ଲବ ପାଇଁ ଖେଳିଥିଲେ। କିଛି ଦିନ ତଳେ ତାଙ୍କର ମୁଣ୍ଡକଟାଯାଇ ହତ୍ୟା ପରେ ସୋସିଆଲ ମିଡିଆରେ ଫଟୋ ମଧ୍ୟ ଭାଇରାଲ ହୋଇଥିଲା। ଅଗଷ୍ଟରେ ଆଫଗାନିସ୍ତାନକୁ ତାଲିବାନ କବ୍ଜା କରିବାବେଳେ ମହିଳା ଜାତୀୟ ଭଲିବଲ୍ ଟିମ୍ର ମାତ୍ର ୨ ଖେଳାଳି ଦେଶ ଛାଡ଼ି ପଳାୟନ କରିବାରେ ସକ୍ଷମ ହୋଇଛନ୍ତି। ଦୁର୍ଭାଗ୍ୟବଶତଃ ମହଜବିନ୍ଙ୍କ ସମେତ ଅନ୍ୟ ଖେଳାଳିମାନେ ଦେଶରେ ରହିଯାଇଥିବା ଟିମ୍ର କୋଚ୍ କହିଛନ୍ତି। ସେବେଠାରୁ ଘରୋଇ ଏବଂ ଅନ୍ତର୍ଜାତୀୟ ମ୍ୟାଚ୍ ଖେଳିଥିବା ମହିଳା ଖେଳାଳିଙ୍କୁ ତାଲିବାନ୍ ଖୋଜି ହତ୍ୟା କରିବାକୁ ଉଦ୍ୟମ କରୁଥିବା ସେ ପ୍ରକାଶ କରିଛନ୍ତି।
