ଜେନେଭା,୧୮ା୨:ଆମେରିକା-ଇରାନ ଯୁଦ୍ଧ ଆଶଙ୍କା ମଧ୍ୟରେ ଉଭୟ ପକ୍ଷଙ୍କ ଭିତରେ ଦ୍ୱିତୀୟ ପର୍ଯ୍ୟାୟ ବୈଠକ ମଙ୍ଗଳବାର ଜେନେଭାରେ ଶେଷ ହୋଇଛି। ପ୍ରାୟ ୩ ଘଣ୍ଟା ଧରି ଚାଲିଥିବା ଏହି ବୈଠକରେ ଉଭୟ ପକ୍ଷର ପ୍ରତିନିଧି ଇରାନର ଆଣବିକ କାର୍ଯ୍ୟକ୍ରମକୁ ନେଇ ଆଲୋଚନା କରିଥିଲେ ମଧ୍ୟ ଏହି ବୈଠକର କୌଣସି ନିଷ୍କର୍ଷ ବାହାରିପାରି ନାହିଁ। ଇରାନର ଆଣବିକ କାର୍ଯ୍ୟକ୍ରମକୁ ନେଇ ଆମେରିକା ସହ ଲାଗି ଆସିଥିବା ବିବାଦର ସମାଧାନ ପାଇଁ ବୈଠକରେ ଆଲୋଚନା ହୋଇଥିଲେ ହେଁ ଏଦିଗରେ କୌଣସି ପକ୍ଷ ସକାରାତ୍ମକ ନିଷ୍ପତ୍ତି ନେଇ ନାହାନ୍ତି ବୋଲି ଇରାନର ଇଣ୍ଟରନ୍ୟାଶନାଲ କ୍ରାଏସିସ୍ ଗ୍ରୁପ୍ ପ୍ରକଳ୍ପ ନିର୍ଦ୍ଦେଶକ ଅଲ୍ଲୀ ଭେଜ୍ କହିଛନ୍ତି। ଇରାନର ୨୦୧୫ ଆଣବିକ ଚୁକ୍ତିକୁ ନେଇ ଗତ ଅଢ଼େଇ ବର୍ଷ ହେଲା ଆମେରିକା ସହ ବିବାଦ ଲାଗି ରହିଛି। ଏହି ବିବାଦକୁ ମାତ୍ର ୩ ଘଣ୍ଟା ମଧ୍ୟରେ କିଭଳି ସମାଧାନ କରାଯାଇପାରିବ ବୋଲି ସେ ପ୍ରଶ୍ନ କରିଛନ୍ତି। ଆଣବିକ କାର୍ଯ୍ୟକ୍ରମର ବିଭିନ୍ନ ଦିଗକୁ ନେଇ ଆଲୋଚନା କରିବା ଆବଶ୍ୟକତା ରହିଥିଲା ବେଳେ ଏଥିପାଇଁ କାହାରି ଧୈର୍ଯ୍ୟ ନାହିଁ । ତେଣୁ ଏହି ବୈଠକରେ କୌଣସି ନିଷ୍ପତ୍ତି ହୋଇପାରି ନାହିଁ ବୋଲି ସେ ପରୋକ୍ଷରେ ସୂଚିତ କରିଛନ୍ତି। ବିଶେଷକରି ଆଣବିକ କାର୍ଯ୍ୟକ୍ରମ ଆଲୋଚନା ପ୍ରକ୍ରିୟାରେ କଟକଣା ହଟାଇବା ଲାଗି ଇରାନ ବଡ଼ ସର୍ତ୍ତ ରଖିଥିଲା ବେଳେ ଏଥିପାଇଁ ଆମେରିକା କିଛି ସ୍ପଷ୍ଟ କରୁନାହିଁ ; ଯେଉଁଥିପାଇଁ ସମାଧାନ ବାହାରିବା କଷ୍ଟକର ବୋଲି ସେ କହିଛନ୍ତି। ଅନ୍ୟପକ୍ଷରେ ଏହି ବୈଠକକୁ ନେଇ ଆମେରିକା ପକ୍ଷରୁ କୌଣସି ପ୍ରତିକ୍ରିୟା ପ୍ରକାଶ କରାଯାଇ ନଥିଲା ବେଳେ ଇରାନର ସର୍ବୋଚ୍ଚ ନେତା ଆୟାତୋଲ୍ଲା ଖାମ୍ନେଇ କହିଛନ୍ତି, ଆମେରିକା ଇରାନକୁ ଧ୍ୱଂସ କରିପାରିବ ନାହିଁ। ଆଲୋଚନା ଚାଲିଥିଲା ବେଳେ ଇରାନ ସେନା ପକ୍ଷରୁ ହାର୍ମୁଜ୍ ପ୍ରଣାଳୀରେ ସାମରିକ ଡ୍ରିଲ୍ କରାଯିବା ସହିତ ୫ରୁ ଅଧିକ କ୍ଷେପଣାସ୍ତ୍ର ନିକ୍ଷେପ କରାଯାଇଛି। ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ବାରମ୍ବାର ଇରାନକୁ ଯୁଦ୍ଧ ଧମକ ଦେଇ ଆସିଥିଲା ବେଳେ ଦ୍ୱିତୀୟ ପର୍ଯ୍ୟାୟ ଆଲୋଚନା ପରେ ଯୁଦ୍ଧ ଆଶଙ୍କା ଦୂରହେବ ବୋଲି ଆଶା କରାଯାଉଥିଲା। କିନ୍ତୁ ସେଭଳି କିଛି ହୋଇନାହିଁ। ଏଭଳି ସ୍ଥିତିରେ ଆମେରିକା କି ଆଭିମୁଖ୍ୟ ଗ୍ରହଣ କରିବ ତାହା ଉପରେ ଏବେ ସମସ୍ତଙ୍କ ନଜର ରହିଛି।
Dharitri – Odisha’s No.1 Odia Daily
