ଦାରିଙ୍ଗବାଡି,୨୧ା୨(ଡି.ଏନ.ଏ.): ଓଡ଼ିଶାର କାଶ୍ମୀରକଶ୍ମୀର କୁହାଯାଉଥିବା କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ଅଞ୍ଚଳରେ ଷ୍ଟ୍ରବେରୀ ଚାଷ ଏବେ ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ ବଡ଼ ସଫଳତା ଦେଇଛି। ପୂର୍ବେ ବର୍ଷକୁ ରୋଜଗାର ମାତ୍ର ୧୦ ହଜାର ଟଙ୍କା ହେଉଥିବା ବେଳେ ଏବେ ଦୁଇ ମାସରେ ଷ୍ଟ୍ରବେରୀ ଦେଲାଣୀ ଦେଢ଼ଲକ୍ଷ। ଏଭଳି ଦୃଶ୍ୟ ଦେଖିବାକୁ ମିଳିଛି ଉକ୍ତ ବ୍ଲକ ଗ୍ରୀନ୍ବାଡି ପଞ୍ଚାୟତ କୁତୁବାଡି ଗ୍ରାମରେ ଥିବା ଏଲିଜାବେଥ୍ ମହିଳା ସ୍ବୟଂ ସହାୟକ ଗୋଷ୍ଠୀର ସଦସ୍ୟାଙ୍କୁ। ଜିଲା ପ୍ରଶାସନ ସହାୟତାରେ ମହିଳାମାନେ ୨ ଏକର ଜମିରେ ୨୦ ହଜାର ଚାରା ଲଗାଇ ମାତ୍ର ୨ ମାସରେ ଷ୍ଟ୍ରବେରୀ ଅମଳ କରି ବିକ୍ରି କରିଛନ୍ତି। ଏଥିପାଇଁ ମହିଳା ସ୍ବୟଂ ସହାୟକ ଗୋଷ୍ଠୀଙ୍କୁ କୌଣସି ଖର୍ଚ୍ଚ କରିବାକୁ ପଡିନି ବରଂ ଚାଷଜମିରେ ଶ୍ରମିକ ଭାବେ କାମ କରି ଏମ୍ଜିଏନ୍ଆରଇଜିଏସ୍ରୁ ପ୍ରାପ୍ୟ ପ୍ରାୟ ୧ ଲକ୍ଷ ୧୫ହଜାର ପାଇଛନ୍ତି। ଏହି ଚାଷ ଗତ ନଭେମ୍ବରରେ ଆରମ୍ଭ କରି ଜାନୁୟାରୀରେ ଷ୍ଟ୍ରବେରୀ ଫଳ ବିକ୍ରି ଆରମ୍ଭ ହୋଇଥିଲା। ଚଳିତ ମାସ ସୁଦ୍ଧା ପ୍ରାୟ ଦେଢ଼ଲକ୍ଷ ଟଙ୍କାର ବିକ୍ରି ସାରିଥିବା ବେଳେ ଆହୁରି ଷ୍ଟ୍ରବେରୀ ଅମଳ ହେଉଛି, ଯାହାକି ଦ୍ବିଗୁଣିତ ବିକ୍ରି ଲକ୍ଷ୍ୟ ରଖାଯାଇଥିବା ମହିଳା ଗୋଷ୍ଠୀର ସମ୍ପାଦିକା ରେଣୁକା ପ୍ରଧାନ କହିଛନ୍ତି। ଏବେ ଦାରିଙ୍ଗବାଡ଼ିରେ ଏହି ଚାଷ ସଫଳତାର ସହ ହୋଇପାରିଥିବାରୁ ଆହୁରି ଏକାଧିକ ଚାଷୀଙ୍କୁ ଏହି ଷ୍ଟ୍ରବେରୀ ଚାଷ କରିବାକୁ ପ୍ରୋତ୍ସାହନ ଦେବାକୁ ପ୍ରଶାସନ ଲକ୍ଷ୍ୟ ରଖିଛି। ମହିଳାମାନେ ଦାରିଙ୍ଗବାଡିର ଚାରିଛକ, କଫି ବଗିଚା ସମ୍ମୁଖ ଏବଂ ଷ୍ଟ୍ରବେରୀ ଚାଷ ଜମି ସମ୍ମୁଖରେ ଷ୍ଟଲ କରି ବିକ୍ରି କରୁଛନ୍ତି। ଦାରିଙ୍ଗବାଡିକୁ ଆସୁଥିବା ପର୍ଯ୍ୟଟକମାନେ ଷ୍ଟ୍ରବେରୀ ଚାଷକୁ ବୁଲି ଦେଖିବା ସହ ଏହାକୁ କିଣି ନେଉଛନ୍ତି। ଷ୍ଟ୍ରବେରୀ ଚାଷ ଏବେ ସଫଳତା ଦେବା ପରେ ପ୍ରଶାସନ ଆଉ ଏକ ନୂଆ ଚାଷ ଡ୍ରାଗନ କରିବାକୁ ଯୋଜନା କରିବା ସହ କ୍ଷେତ୍ର ପ୍ରସ୍ତୁତି ଚଳାଇଛି, ଅନୁଦାନ ଆସିଲେ ଏହି ଚାଷ କରାଯିବ ବୋଲି ପ୍ରଶାସନ ସୂତ୍ରରୁ ଜଣାପଡ଼ିଛି। ପ୍ରକାଶ ଯେ, ଏହି ଚାଷ ପାଇଁ ଜିଲା ଉଦ୍ୟାନ ବିଭାଗ ସମେତ କୃଷି ବିଭାଗ, ମୃତ୍ତିକା ସଂରକ୍ଷଣ ବିଭାଗ ଓ ଓଡ଼ିଶା ଜୀବିକା ମିଶନ ପକ୍ଷରୁ ସହାୟତା କରାଯାଇଥିଲା।
