ହ୍ୟୁଷ୍ଟନ,୨୩ା୯ (ପି.ଟି./ଆଇଏଏନ୍ଏସ୍): ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ହ୍ୟୁଷ୍ଟନ ସହରକୁ ଏକ ବଡ଼ ଚାବି ଉପହାର ଦେଇଛନ୍ତି। ସେ ଏନ୍ଆର୍ଜି ଷ୍ଟାଡିୟମ୍ ମଞ୍ଚରେ ପହଞ୍ଚତ୍ବା ପରେ ସେଠାରେ ଉପସ୍ଥିତ ହ୍ୟୁଷ୍ଟନ ମେୟର ସିଲଭେଷ୍ଟର ଟର୍ନରଙ୍କୁ ଉପହାର ସ୍ବରୂପ ଏକ ଚାବି ପ୍ରଦାନ କରିଥିଲେ। ଟର୍ନର ତାଙ୍କୁ ସ୍ବାଗତ କରିବା ସହ ଉପହାର ଗ୍ରହଣ କରିଥିଲେ। ଆମେରିକା କଂଗ୍ରେସର ଦୁଇ ଡଜନ ଗଭର୍ନର ଓ ସଦସ୍ୟ ମଞ୍ଚରେ ଉପସ୍ଥିତ ରହି ମୋଦିଙ୍କୁ ସ୍ବାଗତ କରିଥିଲେ।
ମୋଦି କହିଲେ ହାଓଡି ହ୍ୟୁଷ୍ଟନ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସପ୍ତାହବ୍ୟାପୀ କାର୍ଯ୍ୟକ୍ରମରେ ଯୋଗଦେବା ଲାଗି ଆମେରିକାର ଶକ୍ତି ରାଜଧାନୀ ହ୍ୟୁଷ୍ଟନ୍ ସହରରେ ପହଞ୍ଚତ୍ବା ପରେ ‘ହାଓଡି ହ୍ୟୁଷ୍ଟନ’ ଟୁଇଟ୍ କରିଥିଲେ। ହାଓଡି ହେଉଛି ଟେକ୍ସାସ୍ର ପାରମ୍ପରିକ ଅଭିନନ୍ଦନ। ଶନିବାର ସ୍ଥାନୀୟ ସମୟ ଅପରାହ୍ନରେ ମୋଦି ହ୍ୟୁଷ୍ଟନରେ ପହଞ୍ଚତ୍ଥିଲେ।
ଭାରତୀୟ-ଆମେରିକୀୟଙ୍କ ସ୍ବାଗତ
ହାଓଡି ମୋଦି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ମିଳିତ ଉଦ୍ବୋଧନ ଦେବା ଐତିହାସିକ ଘଟଣା ବୋଲି ଭାରତୀୟ-ଆମେରିକୀୟମାନେ ମତ ଦେଇଛନ୍ତି। ଭାରତର କଶ୍ମୀର ନୀତିକୁ ଏହା ଆମେରିକାର ସିଧାସଳଖ ସମର୍ଥନ ବୋଲି ସେମାନେ କହିଛନ୍ତି। ହାଓଡି ମୋଦି କାର୍ଯ୍ୟକ୍ରମରେ ଟ୍ରମ୍ପ୍ ଯୋଗଦେବା ଆମେରିକା ଓ ସାରା ବିଶ୍ୱ ପାଇଁ ଭାରତ କେତେ ଗୁରୁତ୍ୱପୂର୍ଣ୍ଣ ତାହା ସ୍ପଷ୍ଟ କରିଛି ବୋଲି ଭାରତୀୟ-ଆମେରିକୀୟ ଡାକ୍ତର ସଂଘର ପୂର୍ବତନ ସଭାପତି ରାକେଶ ମଙ୍ଗଲ କହିଛନ୍ତି। ମୋଦିଙ୍କ ସହ ଟ୍ରମ୍ପ୍ ଗୋଟିଏ ମଞ୍ଚରେ ଯୋଗଦେଉଛନ୍ତି। ପାକିସ୍ତାନ କ୍ଷେତ୍ରରେ ଟ୍ରମ୍ପ୍ ପ୍ରଶାସନର ଆଭିମୁଖ୍ୟ ଏଥିରୁ ସ୍ପଷ୍ଟ ହେଉଛି ବୋଲି ରିପବ୍ଲିକାନ୍ ହିନ୍ଦୁ ସାମ୍ମୁଖ୍ୟର ଶଲଭ କୁମାର ଉଲ୍ଲେଖ କରିଛନ୍ତି।
କଶ୍ମୀର ପ୍ରସଙ୍ଗକୁ ନେଇ ଏନ୍ଆରଜି ଷ୍ଟାଡିୟମ୍ରେ ବିକ୍ଷୋଭ କରିବାକୁ ପାକିସ୍ତାନ ଯୋଜନା କରିଥିଲା। ତାହାକୁ ଭଣ୍ଡୁର କରିଦିଆଯାଇଛି। ଭାରତର କଶ୍ମୀର ନିଷ୍ପତ୍ତିକୁ ଆମେରିକା ପୂର୍ଣ୍ଣ ସମର୍ଥନ ଜଣାଇବା ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କ ପାଇଁ ଶକ୍ତ ଚାପୁଡା ବୋଲି କୁମାର କହିଛନ୍ତି। ହାଓଡି ମୋଦି ଭାରତୀୟ-ଆମେରିକୀୟ ସମ୍ପ୍ରଦାୟର ସର୍ବବୃହତ କାର୍ଯ୍ୟକ୍ରମ। ଏହି କାର୍ଯ୍ୟକ୍ରମ ଉକ୍ତ ସମ୍ପ୍ରଦାୟ ଏବଂ ଭାରତ-ଆମେରିକା ସମ୍ପର୍କ କ୍ଷେତ୍ରରେ ଗେମ୍ ଚେଞ୍ଜର ହେବ ବୋଲି ସିକାଗୋରୁ କ୍ରିଷ୍ଣ ବଂଶଲ କହିଛନ୍ତି।
