ମୁମ୍ବାଇ,୨୩।୧୧: ସମ୍ପ୍ରତି ମହାରାଷ୍ଟ୍ରରେ ହୋଇଥିବା ରାଜନୈତିକ ସ୍ଥିତି ୧୯୯୧ରେ କେନ୍ଦ୍ରରେ ଅବସ୍ଥା ସହିତ ମେଳ ଖାଉଛି। ସେତେବେଳେ ପ୍ରଧାନମନ୍ତ୍ରୀ ଡୋର ଧରିବା ନେଇ ହୋଇଥିବା ଡ୍ରାମାରେ ଶରଦ ପାଓ୍ବାର ପଛୁଆ ପଡ଼ିଯାଇଥିଲେ। ପ୍ରଧାନମନ୍ତ୍ରୀ ପଦ ପାଇଁ ଶରଦଙ୍କୁ ନେଇ ଚର୍ଚ୍ଚା ହେଉଥିବାବେଳେ ରାତାରାତି ସୋନିଆ ଗାନ୍ଧୀ ପି.ଭି. ନରସିଂହ ରାଓଙ୍କୁ ଏହି ପଦବୀରେ ବସାଇବା ଳାଗି ନିଷ୍ପତ୍ତି ନେଇଥିଲେ। ଏସମ୍ପର୍କରେ ଶରଦ ନିଜର ପୁସ୍ତକ ‘ଲାଇଫ୍ ଅନ୍ ମାଇଁ ଟର୍ମସ୍: ଫ୍ରମ୍ ଗ୍ରାସ୍ରୁଟ୍ ଆଣ୍ଡ କୋରିଡ଼ରର୍ସ ଅଫ୍ ପାଓ୍ବାର’ରେ ଉଲ୍ଲେଖ କରିଛନ୍ତି। ଗାନ୍ଧୀ ପରିବାର ଜଣେ ମୁକ୍ତ ଚିନ୍ତାଧାରା ରଖୁଥିବା ବ୍ୟକ୍ତିଙ୍କୁ ପ୍ରଧାନମନ୍ତ୍ରୀ ପଦରେ ବସାଇବାକୁ ଚାହୁଁ ନ ଥିବା ସେ ପୁସ୍ତକରେ ଲେଖିଛନ୍ତି। ସେହିପରି ଏବେ କଂଗ୍ରେସ-ଶିବସେନାକୁ ଝଟ୍କା ଦେଇ ଏନ୍ସିପି ଭାଜପାର ହାତ ଧରି ମହାରାଷ୍ଟ୍ରରେ ସରକାର ଗଠନ କରିଛି। ଅଜିତ୍ ପାଓ୍ବାର ଭାଜପା ସହିତ ଗୁପ୍ତ ବୁଝାମଣା କରି ପୁଣି ଥରେ ଦେବେନ୍ଦ୍ର ଫଡ଼ନବିସଙ୍କୁ ମୁଖ୍ୟମନ୍ତ୍ରୀ କରାଇବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ସେଥିପାଇଁ ଅଜିତ୍ଙ୍କୁ ଉପମୁଖ୍ୟମନ୍ତ୍ରୀ ପଦ ମିଳିଛି। ଅଜିତ୍ କହିଛନ୍ତି ଯେ, ଏସମ୍ପର୍କରେ ଶରଦଙ୍କୁ ପୂର୍ବରୁ ଜଣାଇଥିଲେ। ତେବେ ଏହାକୁ ଶରଦ ଅସ୍ବୀକାର କରିଛନ୍ତି। ମାତ୍ର ଅଜିତ୍ଙ୍କ ଏଭଳି ମନ୍ତବ୍ୟ ଶରଦଙ୍କ ଲାଗି ସମସ୍ୟା ସୃଷ୍ଟି କରିପାରେ ବୋଲି କୁହାଯାଉଛି।
