ନୂଆଦିଲ୍ଲୀ,୧୦।୨: ଡିଜିଟାଲ ଠକେଇକୁ ନିୟନ୍ତ୍ରଣ କରିବା ପାଇଁ କେନ୍ଦ୍ର ସରକାର ଏପର୍ଯ୍ୟନ୍ତ ୧.୪ଲକ୍ଷ ମୋବାଇଲ ନମ୍ବରକୁ ଅବରୋଧ କରିଛନ୍ତି। ଏକ ସରକାରୀ ପ୍ରକାଶନ ଅନୁଯାୟୀ, ଏହି ମୋବାଇଲ ନମ୍ବର ଆର୍ଥିକ ଠକେଇରେ ଜଡିତ ଥିଲା। ଆର୍ଥିକ ସେବା ସଚିବ ବିବେକ ଯୋଶୀ ଶୁକ୍ରବାର ଆର୍ଥିକ ସେବା କ୍ଷେତ୍ରରେ ସାଇବର ସୁରକ୍ଷା ଉପରେ ଏକ ବୈଠକରେ ଅଧ୍ୟକ୍ଷତା କରିଥିଲେ।
ଏପିଆଇ (ଆପ୍ଲିକେସନ ପ୍ରୋଗ୍ରାମିଂ ଇଣ୍ଟରଫେସ) ଏକୀକରଣ ମାଧ୍ୟମରେ ନାଗରିକ ଆର୍ଥିକ ସାଇବର ଠକେଇ ସୂଚନା ଏବଂ ପରିଚାଳନା ସିଷ୍ଟମ (CFCFRMS) ପ୍ଲାଟଫର୍ମରେ ବ୍ୟାଙ୍କ ଏବଂ ଆର୍ଥିକ ପ୍ରତିଷ୍ଠାନଗୁଡ଼ିକର ଅନବୋର୍ଡିଂ ସହିତ ବିଭିନ୍ନ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା। ବୟାନ ଅନୁଯାୟୀ, CFCFRMS ପ୍ଲାଟଫର୍ମକୁ ଜାତୀୟ ସାଇବର କ୍ରାଇମ ସୂଚନା ପୋର୍ଟାଲ (NCRP) ସହିତ ସଂଯୋଗ କରାଯିବ। ଏହା ପୋଲିସ, ବ୍ୟାଙ୍କ ଏବଂ ଆର୍ଥିକ ପ୍ରତିଷ୍ଠାନ ମଧ୍ୟରେ ଉତ୍ତମ ସମନ୍ବୟକୁ ସକ୍ଷମ କରିବ।
ବିବୃତ୍ତିରେ କୁହାଯାଇଛି ଯେ ଟେଲି ଯୋଗାଯୋଗ ବିଭାଗ ବଲ୍କ ଏସଏମଏସ ପଠାଉଥିବା ୩୫ ଲକ୍ଷ ପ୍ରାଥମିକ ୟୁନିଟ ବିଶ୍ଳେଷଣ କରିଛି। ଏଥିମଧ୍ୟରୁ ୧୯,୭୭୬ ଟି ସଂସ୍ଥା ଅଯୌକ୍ତିକ ଏସଏମଏସ ପଠାଇବାରେ ଜଡିତ। ତେଣଉ ଏହାକୁ କଳା ତାଲିକା ଭୁକ୍ତ କରାଯାଇଛି। ଏ ବାବଦରେ ୫୦୦ରୁ ଅଧିକ ଗିରଫ କରାଯାଇଛି ଏବଂ ପ୍ରାୟ ୩.୦୮ ଲକ୍ଷ ସିମ ଅବରୋଧ କରାଯାଇଛି। ସୂଚeନାଯୋଗ୍ୟ, ଦେଶରେ ସାଇବର ଠକେଇ ମାମଲା ଦ୍ରୁତ ଗତିରେ ବୃଦ୍ଧି ପାଇଛି, ବିଶେଷକରି ସାଇବର ଅପରାଧୀମାନେ ମୋବାଇଲ ମାଧ୍ୟମରେ ଲୋକଙ୍କୁ ଡାକି ଠକେଇ କରୁଛନ୍ତି।
ସାଇବର ଠକେଇକୁ ଏଡାଇବା ପାଇଁ ସର୍ବଦା ସତର୍କ ରହିବା ଆବଶ୍ୟକ। ଏସଏମଏସ ଏବଂ ଇମେଲରେ ଆସୁଥିବା କୌଣସି ଅଜ୍ଞାତ ଲିଙ୍କ ଉପରେ କଦାପି କ୍ଲିକ କରନ୍ତୁ ନାହିଁ। କୌଣସି ଅଜ୍ଞାତ ବ୍ୟକ୍ତିଙ୍କୁ ଆପଣଙ୍କର ବ୍ୟାଙ୍କ ଆକାଉଣ୍ଟ ସହିତ ଜଡିତ ଗୁପ୍ତ ସୂଚନା ଦିଅନ୍ତୁ ନାହିଁ । କୌଣସି ସନ୍ଦେହଜନକ କଲ, ବାର୍ତ୍ତା କିମ୍ବା ମେଲକୁ ଉତ୍ତର କରନ୍ତୁ ନାହିଁ ଏବଂ ସେମାନଙ୍କୁ ବ୍ଲକ କରନ୍ତୁ ।
