ତେହେରାନ୍/ସିଓଲ,୨ା୩: ଚାଇନାର ଉହାନ ସହରରୁ ସୃଷ୍ଟ କରୋନା ଭୂତାଣୁ ସଂକ୍ରମଣ ଏବେ ପାଖାପାଖି ୬୦ ଦେଶକୁ ବ୍ୟାପିଲାଣି। ଏଥିରେ କେବଳ ଲୋକଙ୍କ ମୃତ୍ୟୁ ଘଟୁଛି ତାହା ନୁହେଁ, ବରଂ ଏହାଦ୍ୱାରା ଅନେକ ଦେଶର ଅର୍ଥନୀତି ମଧ୍ୟ ଗୁରୁତର ଭାବେ ପ୍ରଭାବିତ ହୋଇଛି। ଚାଇନାରେ ସଂକ୍ରମଣ ହାର ପୂର୍ବାପେକ୍ଷା କମିଥିବାବେଳେ ଇରାନ ଓ ଦକ୍ଷିଣ କୋରିଆ ଭଳି ଦେଶରେ ଏହା ଦ୍ରୁତଗତିରେ ମାଡ଼ିଚାଲିଛି, ଯାହା ସାରା ବିଶ୍ୱ ପାଇଁ ଚିନ୍ତାର କାରଣ ପାଲଟିଛି। ଇରାନରେ ରବିବାର ୧୧ ଜଣ କରୋନା ରୋଗୀଙ୍କ ମୃତ୍ୟୁ ହେବା ଫଳରେ ସେଠାରେ ମୋଟ ମୃତ୍ୟୁସଂଖ୍ୟା ୫୪ରେ ପହଞ୍ଚତ୍ଛି। ଏଥିସହିତ ଇରାନରେ ୯୭୮ ଜଣଙ୍କଠାରେ କରୋନା ଭୂତାଣୁ ଚିହ୍ନଟ ହୋଇଛି। ଗତ ୨୪ ଘଣ୍ଟା ମଧ୍ୟରେ ୩୮୫ ନୂଆ ରୋଗୀ ଚିହ୍ନଟ ହୋଇଛନ୍ତି। ଅନ୍ୟପକ୍ଷରେ ଚାଇନା ବାହାରେ ଦକ୍ଷିଣ କୋରିଆରେ ସର୍ବାଧିକ ସଂକ୍ରମଣ ହୋଇଥିବା ଜଣାପଡ଼ିଛି। ସେଠାରେ ରବିବାର ୩୭୬ଜଣଙ୍କଠାରେ କରୋନା ଭୂତାଣୁ ଚିହ୍ନଟ ହେବା ପରେ ମୋଟ ରୋଗୀସଂଖ୍ୟା ୩,୫୨୬ରେ ପହଞ୍ଚତ୍ଥିବା ସରକାରଙ୍କ ପକ୍ଷରୁ କୁହାଯାଇଛି। ସେଠାରେ ବର୍ତ୍ତମାନ ସୁଦ୍ଧା ୨୦ ଜଣଙ୍କ ମୃତ୍ୟୁ ଘଟିଲାଣି। ଦକ୍ଷିଣ କୋରିଆ କର୍ତ୍ତୃପକ୍ଷ ଶିନ୍ଚେଓଞ୍ଜି ଚର୍ଚ୍ଚର ୨,୬୦,୦୦୦ ସଦସ୍ୟଙ୍କ ଯାଞ୍ଚ କରୁଥିବାରୁ ସଂକ୍ରମିତଙ୍କ ସଂଖ୍ୟା ଆହୁରି ବଢ଼ିବା ଆଶଙ୍କା କରାଯାଉଛି। ଦକ୍ଷିଣ କୋରିଆର ବୃହତ୍ ସହର ଡାଏଗୁର ରାସ୍ତାଘାଟ ଏକ ପ୍ରକାର ଶୂନ୍ଶାନ ହୋଇପଡିଛି। ସେଠାରେ ଅଳ୍ପ କେତେକ ଦୋକାନରେ ମାସ୍କ ପିନ୍ଧିଥିବା କିଛି ଲୋକ କିଣାକିଣି କରୁଥିବା ଦେଖିବାକୁ ମିଳିଥିଲା। ଲୋକମାନଙ୍କୁ ଘରେ ରହିବା ପାଇଁ ପରାମର୍ଶ ଦିଆଯାଇଛି। ଦେଶରେ ସପ୍ତାହେ ପାଇଁ ସ୍କୁଲ ଛୁଟି କରିଦିଆଯାଇଥିବାବେଳ ଡାଏଗୁ ସହରରେ ୩ ସପ୍ତାହ ଛୁଟି ଘୋଷଣା କରାଯାଇଛି।
