ଭଦ୍ରକ ଅଫିସ,୩୦।୬: ଝାଡ଼ାବାନ୍ତି ହେଉଥିବା ଜଣେ ବୃଦ୍ଧାଙ୍କୁ ଡାକ୍ତରଖାନା ନେବାକୁ ୧୦୮ ଆମ୍ବୁଲାନ୍ସ ଆସିଥିଲା। ହେଲେ ରାସ୍ତା ଖରାପ ଯୋଗୁ ଗଁାକୁ ଯାଇ ନ ପାରି ୧ କି.ମି. ପୂର୍ବରୁ ଆମ୍ବୁଲାନ୍ସ ଅଟକି ରହିଥିଲା। ଫଳରେ ଷ୍ଟ୍ରେଚରରେ ଉକ୍ତ ବୃଦ୍ଧାଙ୍କୁ ୧ କି.ମି. ବୋହି ନେବାକୁ ପଡ଼ିଥିଲା। ଭଦ୍ରକ ଜିଲା ବନ୍ତ ବ୍ଲକ ରାମପୁର ପଞ୍ଚାୟତର କାଜିପୋଖରୀ ଚାରିତିରା ଗ୍ରାମରେ ଏଭଳି ଘଟଣା ଦେଖିବାକୁ ମିଳିଛି। ଏହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି।
ଅନୁଯାୟୀ, ଉକ୍ତ ଗ୍ରାମର ଖଗେଶ୍ୱର ନାୟକଙ୍କ ସ୍ତ୍ରୀ କନକଲତା(୬୫)ଙ୍କର ମଙ୍ଗଳବାର ଅପରାହ୍ନରେ ଝାଡ଼ାବାନ୍ତି ହେବାରୁ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ନେବା ପାଇଁ ଆମ୍ବୁଲାନ୍ସକୁ ଯୋଗାଯୋଗ କରାଯାଇଥିଲା। ଆମ୍ବୁଲାନ୍ସ ଆସି ଅଧାରେ ଅଟକି ରହିବାରୁ ଗ୍ରାମର ସନ୍ଦୀପ ମହାପାତ୍ର, ଗୋବିନ୍ଦ ମଲ୍ଲିକ, ପୁପୁନା ସାମଲ, ବୁଟୁ ନାୟକ, ସନ୍ତୋଷ ନାୟକ ପ୍ରମୁଖ ଯୁବକମାନେ ଆମ୍ବୁଲାନ୍ସରେ ଥିବା ଷ୍ଟ୍ରେଚରରେ କନକଲତାଙ୍କୁ ବୋହି ଗାଡ଼ି ପର୍ଯ୍ୟନ୍ତ ନେଇଥିଲେ। ଉକ୍ତ ଗ୍ରାମର ଯୁବକ ତାପସ କୁମାର ମହାପାତ୍ର ଖରାପ ରାସ୍ତାର ଫଟୋ ମୁଖ୍ୟମନ୍ତ୍ରୀ, ଭଦ୍ରକ ଏମ୍ପି, ଜିଲାପାଳ, ଜିଲା ପ୍ରକଳ୍ପ ନିର୍ଦ୍ଦେଶକ ଓ ବନ୍ତ ବିଡିଓଙ୍କୁ ଟୁଇଟ୍ କରିଛନ୍ତି।
ଏହି ଭଦ୍ରକ-ଆନନ୍ଦପୁର ରାସ୍ତାର ବରପଦା ହନୁମାନ ଛକଠାରୁ ମିଟୁଆଣୀ, ଭାୟା କାଜିପୋଖରୀ ୩ କି.ମି.ରୁ ଅଧିକ ରାସ୍ତା ଦୀର୍ଘବର୍ଷ ଧରି ମରାମତି ହୋଇ ନ ଥିବାରୁ ଶୋଚନୀୟ ହୋଇପଡ଼ିଛି। ବର୍ଷାଦିନେ ଆମ୍ବୁଲାନ୍ସ, ଦମକଳ ଓ ପୋଲିସ ଭ୍ୟାନ୍ ପରି ଅତ୍ୟାବଶ୍ୟକ ଗାଡ଼ିଗୁଡ଼ିକ ଉକ୍ତ ଗ୍ରାମକୁ ଯାଇପାରୁ ନ ଥିବାରୁ ଗ୍ରାମବାସୀ ବହୁ ଅସୁବିଧାର ସମ୍ମୁଖୀନ ହେଉଛନ୍ତି। ଏ ନେଇ ପୂର୍ବରୁ ବହୁବାର ଜିଲାପାଳଙ୍କ ସମେତ ବିଭିନ୍ନ ବିଭାଗୀୟ ଅଧିକାରୀଙ୍କୁ ଲିଖିତ ଅଭିଯୋଗ ଓ ଟୁଇଟ୍ ମାଧ୍ୟମରେ ଅବଗତ କରାଯାଇଥିଲେ ମଧ୍ୟ ରାସ୍ତାର ଅବସ୍ଥା ବଦଳି ପାରିନାହିଁ।
