ନ୍ୟୁୟର୍କ, ୫।୯ (ଏଏଫ୍ପି)- ଚଳିତ ବର୍ଷର ଅନ୍ତିମ ତଥା ୪ର୍ଥ ଗ୍ରାଣ୍ଡସ୍ଲାମ ଟେନିସ ପ୍ରତିଯୋଗିତା ୟୁଏସ୍ ଓପନ୍ର କ୍ୱାର୍ଟର ଫାଇନାଲରେ ବଡ଼ ବିପର୍ଯ୍ୟୟ ଦେଖିବାକୁ ମିଳିଛି। ୨୦ଥର ଗ୍ରାଣ୍ଡସ୍ଲାମ ଚାମ୍ପିୟନ ତଥା କିମ୍ବଦନ୍ତୀ ସୁଇଜରଲାଣ୍ଡ ଟେନିସ ଖେଳାଳି ରୋଜର ଫେଡରର କ୍ୱାର୍ଟର ଫାଇନାଲରୁ ବିଦାୟ ନେଇଛନ୍ତି। ପୁରୁଷ ସିଙ୍ଗଲ୍ସର ଏକ ସଂଘର୍ଷପୂର୍ଣ୍ଣ କ୍ୱାର୍ଟର ଫାଇନାଲ ମ୍ୟାଚ୍ରେ ୩୮ ବର୍ଷୀୟ ଫେଡରର ୩-୬, ୬-୪, ୩-୬, ୬-୪, ୬-୨ ସେଟ୍ରେ ଟୁର୍ନାମେଣ୍ଟର ସର୍ବନିମ୍ନ ମାନ୍ୟତାପ୍ରାପ୍ତ ବୁଲଗେରିଆର ଗ୍ରିଗର ଦିମିତ୍ରୋଭାଙ୍କ ନିକଟରୁ ପରାଜୟବରଣ କରିଛନ୍ତି। ବିଶ୍ୱ ମାନ୍ୟତାର ୭୮ତମ ସ୍ଥାନରେ ରହିଥିବା ୨୮ ବର୍ଷୀୟ ଦିମିତ୍ରୋଭା ସେମିଫାଇନାଲରେ ୫ମ ସିଡ୍ ରୁଷିଆର ଡାନିଲ ମେଡଭେଡେଭଙ୍କୁ ଶୁକ୍ରବାର ଭେଟିବେ। ଦିମିତ୍ରୋଭାଙ୍କ ବିପକ୍ଷରେ ଶେଷ ୭ଟି ମୁକାବିଲାରେ ବିଜୟ ହାସଲ କରି ଫେଭରାଉଟ୍ ବିବେଚିତ ହେଉଥିବା ୫ଥର ୟୁଏସ୍ ଓପନ୍ ବିଜେତା ଫେଡରରଙ୍କୁ କିନ୍ତୁ ଶେଷରେ ନିରାଶ ହେବାକୁ ପଡ଼ିଛି। ଦିମିତ୍ରୋଭା କ୍ୟାରିୟରର ପ୍ରଥମଥର ଲାଗି ଏହି ସମ୍ମାନଜନକ ପ୍ରତିଯୋଗିତାର ଅନ୍ତିମ-୪ ରାଉଣ୍ଡରେ ପ୍ରବେଶ କରିଛନ୍ତି। ୧୯୯୧ରେ ଜିମ୍ମି କନର୍ସ (୧୭୪ତମ)ସର୍ବନିମ୍ନ ମାନ୍ୟତା ପ୍ରାପ୍ତ ଖେଳାଳି ଭାବେ ୟୁଏସ୍ ଓପନ୍ କ୍ୱାର୍ଟର ଫାଇନାଲରେ ପ୍ରବେଶ କରିଥିଲେ। ଏବେ କିନ୍ତୁ ଦିମିତ୍ରୋଭା ସର୍ବନିମ୍ନ ମାନ୍ୟତାପ୍ରାପ୍ତ ଖେଳାଳିଭାବେ ଏଠାରେ ସେମିଫାଇନାଲରେ ପହଞ୍ଚତ୍ଛନ୍ତି।
ସେରେନାଙ୍କ ୧୦୦ତମ ୟୁଏସ୍ ଓପନ୍ ବିଜୟ
