ନୂଆଦିଲ୍ଲୀ,୧୮।୨: ଭାରତରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବା AI କ୍ଷେତ୍ରରେ ଏକ ବଡ଼ ବିପ୍ଳବ ଆସିବାକୁ ଯାଉଛି। ଟେକ୍ ଜଗତର କମ୍ପାନୀ ‘ଗୁଗୁଲ’ ଭାରତରେ ବ୍ୟାପକ ପୁଞ୍ଜି ନିବେଶ ପାଇଁ ବଡ଼ ଘୋଷଣା କରିଛି। ଗୁଗୁଲ ସିଇଓ ସୁନ୍ଦର ପିଚାଇଙ୍କ ସୂଚନା ଅନୁସାରେ, ଆସନ୍ତା ୫ ବର୍ଷ ମଧ୍ୟରେ କମ୍ପାନୀ ଭାରତରେ ପ୍ରାୟ ୧୫ ବିଲିୟନ ଡଲାର (୧,୩୬୦ ଅରବ ଟଙ୍କା) ନିବେଶ କରିବ।
ଭାରତ ଓ ଆମେରିକା ମଧ୍ୟରେ AI ସଂଯୋଗକୁ ସୁଦୃଢ଼ କରିବା ପାଇଁ ‘ଇଣ୍ଡିଆ-ଆମେରିକା କନେକ୍ଟ ଇନିସିଏଟିଭ୍’ ଅଧୀନରେ ସମୁଦ୍ର ତଳେ ହାଇ-ସ୍ପିଡ୍ କେବୁଲ୍ ବିଛାଯିବ। ଆନ୍ଧ୍ରପ୍ରଦେଶର ବିଶାଖାପାଟଣାରେ ଏକ ମେଗା AI ଡାଟା ସେଣ୍ଟର ନିର୍ମାଣ କରାଯିବ, ଯାହା ଭାରତକୁ ବିଶ୍ୱସ୍ତରୀୟ AI କେନ୍ଦ୍ରରେ ପରିଣତ କରିବ। ଦେଶର ୮୦୦ଟି ଜିଲାରେ ପ୍ରାୟ ୨ କୋଟି ସରକାରୀ କର୍ମଚାରୀଙ୍କୁ ଗୁଗଲ୍ କ୍ଲାଉଡ୍ ଇନଫ୍ରାଷ୍ଟ୍ରକ୍ଚର ପ୍ରଦାନ କରାଯିବ।
ଏଥିସହିତ ‘ଅଟଳ ଟିଙ୍କରିଂ ଲ୍ୟାବ୍ସ’ ସହ ମିଶି ୧୦,୦୦୦ ସ୍କୁଲର ୧.୧ କୋଟି ଛାତ୍ରଛାତ୍ରୀଙ୍କୁ AI, ରୋବୋଟିକ୍ସ ଏବଂ କୋଡିଂ ଶିକ୍ଷା ଦିଆଯିବ। ଏଥିସହ ହିନ୍ଦୀ ଓ ଇଂରାଜୀରେ ‘ଗୁଗଲ୍ AI ପ୍ରଫେସନାଲ୍ ସାର୍ଟିଫିକେଟ୍’ ପ୍ରୋଗ୍ରାମ ମଧ୍ୟ ଆରମ୍ଭ ହେବ। ଗୁଗଲ୍ ରିସର୍ଚ୍ଚକୁ ପ୍ରୋତ୍ସାହନ ଦେବା ପାଇଁ ୩ କୋଟି ଡଲାରର ‘AI ଫର୍ ସାଇନ୍ସ ଇମ୍ପାକ୍ଟ ଚ୍ୟାଲେଞ୍ଜ’ ଘୋଷଣା କରିଛି।
ଏହି ଅବସରରେ ଗୁଗଲ୍ ସିଇଓ ସୁନ୍ଦର ପିଚାଇ କହିଛନ୍ତି, “ଭାରତରେ ଏଭଳି ପରିବର୍ତ୍ତନ ହେଉଛି, ଯାହାଫଳରେ ପରବର୍ତ୍ତୀ ବିଶ୍ୱସ୍ତରୀୟ AI କମ୍ପାନୀ ଭାରତରୁ ହିଁ ବାହାରିବ।”
