ବ୍ରସିଲିଆ,୨ା୧: ବାୟୁମଣ୍ଡଳ ପ୍ରଦୂଷଣ ଜୀବଜଗତକୁ ପ୍ରଭାବିତ କରିଛି। ପୃଥିବୀରେ ପଶୁଙ୍କ ସଂଖ୍ୟା ଦିନକୁ ଦିନ କମିବାରେ ଲାଗିଛି। କହିବାକୁ ଗଲେ ବହୁ ଦୁର୍ଲଭ ଜୀବଙ୍କ ବିଲୋପ ଘଟିସାରିଥିବାବେଳେ ଅନେକେ ଏବେ ବିପଦସଙ୍କୁଳ ଅବସ୍ଥାରେ ଅଛନ୍ତି। ମନୁଷ୍ୟକୃତ କାରଣ ପାଇଁ ପରିବେଶ ପ୍ରଦୂଷିତ ହେବାରେ ଲାଗିଛି। ପୃଥିବୀରେ ପଶୁଙ୍କ ସଂଖ୍ୟା କମିବାରେ ମଣିଷ ପ୍ରମୁଖ ଭାବେ ଦାୟୀ ବୋଲି ବୈଜ୍ଞାନିକମାନେ କହିଛନ୍ତି। ଯେତେବେଳେ ଗୋଟିଏ ପ୍ରଜାତିର ଜୀବର ବିଲୋପ ଘଟେ ସେତେବେଳେ ସେମାନଙ୍କ ଗୁଣସୂତ୍ର ମଧ୍ୟ ସମ୍ପୂର୍ଣ୍ଣ ନଷ୍ଟ ହୋଇଯାଇଥାଏ। ଫଳରେ ସେହିପରି ପ୍ରାଣୀ ଆଉ ଜୀବଜଗତରେ ଦେଖାଯାନ୍ତି ନାହିଁ। ଗତ ୫୦୦ ବର୍ଷ ଭିତରେ ଲକ୍ଷାଧିକ ଦୁର୍ଲଭ ପ୍ରାଣୀ ଓ ଗଛ ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି।
ଏହାବାଦ୍ ମାଛ ଧରିବା ଓ ଶିକାର କରିବା ଦ୍ୱାରା ଅନେକ ପ୍ରଜାତିର ପଶୁ ଆଉ ଧରାପୃଷ୍ଠରେ ଦେଖାଯାଉ ନାହାନ୍ତି। ଇଣ୍ଟରନ୍ୟାଶନାଲ ୟୁନିୟନ୍ ଫର୍ କନ୍ଜରଭେଶନ୍ ଅଫ୍ ନେଚର ରିପୋର୍ଟ ଅନୁସାରେ ୧୫୦୦ ମସିହାରୁ ବିଶ୍ୱରେ ୮୮୧ ପ୍ରଜାତିର ପ୍ରାଣୀ ବିଲୁପ୍ତ ହୋଇସାରିଛନ୍ତି। ପାଖାପାଖି ୫ ଦେଶକୁ ନେଇ ଏହି ରିପୋର୍ଟ ପ୍ରସ୍ତୁତ କରାଯାଇଛି। ଗତ ୩୦ରୁ ୪୦ ବର୍ଷ ମଧ୍ୟରେ ବିଶ୍ୱରେ ୧୦୦ ପ୍ରକାର ପ୍ରଜାତି ସମ୍ପୂର୍ଣ୍ଣ ଭାବେ ମୂଳପୋଛ ହୋଇଯାଇଛନ୍ତି। ୧୬୬୨ରୁ ବିରଳ ପ୍ରଜାତିର ପକ୍ଷୀ ଡୋଡୋ ବିଲୁପ୍ତ ହୋଇଯାଇଥିବାବେଳେ ପିଣ୍ଟା ଦ୍ୱୀପରେ ଏହା ଶେଷଥର ପାଇଁ ଦେଖିବାକୁ ମିଳିଥିଲା। ବର୍ତ୍ତମାନ ସମୟରେ ପଶୁଙ୍କ ବିଲୋପ ହେବାର ମାତ୍ରା କ୍ରମାଗତ ବଢ଼ିବାରେ ଲାଗିଛି। ୧୦ ନିୟୁତ ବର୍ଷ ତୁଳନାରେ ଏବେ ବହୁ ପ୍ରଜାତିର ପ୍ରାଣୀ ବିନାଶ ହେଉଥିବା ଦେଖିବାକୁ ମିଳୁଛି।
