ବିଶାଖାପଟନମ,୧୨।୪: କରୋନା ସଙ୍କଟ ସମୟରେ ପୋଲିସ, ଡାକ୍ତର ଓ କେତେଜଣ ଅଧିକାରୀଙ୍କ ମାନବିକତାର ଚିତ୍ର ଗୋଟିଏ ପରେ ଗୋଟିଏ ସାମ୍ନାକୁ ଆସୁଛି। ଏମାନେ ନିଜ ଘର ପରିବାର ଛାଡି ସମାଜର ଚିନ୍ତା କରୁଛନ୍ତି। ଏମିତି ଜଣେ ମହିଳା ଆଇଏଏସ୍ ଅଫିସରଙ୍କ କଥା ସାମ୍ନାକୁ ଆସିଛି। ଶୃଜନା ଗୁମାଲ୍ଲା ନାମକ ଏହି ମହିଳା ଆଇଏଏସ୍ ଅଫିସର ଆନ୍ଧ୍ରପ୍ରଦେଶର ଗ୍ରେଟର ବିଶାଖାପାଟନମରେ ମ୍ୟୁନିସିପାଲ କମିଶନର ଭାବେ ନିଯୁକ୍ତ ହୋଇଛନ୍ତି। ତାଙ୍କୁ ଏବେ ୬ ମାସର ମ୍ୟାଟରନିଟି ଲିଭ୍ ଦିଆଯାଇଥିଲା ହେଲେ କରୋନା ସଙ୍କଟକୁ ଦୃଷ୍ଟିରେ ରଖି ସେ ତାଙ୍କର ଛୁଟି ବାତିଲ କରିବା ସହ ମାତ୍ର ୨୨ ଦିନର ସନ୍ତାନକୁ ସାଥିରେ ଧରି ଅଫିସ ଆସିଥିବା ଦେଖାଯାଇଛି। କରୋନା ଭାଇରସକୁ ନେଇ ସାରା ଦେଶରେ ଲକ୍ଡାଉନ ଚାଲିଥିବା ବେଳେ ଯେଉଁ ସବୁ ବିଭାଗ କାମ କରୁଛନ୍ତି ସେମାନେ ପ୍ରାୟ ୨୪ ଘଣ୍ଟା କାମ କରୁଛନ୍ତି କହିଲେ ଚଳେ। ତେଣୁ ଏହି ସମୟରେ ସେ ଜଣେ ଅଧିକାରୀ ଭାବେ ତାଙ୍କର କିଛି କର୍ତ୍ତବ୍ୟ ରହିଥିବା ଭାବି ଆଇଏଏସ୍ ଅଫିସର ଶୃଜନା ତାଙ୍କ ଛୁଟି ବାତିଲ କରି କାର୍ଯ୍ୟରେ ଯୋଗ ଦେଇଥିବା କହିଛନ୍ତି।
