କୋଲକାତା,୯।୬: କରୋନା ଭାଇରସ ସଂକ୍ରମଣ ଦେଶରେ ଦ୍ରୁତ ଗତିରେ ବଢି ଚାଲିଥିବା ବେଳେ ଏପର୍ଯ୍ୟନ୍ତ ଏହାର କୌଣସି ଭ୍ୟାକ୍ସିନ ମଧ୍ୟ ଆସିପାରି ନାହିଁ। ଆମେରିକା ଭଳି ବିକାଶଶୀଳ ଦେଶ ମଧ୍ୟ କରୋନା ଆଗରେ ଏକ ପ୍ରକାର ହାର ମାନିଛି କହିଲେ ଚଳେ। ତେବେ କରୋନା ସହ ଲଢିବାକୁ ରୋଗ ପ୍ରତିରୋଧକ ଶକ୍ତି ବୃଦ୍ଧି କରିବାକୁ ଅନେକେ ପରାମର୍ଶ ଦେଉଛନ୍ତି। ଇତି ମଧ୍ୟରେ କୋଲକାତାର ଏକ ମିଠା ଦୋକାନୀ ୧୫ ପ୍ରକାର ଜଡିବୁଟିର ମିଶ୍ରଣରୁ ଏକ ମିଠା ପ୍ରସ୍ତୁତ କରିଛନ୍ତି। ଆଉ ଏହାକୁ ନେଇ ସେ ଦାବି କରିଛନ୍ତି ଏହାକୁ ଖାଇଲେ ଶରୀରର ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇବ। ଏହାକୁ କିଛିଦିନ ଖାଇବା ପରେ ଏହା କରୋନା ଭଳି ଭାଇରସ ସହ ଲଢିବାକୁ ଶରୀରର ରୋଗ ପ୍ରତିରୋଧକ କ୍ଷମତା ବୃଦ୍ଧି କରିବ। ପଶ୍ଚିମବଙ୍ଗର ବହୁ ପୁରୁଣା ତଥା ପ୍ରସିଦ୍ଧ ମିଠା ବ୍ୟବସାୟୀ ବାଲାରାମ ଓ ରାଧାରମଣ ମୁଲ୍ଲିକ କହିଛନ୍ତି ୧୫ ପ୍ରକାର ଜଟିବୁଟିକୁ ନେଇ ତିଆରି ହୋଇଥିବା ଏହି ମିଠାର ନାମ ସେ (ଇମ୍ୟୁନିଟି ସନ୍ଦେଶ) ରଖିଛନ୍ତି। ଦୋକାନ ମାଲିକ କହିଛନ୍ତି ଉକ୍ତ ମିଠାରେ ତୁଳସୀ, ହଳଦୀ, ଛୋଟ ଗୁଜରାତି, ଜଷ୍ଟିମଧୁ, ଜାଇଫଳ, ଅଦା, ପିପଳି, ଗୋଲ ମରିଚ, ତେଜପତ୍ର ଆଦି ମିଶ୍ରଣ କରାଯାଇଛି। ଏହାପରେ ଏଥିରେ ଛେନା ଓ ଡ୍ରାଏ ଫ୍ରୁଟ୍ସ ମିଶାଇ ମିଠା ପ୍ରସ୍ତୁତ କରାଯାଇଛି ବୋଲି ଉକ୍ତ ବ୍ୟବସାୟୀ କହିଛନ୍ତି। ଏଥିରେ ଗୁଡ ଅବା ଚିନି ସ୍ଥାନରେ ହିମାଳୟ ମହୁ ବ୍ୟବହାର କରାଯାଇଛି କାରଣ ଏଥିରେ ଔଷଧିୟ ଗୁଣ ନଷ୍ଟ ହେବନାହିଁ ବୋଲି କୁହାଯାଇଛି। ମିଠା ବ୍ୟବସାୟୀ କହିଛନ୍ତି କରୋନା ସଂକ୍ରମଣ ସମୟରେ ଏହି ମିଠାଦ୍ୱାରା ଶରୀରର ରୋଗ ପ୍ରତିରୋଧକ ଶକ୍ତି ବୃଦ୍ଧି ପାଇପାରିବ। ଏହି ଖବର ଏବେ ସୋସିଆଲ ମିଡିଆରେ ଭାଇରାଲ ହେଉଛି।
