ଗୋପ,୧୩।୩(ଡି.ଏନ୍.ଏ.): ଦୀର୍ଘ ୬ବର୍ଷ ପରେ ପୁରୀ ଜିଲା ଗୋପ ବ୍ଲକର ଆକାଶ କାଣ୍ଡି(୭)ଙ୍କ ଗୋଡ଼ରେ ପଡ଼ିଥିତ୍ବା ଲୁହା ଶିକୁଳି ଫିଟିଛି। ଏବେ ଆକାଶ ସ୍କୁଲକୁ ପାଠ ପଢ଼ିବାକୁ ଯିବା ସହ ସମାଜର ମୁଖ୍ୟ ସ୍ରୋତରେ ସାମିଲ ହୋଇପାରିବ ବୋଲି ଜଣାପଡ଼ିଛି। ତେବେ ଏହା କେବଳ ଗଣମାଧ୍ୟମର ଉଦ୍ୟମ ଯୋଗୁ ମୋ ପୁଅ ସମାଜରେ ଏକ ଭଲ ମଣିଷ ହୋଇପାରିବ ବୋଲି ଏହି ବ୍ଲକ ଅଧୀନ ଦେସ୍ଥଳୀ ପଞ୍ଚାୟତର କୋଲର ଗ୍ରାମର ଧନୁ କାଣ୍ଡି କହିଛନ୍ତି। ଏହାସହ ମୁଖ୍ୟମନ୍ତ୍ରୀଙ୍କ ରିଲିଫ୍ ଫଣ୍ଡରୁ ଆକାଶକୁ ଗୋପ ତହସିଲଦାର ପୃଥିରାଜ ମଣ୍ଡଳ ଗୁରୁବାର ୧୦ ହଜାର ଟଙ୍କା ପ୍ରଦାନ କରିଛନ୍ତି।
ସୂଚନାଯୋଗ୍ୟ, ଆକାଶ ଜନ୍ମ ହେବାର ଏକ ବର୍ଷ ପରେ ମାନସିକ ସ୍ଥିତି ଠିକ୍ ନ ରହିବାରୁୁ ଘରର ଆସବାବପତ୍ର ଭାଙ୍ଗିବା ସହ ମାଆବାପାଙ୍କୁ କୌଣସି କାମ କରାଇ ଦେଇ ନ ଥିଲେ। ଧୀରେ ଧୀରେ ପୁଅର ଏଭଳି ଅବସ୍ଥା ବଢ଼ିବାର ଦେଖି ପରିବାର ଲୋକ ଡାକ୍ତରଖାନାରେ ଦେଖାଇଥିଲେ। ପୁଅର ଅବସ୍ଥା ଠିକ ହେବାକୁ ଅଧିକ ଟଙ୍କା ଖର୍ଚ୍ଚ ହେବ ବୋଲି ଡାକ୍ତରଙ୍କଠାରୁ ଶୁଣିବାପରେ ବାପା ଧନୁ ନିରାଶ ହୋଇଥିଲେ। ଧନୁ ଅତ୍ୟନ୍ତ ଗରିବ ପରିବାରର ହୋଇଥିବାରୁ ଅଧିକ ଚିକିତ୍ସା କରିପାରି ନ ଥିଲେ। ପରେ ମାଆ ବାପା ମୂଲ ଲାଗି ଯିବାବେଳେ ବାଧ୍ୟ ହୋଇ ଗୃହ ନିକଟ ବାଉଁଶ ଭାଡ଼ି ଉପରେ ଆକାଶ ଗୋଡ଼ରେ ଶିକୁଳି ପକାଇ ଯାଉଥିଲେ। ମଜୁରି ଲାଗି ଫେରିବା ପରେ ଆକାଶକୁ ଖାଇବାକୁ ଦେବା ସହ ଘରକୁ ଆଣିଥାନ୍ତି। ଏଭଳି ୬ ବର୍ଷ ଧରି ଶିକୁଳିରେ ବନ୍ଧା ଆକାଶର ଖବର ଜଣାପଡ଼ିବା ପରେ ଗତ ଦୁଇମାସ ତଳେ ଗଣମାଧ୍ୟମରେ ପ୍ରକାଶିତ ହୋଇଥିଲା। ଏହା ଦେଖି ଜିଲାପାଳ ବଲୱନ୍ତ ସିଂଙ୍କ ନିର୍ଦ୍ଦେଶରେ ଗୋପ ତହସିଲଦାର କୋଲର ଗ୍ରାମରେ ପହଞ୍ଚତ୍ଥିଲେ। ପରେ ତହସିଲଦାର ମଣ୍ଡଳ କଟକ ଏସ୍ସିବି ମାନସିକ ବିକୃତ ବିଭାଗକୁ ଏକ ଚିଠି ଲେଖିବା ପରେ କଟକରୁ ଏକ ଟିମ୍ ଆସି ଆକାଶକୁ ଚିକିତ୍ସା ପାଇଁ ନେଇଯାଇଥିଲେ। ଦେଢ଼ ମାସର ଚିକିତ୍ସା ପରେ ଆକାଶ ପ୍ରାୟତଃ ୭୦ ଭାଗ ମାନସିକ ସ୍ତରରେ ଠିକ୍ ହୋଇଥିବା ଜଣାପଡ଼ିଛି। ନିୟମିତ ଔଷଧ ସେବନ କଲେ ନିଶ୍ଚିତ ରୂପରେ ଭଲ ହୋଇଯିବ ବୋଲି ଡାକ୍ତର କହିଥିବା ବାପା ଧନୁ କହିଛନ୍ତି।
