ଭୋଗରାଇ, ୧୪।୧୨(ଡି.ଏନ.ଏ.)-ବାଲେଶ୍ୱର ଜିଲା ସୀମାନ୍ତ ଜଳେଶ୍ୱର ଓ ଭୋଗରାଇ ଅଞ୍ଚଳରେ ହୋଟେଲ ଏବଂ ଲଜ୍ରେ ବେଧଡ଼କ ଦେହ ବ୍ୟବସାୟ ହେଉଥିବା ଭିଡ଼ିଓ ଭାଇରାଲ ଓ ଗଣମାଧ୍ୟମରେ ପ୍ରଚାର ହେବା ପରେ ପୋଲିସ ତପତ୍ର ହୋଇପଡ଼ିଛି। ଏସ୍ଡ଼ିପିଓ ଅଙ୍କିତା କୁମ୍ଭାରୀଙ୍କ ନେତୃତ୍ୱରେ ତାଳସାରୀ ମେରାଇନ ଥାନା ଓ ଜଳେଶ୍ୱର ଥାନା ସହାୟତାରେ ପୋଲିସ ପକ୍ଷରୁ ବିଭିନ୍ନ ହୋଟେଲରେ ଅଚାନକ ଚଢ଼ାଉ କରାଯାଇଛି। ହେଲେ ଦେହ ବ୍ୟବସାୟରେ ସମ୍ପୃକ୍ତ ଥିବା ଯୁବତୀ ଓ ଯୁବକଙ୍କୁ ଗିରଫ କରାଯାଇ ପାରିନାହଁି। ତାଳସାରୀ ବେଳାଭୂମି ସଂଲଗ୍ନ ହୋଟେଲ ସାଗର କନ୍ୟାର ମ୍ୟାନେଜର ନେରୁପଦ ରାଉତ (୫୬) ଓ ସାଗର ସୈକତର ମ୍ୟାନେଜର ଶେକ ସାଦାମ୍ (୩୨)ଙ୍କୁ ପୋଲିସ ଗିରଫ କରିଛି। ପୋଲିସ ୨ ହୋଟେଲର ମ୍ୟାନେଜରଙ୍କ ବିରୋଧରେ ପୃଥକ ମାମଲା (ନଂ. ୬୪ ଓ ୬୫/୧୯) ରୁଜୁ କରି ତଦନ୍ତ ଆରମ୍ଭ କରିଛି। ଏହାସହିତ ହୋଟେଲ ସାଗର କନ୍ୟା ଓ ସାଗର ସୈକତକୁ ସିଲ୍ କରାଯାଇଛି।
ଉଦୟପୁର, ତାଳସାରୀ, ଚନ୍ଦନେଶ୍ୱର, ସାହାବାଜିପୁରର ବିଭିନ୍ନ ହୋଟେଲ ଓ ଲଜ୍ରେ ଦେହ ବ୍ୟବସାୟ ହେଉଥିବା ନେଇ ପୂର୍ବରୁ ଅଭିଯୋଗ ହୋଇ ଆସୁଥିଲା। ଗତ ଜୁଲାଇ ୧୦ତାରିଖରେ ସାହାବାଜିପୁର କିଆଗଡ଼ିଆ ମଠ ସମ୍ମୁଖ ସୁଭଦ୍ରା ଗେଷ୍ଟ ହାଉସରେ ଦେହ ବ୍ୟବସାୟରେ ଲିପ୍ତ ଥିବା ୨ବଙ୍ଗୀୟ ଯୁବତୀଙ୍କୁ ସ୍ଥାନୀୟ ଲୋକେ ଉଦ୍ଧାର କରିଥିଲେ। ପୂର୍ବରୁ ସାଗର କନ୍ୟା ହୋଟେଲରୁ ୬ ଯୁବତୀଙ୍କ ସହିତ ୬ ଗ୍ରାହକଙ୍କୁ ଗିରଫ କରାଯାଇଥିଲା। ଜଳେଶ୍ୱର ଷ୍ଟେସନ ବଜାର ଏକ ହୋଟେଲରୁ ୩ଜଣ ଦେହ ବ୍ୟବସାୟୀଙ୍କୁ ମଧ୍ୟ ପୋଲିସ ଗିରଫ କରିଥିଲା। ଏତଦ୍ଭିନ୍ନ ଜଳେଶ୍ୱର ଜାତୀୟ ରାଜପଥରେ ଥିବା ହୋଟେଲ ଓ ଲଜ୍ ସହ ଭୋଗରାଇର ଚନ୍ଦନେଶ୍ୱର, ଲକ୍ଷ୍ମୀନାରାୟଣ ମନ୍ଦିର ଦକ୍ଷିଣ ପାର୍ଶ୍ୱ ଓ ବର୍ଡ଼ରରେ ଦେହ ବ୍ୟବସାୟ ଚାଲୁ ରହିଥିବା ଅଭିଯୋଗ ହୋଇଛି। ପୋଲିସର ଚଢ଼ାଉ ପରେ ହୋଟେଲ ମାଲିକ ସହ ମ୍ୟାନେଜରଙ୍କ କୋକୁଆ ଭୟ ସୃଷ୍ଟି ହୋଇଛି।
