ନୂଆଦିଲ୍ଲୀ: ସାମଗ୍ରୀ ଓ ସେବା ଟିକସ(ଜିଏସ୍ଟି) ବ୍ୟବସ୍ଥାରେ ୧.୬ ଲକ୍ଷ ସଂସ୍ଥା ପଞ୍ଜୀକରଣ ହରାଇଛନ୍ତି। ୬ ମାସରୁ ଊର୍ଦ୍ଧ୍ୱ ସମୟ ଧରି ଏହି ସଂସ୍ଥାଗୁଡିକ ରିଟର୍ନ ଫାଇଲ କରି ନ ଥିଲେ। ଫଳରେ ଟିକସ କର୍ତ୍ତୃପକ୍ଷ ଏମାନଙ୍କ ପଞ୍ଜୀକରଣକୁ ରଦ୍ଦ କରିଥିବା ଶନିବାର ଜଣାପଡିଛି। ସେହିଭଳି ଜାଲିଆତି କରି ରିଫଣ୍ଡ ପାଇବା ଲାଗି କିଛି ସଂସ୍ଥା କାରସାଦି କରିଥିବା ନଜରକୁ ଆସିଛି। ଟିକସ ଫାଇଲିଂରେ ବିଭିନ୍ନ ଅନିୟମିତତା ଅଭିଯୋଗରେ ୧୩୨ ଜଣ ଗିରଫ ହୋଇଛନ୍ତି। ଗତ ମାସେ ମଧ୍ୟରେ ଏଭଳି ଘଟଣା ସାମ୍ନାକୁ ଆସିଛି। ସାରା ଦେଶରେ ଅପରେଶନ ଦ୍ୱାରା ଏଭଳି ଘଟଣାର ପର୍ଦ୍ଦାଫାଶ ହୋଇଛି।
ବେଆଇନ ଜାଲ୍ ଇନ୍ପୁଟ ଟାସ୍କ କ୍ରେଡିଟ ସୁବିଧା କରାଇଦେବା ଅଭିଯୋଗରେ ୪ ଚାର୍ଟାର୍ଡ ଆକାଉଣ୍ଟାଣ୍ଟ ଏବଂ ଜଣେ ମହିଳାଙ୍କ ଗିରଫ ଭଳି ଘଟଣା ମଧ୍ୟ ନଜରକୁ ଆସିଛି। ନଭେମ୍ବର ମଧ୍ୟ ଭାଗରୁ ଏଭଳି ବିଭିନ୍ନ ୧୪୩୦ ମାମଲା ଦାୟର ହୋଇଛି। ୪୫୮୬ ସଂସ୍ଥା ଜାଲ୍ ବୋଲି ଜଣାପଡିଛି। ଏଭଳି ବିଭିନ୍ନ ଘଟଣାକୁ ନଜରରେ ରଖି ୧.୬ ଲକ୍ଷ ସଂସ୍ଥାଙ୍କ ପଞ୍ଜୀକରଣ ବାତିଲ କରାଯାଇଥିବା ଶନିବାର ଅର୍ଥ ମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି। ସୂଚନାଯୋଗ୍ୟ, ୧.୨ କୋଟିରୁ ଊର୍ଦ୍ଧ୍ୱ ସଂସ୍ଥା ଜିଏସ୍ଟି ଅଧୀନରେ ପଞ୍ଜୀକୃତ ଅଛନ୍ତି।
ଜଣେ ଅଧିକାରୀ କହିଛନ୍ତି ଯେ, ଜିଏସ୍ଟିଏନ୍ରେ ପଞ୍ଜୀକରଣ କରିଥିବା ସଂସ୍ଥାଗୁଡିକ ମଧ୍ୟରୁ ଯେଉଁଗୁଡିକ ୬ ମାସରୁ ଊର୍ଦ୍ଧ୍ୱ ସମୟ ହେବ ରିଟର୍ନ ଫାଇଲ କରିନାହାନ୍ତି ସେଗୁଡିକୁ ପ୍ରଥମେ ନୋଟିସ ଦିଆଯାଇଥିଲା। ଏହା ପରେ ପଞ୍ଜୀକରଣ ବାତିଲ କରାଯାଇଛି। ଏହା ଷ୍ଟାଣ୍ଡାର୍ଡ ପ୍ରୋସେଜିଅର ବୋଲି ଅଧିକାରୀ ମତ ରଖିଛନ୍ତି। ସେହିଭଳି ଆଉ ୨୮,୬୩୫ ଟିକସଦାତା ଜିଏସ୍ଟି ଆର୍ ୩ବି ଫାଇଲ କରିନାହାନ୍ତି। ୬ ମାସରୁ ଊର୍ଦ୍ଧ୍ୱ ସମୟ ହେବ ଏହି ସଂସ୍ଥାଗୁଡିକ ରିଟର୍ନ ଭରି ନାହାନ୍ତି। ଏମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ଲାଗି ଜିଏସ୍ଟି କମିଶନରଙ୍କୁ କୁହାଯାଇଥିବା ମନ୍ତ୍ରଣାଳୟ ପକ୍ଷରୁ ସ୍ପଷ୍ଟ କରାଯାଇଛି।