କରୋନା ସଂକ୍ରମଣରେ ଜାପାନ ତୃତୀୟ ସ୍ଥାନରେ ରହିଛି। ସେଠାରେ ୨୨୦ ଜଣଙ୍କଠାରେ ଏହି ଭୂତାଣୁ ଚିହ୍ନଟ ହୋଇଥିବାବେଳେ ଏହାର ଉପକୂଳରେ ଅଟକି ଥିବା ଡାଇମଣ୍ଡ ପ୍ରିନ୍ସେସସ୍ ଜାହାଜରେ ୭୦୫ ଜଣ କରୋନା ସଂକ୍ରମିତ। ଏହା ବ୍ୟତୀତ ବ୍ରିଟେନ, ମାଲେସିଆ, ଥାଇଲାଣ୍ଡ, ଓମାନ, ଲେବାନନ, ଅଷ୍ଟ୍ରେଲିଆ, ସ୍ବିଜରଲାଣ୍ଡ, ନ୍ୟୁଜିଲାଣ୍ଡ, ଗ୍ରୀସ୍, ବେଲାରୁଷ, ଲିଥିଓନିଆ, ଆମେରିକା, ଇଟାଲୀ, ଜର୍ମାନୀ, କୁଏଟ୍, ଫ୍ରାନ୍ସ, ନେଦରଲାଣ୍ଡସ୍, ନାଇଜେରିଆ, ସାନ୍ମାରିନୋ, ଇଷ୍ଟୋନିଆ, ଡେନ୍ମାର୍କ, ବାହାରିନ, ଅଷ୍ଟ୍ରିଆ, ସ୍ପେନ୍, କାନାଡା, ଇରାକ, ୟୁଏଇ, ସିଙ୍ଗାପୁର, ତାଇଓ୍ବାନ, ପାକିସ୍ତାନ, ଆଫଗାନିସ୍ତାନ, ଭିଏତ୍ନାମ, ଫିଲିପାଇନ୍ସ, ନେପାଳ, ଶ୍ରୀଲଙ୍କା, ନରଓ୍ବେ, ବ୍ରାଜିଲ, କ୍ରୋଏସିଆ, ଆଲଜେରିଆ ପ୍ରଭୃତି ଦେଶକୁ କରୋନା ବ୍ୟାପିଥିବା ଜଣାପଡିଛି।
ଚାଇନାରେ ମୃତ୍ୟୁସଂଖ୍ୟା ୨,୮୭୦
ଚାଇନାରେ ରବିବାର ୩୫ ଜଣଙ୍କ ମୃତ୍ୟୁ ହେବା ପରେ ସେଠାରେ ମୋଟ କରୋନା ମୃତ୍ୟୁସଂଖ୍ୟା ୨,୮୭୦ରେ ପହଞ୍ଚତ୍ଛି। ଶନିବାର ୪୭ ଜଣଙ୍କର ମୃତ୍ୟୁ ହୋଇଥିଲା। ସେହିପରି ରବିବାର ୫୭୩ ନୂଆ ରୋଗୀ ଚିହ୍ନଟ ହେବା ପରେ ଚାଇନାରେ ମୋଟ ସଂକ୍ରମିତଙ୍କ ସଂଖ୍ୟା ୭୯,୮୨୪ରେ ପହଞ୍ଚତ୍ଛି। ଗତ ଦୁଇମାସରେ ଚାଇନାରେ ସଂକ୍ରମଣ ଯେଉଁ ହାରରେ ବଢ଼ି ଚାଲିଥିଲା, ତାହା ହ୍ରାସ ପାଇଛି। ହଂକଂରେ କରୋନା ସଂକ୍ରମିତଙ୍କ ସଂଖ୍ୟା ୯୬ରେ ପହଞ୍ଚତ୍ଛି।
