ନୂଆଦିଲ୍ଲୀ,୨୪-୭-କେନ୍ଦ୍ର ସରକାର ଫ୍ଲାଟ୍ ମେଣ୍ଟେନାନ୍ସରୁ ମଧ୍ୟ ଜିଏସ୍ଟି ଆଦାୟ ଲାଗି ସ୍ଥିର କରିଛନ୍ତି। ଏଣିକି ଫ୍ଲାଟ୍ ମେଣ୍ଟେନାନ୍ସ ବାବଦରେ ରେସିଡେଣ୍ଟ ଓ୍ବେଲ୍ଫେୟାର ଆସୋସିଏଶନକୁ ପ୍ରତି ମାସରେ ୭୫୦୦ ଟଙ୍କାରୁ ଅଧିକ ପ୍ରଦାନ କରାଯାଉଥିଲେ ୧୮% ଜିଏସ୍ଟି ଦେବାକୁ ହେବ ବୋଲି ଅର୍ଥ ମନ୍ତ୍ରଣାଳୟ ସ୍ପଷ୍ଟ କରିଛି। ଏଥିରେ କୁହାଯାଇଛି ଯେ, ୨୦୧୮ ଜାନୁୟାରୀ ୨୫ ପୂର୍ବରୁ ୫୦୦୦ ଟଙ୍କା ପର୍ଯ୍ୟନ୍ତ ଫ୍ଲାଟ୍ ମେଣ୍ଟେନାନ୍ସ ପାଇଁ ପ୍ରତି ମାସରେ ଜିଏସ୍ଟି ଛାଡ଼ ମିଳୁଥିଲା। ଯାହାକୁ ଜାନୁୟାରୀ ୨୫ରୁ ୭୫୦୦ ଟଙ୍କାକୁ ବୃଦ୍ଧି କରାଯାଇଛି। ତେବେ ଏହି ସୀମା ଟପିବା ମାତ୍ରେ ଜିଏସ୍ଟି ଦେବାକୁ ହେବ। ଟିକସ ଅଧିକାରୀଙ୍କ ଉଦ୍ଦେଶ୍ୟରେ ମନ୍ତ୍ରଣାଳୟ ପକ୍ଷରୁ ଏକ ଉଦାହରଣ ଉପସ୍ଥାପନ କରାଯାଇଛି। ଏଥିରେ କୁହାଯାଇଛି ଯେ, ଯଦି ଜଣେ ମାଲିକ ଫ୍ଲାଟ୍ ମେଣ୍ଟେନାନ୍ସ ବାବଦରେ ମାସକୁ ୯ ହଜାର ଟଙ୍କା ଦିଅନ୍ତି, ତେବେ ଏହା ଉପରେ ହିଁ ୧୮% ଜିଏସ୍ଟି ଆଦାୟ ହେବ, ୧୫୦୦ ଟଙ୍କା(୯୦୦୦-୭୫୦୦ ଟଙ୍କା) ଉପରେ ନୁହେଁ। ମନ୍ତ୍ରଣାଳୟ ପକ୍ଷରୁ ଏହା ମଧ୍ୟ ସ୍ପଷ୍ଟ କରାଯାଇଛି ଯେ, ଯଦି ରେସିଡେଣ୍ଟ ଓ୍ବେଲ୍ଫେୟାର ଆସୋସିଏଶନର ଟର୍ନଓଭର ବା କାରବାର ବାର୍ଷିକ ୨୦ ଲକ୍ଷ ଟଙ୍କାରୁ ଅଧିକ ହୋଇ ନ ଥିବ ତେବେ ତାଙ୍କୁ ରେଜିଷ୍ଟ୍ରେଶନ ନମ୍ବର ଏବଂ ଜିଏସ୍ଟି ଦେବାକୁ ପଡିବ ନାହିଁ। ଏ କ୍ଷେତ୍ରରେ ମେଣ୍ଟେନାନ୍ସ ଚାର୍ଜ ୭୫୦୦ ଟଙ୍କାରୁ ଅଧିକ ହେଲେ ମଧ୍ୟ ଛାଡ଼ ମିଳିବ। ମନ୍ତ୍ରଣାଳୟ ପକ୍ଷରୁ ଏହା ମଧ୍ୟ କୁହାଯାଇଛି ଯେ, ଯାହାଙ୍କ ନିକଟରେ କୌଣସି ହାଉସିଂ ସୋସାଇଟି ଅଥବା ରେସିଡେନ୍ସିଆଲ କମ୍ପ୍ଲେକ୍ସରେ ଏକାଧିକ ଫ୍ଲାଟ୍ ରହିଛି, ତାଙ୍କ ପାଇଁ ୭୫୦୦ ଟଙ୍କାରୁ ଊର୍ଦ୍ଧ୍ୱ ପ୍ରତି ମାସ ମେଣ୍ଟେନାନ୍ସ ସୀମା ସ୍ବତନ୍ତ୍ର ଭାବେ ଧରାଯିବ।