ଆମେରିକାର ଷ୍ଟାର୍ ମହିଳା ଟେନିସ ଖେଳାଳି ସେରେନା ଓ୍ବିଲିୟମ୍ସ କ୍ୟାରିୟରରେ ୧୦୦ତମ ୟୁଏସ୍ ଓପନ୍ ମ୍ୟାଚ୍ ଜିତିଛନ୍ତି। ଏଠାରେ ଖେଳାଯାଇଥିବା ମହିଳା ସିଙ୍ଗଲ୍ସ କ୍ୱାର୍ଟର ଫାଇନାଲ ମ୍ୟାଚ୍ ଅବସରରେ ସେରେନା ଏହି କୃତୀତ୍ୱ ହାସଲ କରିଛନ୍ତି। ଏହି ମ୍ୟାଚ୍ରେ ସେରେନା ୬-୧, ୬-୦ ସିଧାସଳଖ ସେଟ୍ରେ ଚାଇନାର ଓ୍ବାଙ୍ଗ୍ କ୍ୱିଙ୍ଗ୍ଙ୍କୁ ପରାସ୍ତ କରି ସେମିଫାଇନାଲରେ ପ୍ରବେଶ କରିବା ସହ ନ୍ୟୁୟର୍କରେ ୧୦୦ତମ ବିଜୟ ସ୍ବାଦ ଚାଖିଛନ୍ତି। ଛ’ଥର ୟୁଏସ୍ ଓପନ୍ ବିଜୟିନୀ ସେରେନାଙ୍କୁ ଏହି ମ୍ୟାଚ୍ ଜିତିବାକୁ ମାତ୍ର ୪୪ ମିନିଟ୍ ସମୟ ଲାଗିଥିଲା। ଚଳିତ ବର୍ଷ ଏହି ଟୁର୍ନାମେଣ୍ଟରେ ସବୁଠାରୁ କମ୍ ସମୟ ମଧ୍ୟରେ ଶେଷ ହୋଇଥିବା ମ୍ୟାଚ୍ର ମାନ୍ୟତା ପାଇଛି। ସେମିଫାଇନାଲରେ ୩୭ ବର୍ଷୀୟା ସେରେନାଙ୍କ ମୁକାବିଲା ୫ମ ସିଡ୍ ୟୁକ୍ରେନର ଏଲିନା ସ୍ବିତୋଲିନାଙ୍କ ସହ ହେବ। ଅନ୍ୟଏକ ମହିଳା ସିଙ୍ଗଲ୍ସ କ୍ୱାର୍ଟର ଫାଇନାଲରେ ଏଲିନା ୬-୪, ୬-୪ ସିଧାସଳଖ ସେଟ୍ରେ ବ୍ରଟେନର ଜୋହାନ କୋଣ୍ଟାଙ୍କୁ ପରାସ୍ତ କରି ଅନ୍ତିମ-୪ରେ ପ୍ରବେଶ କରିଛନ୍ତି। ୨୦୧୭ ସେପ୍ଟେମ୍ବରରେ ମାତୃତ୍ୱ ଲାଭ କରିବା ପରଠାରୁ ସେରେନା କୌଣସି ଗ୍ରାଣ୍ଡସ୍ଲାମ ପ୍ରତିଯୋଗିତା ଜିତିପାରି ନାହାନ୍ତି। ମହିଳା ସିଙ୍ଗଲ୍ସର ଅନ୍ୟ ଏକ ମ୍ୟାଚ୍ରେ ସୁଇଜରଲାଣ୍ଡର ବେଲିନା ବେନସିକ ୭-୬ (୭/୫), ୬-୩ ସେଟ୍ରେ କ୍ରୋଏସିଆର ଡୋନା ମର୍ଟେନ୍ସଙ୍କୁ ହରାଇ ପ୍ରଥମଥର ଲାଗି କ୍ୟାରିୟରରେ କୌଣସି ଗ୍ରାଣ୍ଡସ୍ଲାମ ପ୍ରତିଯେଗିତାର ସେମିଫାଇନାଲରେ ପହଞ୍ଚତ୍ଛନ୍ତି।
