ପୁରୀ ଅଫିସ, ୧୪ା୩:ମାଟିତୋଟା ଅଞ୍ଚଳରେ ପ୍ରସ୍ତାବିତ ଆଦର୍ଶ ଗୁରୁକୁଳରେ ଖୁବ୍ଶୀଘ୍ର ସେବାୟତ ପରିବାରର ବିଦ୍ୟାର୍ଥୀମାନେ ପାଠ ପଢ଼ିବେ। ଏ ନେଇ ପୂର୍ବରୁ ବିର୍ଲା ଫାଉଣ୍ଡେଶନ ସହ ଏମ୍ଓୟୁ ସରିଥିବାବେଳେ ୨୦୨୪ ମସିହାରୁ ପାଠ୍ୟକ୍ରମ ଆରମ୍ଭ ହେବା ନେଇ ନିଷ୍ପତ୍ତି ହୋଇଛି। ସୋମବାର ବଡ଼ଦାଣ୍ଡସ୍ଥିତ ଶ୍ରୀମନ୍ଦିର ପ୍ରଶାସନିକ କାର୍ଯ୍ୟାଳୟରେ ଅନୁଷ୍ଠିତ ଶ୍ରୀମନ୍ଦିର ପରିଚାଳନା କମିଟିର ଏକ ସ୍ବତନ୍ତ୍ର ବୈଠକରେ ଆଦର୍ଶ ଗୁରୁକୁଳ ସମ୍ପର୍କରେ ଆଲୋଚନା କରାଯାଇଛି। ବୈଠକରେ ପରିଚାଳନା କମିଟି ଅଧ୍ୟକ୍ଷ ଗଜପତି ମହାରାଜା ଦିବ୍ୟସିଂହ ଦେବ ଅଧ୍ୟକ୍ଷତା କରିଥିଲେ। ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀର ବିକ୍ରମ ଯାଦବ, ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ, ଉନ୍ନୟନ ପ୍ରଶାସକ ଅଜୟ କୁମାର ଜେନା, ଏସ୍ପି କନୱର ବିଶାଲ ସିଂ, ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ଏବଂ ବିର୍ଲା ଫାଉଣ୍ଡେଶନର ସଦସ୍ୟଙ୍କ ସହ ଅନ୍ୟ ଅଧିକାରୀମାନେ ଉପସ୍ଥିତ ଥିଲେ।
ପରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ବୀର ବିକ୍ରମ ଯାଦବ ସୂଚନା ଦେଇ କହିଛନ୍ତି, ସେବାୟତଙ୍କ ପାଇଁ ହେବାକୁ ଥିବା ଗୁରୁକୁଳର ଲେ-ଆଉଟ ପ୍ଲାନ ଅନୁମୋଦନ ନେଇ ଆଲୋଚନା ହୋଇଥିଲା। ଲେ ଆଉଟ ପ୍ଲାନ ଅନୁମୋଦନ କରାଯାଇଛି। ପୂର୍ବରୁ ବିର୍ଲା ଫାଉଣ୍ଡେଶନ ସହ ଏମ୍ଓୟୁ ସ୍ବାକ୍ଷରିତ ହୋଇସାରିଛି। ଏହି ଗୁରୁକୁଳରେ ଶ୍ରୀମନ୍ଦିର ସେବାୟତ ପରିବାରର ପିଲା ଓ ବାହାର ବିଦ୍ୟାର୍ଥୀ ପଢ଼ିପାରିବେ। ତେବେ ସେବାୟତ ଘରର ପିଲାଙ୍କ ପାଇଁ ୫୦ ପ୍ରତିଶତ ସିଟ୍ ଆରକ୍ଷଣ ରହିବ। ବୈଠକରେ ଏହାପରେ ସମ୍ପୂର୍ଣ୍ଣ ଡ୍ରଇଁ ପ୍ରସ୍ତୁତ କରାଯିବ। ପରେ କାର୍ଯ୍ୟ ପାଇଁ ଟେଣ୍ଡର ଡକାଯିବ। ଯଥାଶୀଘ୍ର ଶିକ୍ଷା ପାଠ୍ୟକ୍ରମ ଆରମ୍ଭ କରିବା ପାଇଁ ଚେଷ୍ଟା ଚାଲିଛି। ସମୁଦାୟ ୩୨ ଏକର ଜାଗାରେ ଗୁରୁକୁଳ ନିର୍ମାଣ କରାଯିବ ବୋଲି ଯାଦବ କହିଛନ୍ତି।
ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ଦୁର୍ଗାଦାସ ମହାପାତ୍ର କହିଛନ୍ତି, ଆଗାମୀ ଦିନରେ ସମସ୍ତ ତଥ୍ୟ ଆସିବା ଓ ମାଟି ପରୀକ୍ଷା ପରେ ଗୁରୁକୁଳ ନିର୍ମାଣ ପାଇଁ ଟେଣ୍ଡର ଡକାଯିବ। ପରେ ପଞ୍ଜିକା ଦେଖାଯାଇ ଶୁଭତିଥି ନିର୍ଣ୍ଣୟ କରାଯାଇ ମୁଖ୍ୟମନ୍ତ୍ରୀ ଏବଂ ଗଜପତି ମହାରାଜାଙ୍କ ଉପସ୍ଥିତିରେ ଗୁରୁକୂଳ ପାଇଁ ଭୂମି ପୂଜନ କରାଯିବାକୁ ବୈଠକରେ ନିଷ୍ପତ୍ତି ହୋଇଛି। ଗୁରୁକୁଳ ଚଳାଇବା ପାଇଁ ଗଠିତ ସୋସାଇଟି ସହ ଆଗକୁ ବୈଠକ ବସିବ। ସମ୍ପୃକ୍ତ ସ୍ଥାନକୁ ସୋସାଇଟିକୁ ହସ୍ତାନ୍ତର କରାଯିବ। ଆଉ କିଛି ଯାହା ପ୍ରକ୍ରିୟା ରହିଛି ତାହା ଶେଷ କରାଯିବ ବୋଲି ସେ ପ୍ରକାଶ କରିଛନ୍ତି। ପରିଚାଳନା କମିଟି ସଦସ୍ୟ ମାଧବ ପୂଜାପଣ୍ଡା କହିଛନ୍ତି, ସମୁଦାୟ ୩୨ ଏକର ଜମିରେ ଏକାଡେମିକ ଭବନ, ଯଜ୍ଞଶାଳା, ଖେଳପଡ଼ିଆ ଓ ହଷ୍ଟେଲ ପ୍ରଭୃତି ନିର୍ମାଣ କରାଯିବ। ୬ ଏକର ଜାଗାରେ ହଷ୍ଟେଲ, ୮ ଏକରରେ ଖେଳପଡ଼ିଆ, ୪ ଏକରରେ ମନ୍ଦିର ନିର୍ମାଣ ହେବ। ପ୍ରଥମେ ଏକାଡେମୀ ସେକ୍ସନ ନିର୍ମାଣ କରାଯିବ ବୋଲି ସେ କହିଛନ୍ତି।
